شخبوطة كويتيه

Tuesday, November 24, 2009

مطعم ليل نهار + فيلم طير انت + عصر الحب لنجيب محفوظ = طلعة الويك اند

2:32 PM

السلام ..

شلونكم..

لي ياني وياكم خير لفاني ولفاكم وشر تعداني وتعداكم << متى تنقال هالعباره :)

المهم يوم السبت طلعنا طلعه اخواتيه بحته من زمان ماصارت ..

اول شي حسنا ندور مطعم وي نسيت احط كيكه اللي جربته يالبوست الياي ان شاءالله ..

رحنا صوب النافوره برا سراي كان مسكر مانبي ستار بوكس رحنا الصوب الثاني كافيه بلان زحمه و الباجي مانعرفهم عاد صعدنا فوق واستقرينا ع ليل نهار اول تجربه له ..

غيرنا مكان فيه 3 مرات مره نبي طاوله اكبر ومره لانه اختي تبي داخل ..

اهو لبناني بس في وايد اكلات لبنانيه مو موجوده مثل التبوله ..

انا طلبت سيزر .. طعهما زين مو وااو..

معجنات لاختي الكبيره استغفرالله عينتهم مو شي وجيكو ع البتزا تذكرت تعليق اختي الوسطيه عليها :)

فتوش ماقدرت اكله لانه في خضرا وفجل وبصل وهالسوالف ماكلها واخبز بعد شكله غريب ..

صاج لبنه وزعتر لاختي الصغيره جنه او الوسطيه اهو 4 قطع كل وحده فينا كلت قطعه هم ماحبيته حسيت في نعناع وانا ماحبه ..

وهم طلبنا صمونه ستيك بيروت اسمه شي جذي لاختي يالصغيره او الوسطيه اهي وحده طلبت صاج والثانيه صمونه واهم الصمونه 4 قطع كلنا ذقناها اختي الكبيره حبتها انا عادي بس احس مو ستيك ريحت الستيك المقصد انه الستيك جنه حالفين عليه ..

ببروني مالتي طبعا كلنا كليناه والباجي تيك اوي ماحبيت طعم الطماط واضح حيل استغفرالله هم ماحب طعم معجون الطمام خخ انا شاحب!!

واختي الكبيره هم حبتها..

وي نسيت احط صورة عصير اختي :\

________________________________________________________

عقب قعدنا نتمشى لي 2 وشي بس كنا كل 2 مع بعض الصغيره والكبيره دشوا اتش اند ام وانا والوسطيه رحنا بيمنكي بول اند بير كليرز ناين وست ومانغو و استرادي وقالوا القروب ال2 انهم بيردون البيت جان احنا نروح نحجز السينما ماوعينا الا اهما بويهنا قلنا لهم انه حجزنا لما دروا انه طير انت جنه يبون بس يبيله دزه عشان يقتنعون مع حنتنا اقتنعوا راحوا اهما يصلون وانا مع الصغيره هالمره رحنا حجزنا لهم ..

والفيلم كان طير انت طبعا ماشفت لادعايته ولا قريت عنه شي بس شفت بوستره ..

وقبل لايبدي الفيلم بدقيقه يو اشوه ..

طبعا خذينا ناتشوز ونفيش وبيبسي لهم وماي لي وانا اطلب اللي وراي كانت لابسه كمام انا لا ارادين غطيت خشمي وعقب الكبيره اللي معاه تقولي اختي ترا احنا طلبنا ناتشوز اخر مره ولقينا فيه دوده طلبي نفيش او اي شي 2 بس ناتشوز لا ..

جان اقولها وي عاد طلبنا وابتسمت وقلت لها مشكوره جان ترد لي ورا وتلف ويها وتقول كيفج بس الدين نصيحه قلت لها بالعكس ماتقصرين استغربت من ردة فعلها اخاف بجت عقب خخ ..
المهم نرد للفيلم ..

بطولة

أحمد مكي , دنيا سمير غانم

المخرج

أحمد جندي

النوع

كوميدي

مدة الفيلم

122 min

>> مو كاتبين التاليف لعمر طاهر ..

القصة
شاب منطوي يحب فتاة ويظهر له جني يحوله لعدة شخصيات لتتناسب مع ذوق الفتاة، وكل مرة من المرات يحدث موقف طريف يؤدي الى الفشل في الوصول لقلب الفتاة.

http://webserver2.kncc.com/arabic_synopsis.php?mv=2818

الحلو انه كل مره شخصيه غير.. واهما 7 شخصيات للبنت والولد ..

الولد اسمه بهيج والبنت ليلى ..

1- اهو كول وعضلات ورياضي واهي كول بس محافظه يعني لبس وفريبس ماترافج وبس تصافح خخ بس ضحكني قاعده معاه ع البحر وتقوله انا مارافج صبيان عيل اهو شنو@@

2- اهو صعيدي و قوي و ظالم واهي صعيديه كول عندها نت و تحب مهند..

3- اهو حساس ورقيق وغبي خخ واهي لبنانيه وتحب الريال الدفش ..

4-اهو غني وفسقان واهي مندوبة تجميل << بس مضبطه الستايل ..

5- روش << توهقت وسالت اختي قالت لي يمكن جذي خخ اهو اللي يطلع بستايل السبعينات واهي بعد مثله..

6- ومره صار مدرب منتخب واهي مشجعه ..

7- فيلم هندي ..

حلو انه في رساله بالفيلم انه كل شخ يرضى بنفسه يدور مميزات اللي تبرزه ..

وانه الريال ماينحب عشان شكله ولا افلوسه انه مو مهم غني بس المهم يكون زين معاه ومايقصر عليه وانه ريال بدون مره ولا شي ..

وبس..

دعايته :

http://www.youtube.com/watch?v=vfkK1EZQO0Q

_________________________________________________________

هالكتاب قعدت يمكن اسبوع فيه ..

اهو للاديب الكبير نجيب محفوظ ..

وطلع مسوينه فيلم ..

http://www.aa4l.com/vb/showthread.php?t=124047

الشخصيات :

1- الست عين : ارمله في الخمسين رزقت بطفل ع كبر يدعى عزت واهي امراه كريمه معطاءه..

2- عزت عبدالباقي : ابن الست عين الذي تتمركز حوله الروايه وتدور الاحداث من طفولته الى ان يصل تقريبا الى الخمسينات من عمره..

3- حمدون عجرمه : صديق عزت منذو الكتاب وحت ال 18 ثم يختفي ليعود بمنتصف العشرينات تقريبا ثم يختفي مجبر هذه المره ليعود بعد ربع قرن ليتلقى ..

4- سيدة : زوجة عزت ورزق منها بطفل واحد يدعى سمير..

5- بدريه المناوشي : زوجة حمدون وحبيبة عزت .

الكتاب جيد بس كنت افضل اشاهده كفيلم لانه عندي قراتي له احسست انني اقرا سيتاريو لفيلم :\

اي خل اقولكم شكو اهو بالموضوع انا كنت اقرا بالسياره و بالمطعم عاد اختي تتحلط وتتطنز علي تقولي خلي كتابج يعني يابانيه بتسثنر وقتها اهي اهي..

Labels: افلام, اكل, جولة مكوكية, قراءه |

12 comments

Monday, November 23, 2009

خان الصابون في المارينا مول ..

4:58 PM

السلام ..

اليوم سوينا جوله بربوع حولي ولما خلصت مريت المارينا ..

اختي كانت تبي خان للصابون واهي قايلين لها انه موجود بالنقره بس ماكان لنا خلق ندشه فقالنا مره 2 ان شاءالله صدفه واحنا نفتر بالمارينا لقيناه ..

طلع توه مبطل من فتره بسيطه ..

واختي خذت اللي تبيه اعتقد اسمه كريم مغذي ..

عاد اللي تبيع قالت لنا انه في عروض ع الصابون هالعروض مؤقته واهي اذا شريتي صابونتين تاخذين الثالثه فري..

وهم في كريم للهالات شدني تقول 15 يوم ويخف السواد بشكل ملحوظ احد جربه ؟؟

ومدام السالفه صابون واهي غرام ميد فالبوست اهداء له توني ماصارلي ساعتين راده البيت قلت بنزله عشانج عز الله شانج وكبر حظج يااااااارب..

وللعموم يارب..

شرايكم جربتو شي منهم ؟؟

اضافة :واي نسيتي اقول انه مكانه بالضبط جبال محل الجاي و محل جنه اسم اوقياسي شي جذي عموما هالمحل(يم برشكا) واهو كشك بالنص..

وسايت المحل..

http://www.khanalsaboun.net/index.php?&language=ar_LB

Labels: عروض, محل |

25 comments

Saturday, November 21, 2009

جوله ممتعه بربوع المركز العلمي :)

10:19 PM

السلام..

الخميس اللي فات رحت المركز العلمي امم ليش :

1- شوقتني ع الاكواريوم جاي الضحى :)

2- مليت من السوق وابي اروح اي مكان اغير فيه جو واستانس والاختيار كان اهو ..

كل يوم احب النت اكثر لانه يسهلي وايد اشياء ..

عرفت كل شي عن المركز وانا بيتنا ..

سويت سيرج طلع عندهم سايت عرفت فيه كل شي ابيه عنه ..

http://www.tsck.org.kw/ar/index.asp

كا وصلنا :)

وحجزنا التذاكر اللي يصير 3 مع بعض الاستكشاف+ اي ماكس+ الاكواريم ..

احنا وصلنا تقريبا 11 الا ربع فكان باجي ساعه الا ربع ع عرض فيلم ودوني القمر واهو باباي ..

هذا البوستر ..

وهذي نبذه عنه من السايت ..

يقدم للمشاهدين اللحظة التاريخية التي وحدت العالم عندما هبطت أبولو 11 على سطح القمر و الخطوة الأولى لإنسان على سطحه التي نقلت مفهوم استكشاف الفضاء إلى أفق جديد ، و يأخذ المشاهدين إلى عالم لم يزوروه من قبل و يشعرهم بأنهم فعلاً جزء من هذه الرحلة التاريخية. و الجديد في هذا الفيلم هو أن الرحلة إلى القمر تكون من منظور ثلاث ذبابات ، تأثر أحدهم ، نات ، بجده البطل الذي أنقذ اميليا ايرهارت (و التي كانت أول من عبر المحيط الأطلسي بطائرة) و أصبح يحلم بأن يعيش دور البطولة الذي عاشه جده. قام نات بإقناع اثنين من أصدقائه بالذهاب إلى القمر و تسللوا إلى داخل البدلة الفضائية لرواد الفضاء نيل آرمسترونج و بز ألدرين (الذي شارك بالفيلم) و مايكل كولينز. قبل الإقلاع ، و أثناء تصوير الكاميرات التلفزيونية لهذا الحدث التاريخي الذي تابعه العالم أجمع ، شاهدت الذبابات حول العالم نات و رفاقه و هم يلوحون للكاميرات معلنين بداية رحلتهم التاريخية.

http://www.tsck.org.kw/ar/movie_details.asp?id=88

وع مايبدي الفيلم رحنا تمشينا برا ..

وكان الجو براد وناسه ..

هذي جم صوره وكالعاده في صوره اختفت @@

ولما رحنا صوب البوم لقينا سمج ويهال يوكلونه نفيش وبطاط وماوعينا الا القوطي بكبره بالبحر @@

قرب موعد الفيلم ودشينا داخل..

شريت هذا الله يزيد النعمه ..

وخلص الفيلم ورحنا الدسكفري وكانت حدها وناااااااااااااااااااااااسه..

اول لعبه بويهنا كان فيها هالسوال ..

وحسافه اختي ماصورتها كلها اهو في نفس قضبه تفرينها وهذي النتيجه ..

شكلها مو واضحه :( بس اهي فلوس تطير..

حزتها كان في هنود معانا عاد احنا مندمجين فيها ماوعينا الا الشايب الهندي يمنا عاد قعدت اشرح له ع ابو فاهمه واهو وقف يسوف معاي ياحليله وعقب هم وقف ماراح خخ اثر بيجرب ينطرنا نخلص :)

وعقب رحنا لعبه اسمها غرفة اخبار البيئة ..

جنها استديو اخبار فيها مايك وكاميرا و اخبار وشاشه وخلفيه شغل عدل :)

وهذا النص والمايك..

ها اوضح صور لها ..

وفي شاشه يمج جنه وشاشه تلفزيون حق اللي بيشوقج احنا ماانتبهنا له الا لما ضحك الموظف ويقول شوفوها بالشاشه اشوه مو انا اللي كنت قاعده العب خخخخ..

وعقب رحت العب بهالكرسي تضغطين زر يرتفع فيج انا جربته بس ماعرفت له السيكورتيه ساعدتني ..

هذي اللعبه جربتها مرتين ولا عرفت لها :(

هذي بعد تونس شلون الهوا يطير الكوره تقعد فتره بالجو تصدقو جنه ينفع استشوار :)

عقب واحنا نحوس بالقاعه نادتنا موظفه تقول في عرض اسمه عرض النجوم جنه ورحنا بهالقاعه ..

شرحت لنا عن النجوم والوانها واشكالها :

الوانه :

1- بالبدايه ابيض مزرق..

2- اصفر..

3- برتقالي محومر..

وقالت لنا اذا نشوف نجوم الصبح قلت اي الشمس قالت صح وعقب قالت انه الشمس لونها افر يعني توها بمنتصف العمر ..

وروتني اشكال النجوم نجمة الشمال و مجموعة الصياد وقالت انه بحزامه 3 نجوم تحتهم بالضبط الاهرامات وانه الفراعن هم اول من اهتم بالنجوم ..

وقالت لنا عن نجمة سهيل وخواته والسباع والخ ..

واكمل لكم العاب اللي لعبنها ..

ممتعه كل سكان يحرك عجله والمطلوب تنقلين الدائرة الخضرا بينهم ليما توصلينها لي الزحلاقيه الحديد ..

هذي اللعبه عاد غير امبيه ذكرتني بالروضه بس هذي وقلفي وناسه كانت زين قدروا ينزلوني منها خخخ..

هاللعبه مدتها دقيقه جنه قاري و كثر ماتبذلين طاقه تخلصين قطعة السكر اللي محطوطه جدامج ع الشاشه لما نزلت منها اريولي وظهري عوروني لانه شديت حيلي خخخخ ..