Monday, July 22, 2013

postheadericon things_by_fatameee فناتق للتقديم والهدايا والقرقيعان والتوزيعات .. الخ

1:50 AM
تذكرون قبل فتره نزلت لكم عن مشروع سعودي اللي يطبعون ع خدود البنات مادري العيوز المارشيملو وع الشكر هذا البوست هني ..
 
وانا احوس بالانستغرام لقيت اكاونت يشوق في وايد فناتق منها المارشيملو مو نفسه او تقليده بس نفس الفكره ع اسامي او هابي فيس ..
 
 
 
 مارشميلو الاسماء
٣٠ حبه مغلفه = ٥ دك
١٠٠ حبه مغلفه = ١٦ دك
 
وهم عندها قند او شكر ..
 سكر الاسماء
٣٥ حبه = ٤.٥٠٠ دك          

المفروض البوست لي هني ويخلص بس ماقدرت ماشاءالله في شغلات تشوق وغصب وقفت طلعت من الاكاونت بكبره خخ عشان اوقف ..
           
 سله النقصه
مزينه بالورد الفوشي الطبيعي
بالاضافه الى ٤ قراش :
الكبيره ١ : بسكويت الدارسين
الكبيره ٢ ؛ بسكويت اليانسون
والقرشتين الاصغار فيهم ميني قرص عقيلي ( يمكن اختيار اي لونين )
الكميه محدوده
 
 
 
 
بسكويت الاظرف
حاليا متوفر بألوان جديده :
الاخضر
الاصفر
الازرق
الوردي الغامج
العلبه تضم ٣٢ ظرف
وكل ظرف يحتوي على قطعه واحده من البسكويت ( الطلب يكون قبل يوم او اكثر )
السعر = ١٢ دك 
 
 
ماشاءالله عندها وايد شغلات تشوق هذا جزء بسيط منها  ع قولتهم لمشاهدة المزيد هذا اكاونتها بالانستغرام  :
 
 

 للطلب واتس اب :
99591018

Labels: , , , | 0 comments
Sunday, July 21, 2013

postheadericon افتتاح سنتر بوينت بالافنيوو ..

2:57 AM
كنت معزومه ع الافتتاح بس الدعوه يت لي ع اساس انه الصبح 11ونص تقريبا بس الافتتاح كان 9.30 بالليل بيوم 16 - يوليو ..

المهم مارحت له اشوه ولا جان خخ ابروحي احوس عند الباب ..

وامس كنت بالافنيو فمريته ..

هالفرع يعتبر الاكبر بالكويت ..

ولانه كنا مستعيلين وهم في ناس فصورت جم صوره ع الطاير ..


 تقريبا فيه كل الماركات اللي بسنتر بوينت سبلاش و جونير ولايف ستايل ... الخ ..

وفي ركن كبير لهوم سنتر ..

وشو اكسبرس موجود هذا ساعات احصل عنده جواتي لوقطه ورخيص قبل سنتين خذيت منه بوت ب8 جنه وايد سالوني عنه بس حسافه سكروا اللي بالجهرا ..
اشوه فتحوه بالافنيو وهم موجود بالري بسطرت ماكس ..

وهذا الركن الوحيد اللي صورته اهو صوب المكياج في اغلب ماركاتهم مثل لوريال وايزدورا ونوبا ..الخ ..
 
ماشاءالله شرح وكبير المره اليايه بروح له ع رواق وماخلي شبر فيه خخ ..
 
اكاونتهم بالانستغرام :landmarkq8@
 
وشكرا ع الدعوه ..
 
تحديث :
 
نسيت اكتب مكانه :\
 
اهو بالسرداب بسوق الذهب تحت كافيه ومحل الكاكاو دي براند
Labels: , , , , | 0 comments
Friday, July 19, 2013

postheadericon شكرا ندى بيوتي ..

10:00 PM
امس وصلتني هديه مفاجاءه من ندى بيوتي :)
 
وناسه احلى شي المفاجات 2 هديه تيني بدون لا اعطيهم عنواني بس هالمره يت لي مع طلب اختي ..
 
والهديه اهي مجموعة ندى للشفايف ..
 
يعني لغرامي البراتم ..
 
 
تحتوي ع 3 شغلات :
1- سنفرة : من مكوناتها شمع النحل الطبيعي وزبدة الكاكاو والشيا الطبيعية و نكهة التوت بالاضافه الى الزيوت والمكونات الاخرى ..
 
طريقة استخدامها : اخذ جزء بسيط منها ووضعيها ع الشفاه بحركة دائريه سريعه لمدة 5 دقايق او بفرشاة اسنان ناعمة ثم اغسليها بالماء وتستخدم مرتين باليوم ..
ونتيجته اهو نعومه من اول مره ..
 
2- مرطب الكولاجين : يحتوي ع زبدة الكاكاو و الكولاجين والزيوت والفيتامينات منها فيتامين e ..
 
طريقة الاستخدام : ضعيه طول اليوم وخاصه قبل النوم بعد استخدام السنفره ومع مساج دائري يساعد ع امتلاء الشفايف واعطائها شكل طبيعي جذاب ..
 
3-زبدة الشفايف : من مكوناتها زبدة الكاكاو والشيا الطبيعية و نكهة التوت بالاضافه الى الزيوت الطبيعية ..
تعالج التشققات ويعطيها لمعان و صحة ونعومة ..
 
وان شاءالله ابلش استخدمها اليوم وتفيدني وعقب انزلكم بوست بتجربتي ..
 
اكاونتها بالانستغرام: @nada_beauty 
 
واتس اب : 99499758
 
شكرا ندى :*
Labels: , | 0 comments

postheadericon ysl shocking mascara

5:07 PM
 
قبل شهر وشي رفيجتي يابتلي هالماسكرا نقصه لانها جربتها وعجبتها ..
 
 
رايي فيها ..
 
زينه بس عيبها وايد تتكتل وتلزق الرموش..
 
 وجيكوا على صور  اللي مستخدمينها بقوقل كتبوا عنوان البوست بقوقل (ysl shocking mascara) وشوفوا تجارب البنات ..
 
مشكوره صديقتي :*

Labels: , , | 0 comments
Tuesday, July 16, 2013

postheadericon مجموعة هدايا من بودي شوب مخصصه لرمضان

1:24 PM





توني ادري انه بودي شوب يسوي اصدار او لاين بالاحرى تغليف خاص لرمضان..
حبيت الفكره ..
ينفع قرقيعان :p
 
تحديث :
 
الاسعار :
اللي شفته الهلال اللي فيه زبدة ككاو حجمه عنون وسعره ب5 ..
والنجمه ب10 ..
 

- Posted using BlogPress from my iPhone
Labels: | 1 comments
Sunday, July 14, 2013

postheadericon طبقين حلو بالمارس :)

1:23 AM
اختي الصغيره تحب تسوي حلو ويوم الخميس كانت رفيقتي بالجمعيه فجيلنا لاطباقي وقلت لها اخذي اغراض لاطباقج ولانه مو بالها شي خمطنا جم نوع ككاو منهم المارس ..
 
وسوينا منهم طبقين سهلين ..
 
الاول: كرات الكورن فليكس ..
 
 
المقادير ..
 
نص قالب الزبده ..
3 ككاو مارس..
وكورون فليكس حسب الرغبه ..
 
الطريقة :
 
نذوب الككاو مع الزبده بحمام ماي دافي ..
وعقب نحط الكورن فليكس فيه ونكوره ..
 
رايي :
حبيته حااالي ..
 
الثاني : كيك ..
 
المقادير :
 
3 مارس
قيمر
كيك ككاو سارلي كيك ..
وللتزين اي ككاو تحبونه احنا حطينا مالتيزر - ارو- ام اند امز ..
 
الطريقه ..
 
نذوب الككاو بحمام ماي دافي عقب نضيف القيمر له  ونخلطهم..
نقصص الكيك ونصفه بالصحن وعقب نحط عليه خلطة الككاو ونزينه باللي نبيه ..
وعادي تاكلونه ع طول اذا تحبون الحلو حار ..
 
رايي :
 
هم والله زين وسهل ..
 
تسلم ايد خيتو :)
Labels: , | 1 comments
Saturday, July 13, 2013

postheadericon نكهات الرمضانيه @marchelas_touch

1:17 AM
قبل جم يوم وصلتني نقصه من marchelas_touch  لتجربة نكهاتهم اليديده المخصصه لرمضان وهذا عقب ماطلبوا من متابعينهم ترشيح ناس يثقون بذوقهم وانا بنت عمي رشحتني وحدي استانست خخ والحمدالله تم اختياري واختاروا هنوف البلهان ..
 
لما شفت الجيس من بعيد بيد المندوب قلت الله ورد حقي خخ اتغشمر مع رفيجتي لانه كل مايمر ورد انقول لنا ويطلع لا بس هالمره طلع صح خخ ..
 
وهذا عقب ماطلعت الاغراض من الجيس ..
 
واسمي الجميل :)
 
وهذي النكهات :
 
اهما 3 الاول رهش وال2 قمر دين وال3 تمر بالدايجستف ..
 
رايي :
 
حبييييت الرهش لدرجة اني قرمت كل الموجودين عساس محد ياكلهم غيري خخ ..
 
ووايد حبيت طريق التغليف والتنسيق صج ذربه ماشاءالله وبالضبط مثل مااحب ..
 
مشكورين ع الاختيار وع النقصه اكرمكم الله وشكرا بنت عمو ع الترشيح :*
 
للطلب :
من9-2 ظهراً ومن5-10 مساءاً
الطلب قبلها بيوم
مسج او وتساب على الرقم 55490003
انستغرام : marchelas_touch 
 
Labels: , , , | 0 comments
Saturday, July 6, 2013

postheadericon جديد مكياجي ‘22K Glowing Baked Bronzing Powder’ + اخر عروضه ..

10:57 PM
قبل يومين دزولي مكياجي ايميل باجدد منتجاتهم  وشفت الايميل اول ماقعدت من النوم وكنت دايخه قريت برونز ورديت نمت اليوم ذكرته لما شفت اخر عروضهم بالانستغرام ..
 
جيكت ولا منتجات عن التان والبرونز غرامي ..
 
واهي مجموعة 22K Glowing Bronzing Powder
 
مكونه من 3 منتجات وتتميز حسب ماهو مذكور تمزج بين  مضادات الأكسدة وترطيب البشرة والخصائص الوقائية الموجودة في فيتامين A وزيت الجوجوبا ما يجعل من هذه المجموعة فعّالة وصحية على السواء:
 
(1)
22K Glowing Matte Baked Bronzing Powder
 
 سواء كنت ترغبين في تكميل مكياجك المألوف مع طلّة برونزية او إضافة بعض الإغراء على روتينك المعتاد، إليك بودرة للتسمير رفيعة الصنع باللون الداكن المطفأ اللمعة، تضفي على البشرة لوناً برونزياً خفيفاً وشفافاً للحصول على سمرة طبيعية من دون أن تسبّب اللمعان للبشرة. وهي مثالية ايضاً لخلق تأثير كفافي طبيعي.
 
(2)
22K Glowing Shimmer Baked Bronzing Powder
 
 
 المستحضر المثالي اذا كنت تريدين إضافة لمسة من الإغراء على طلّتك. تمنحك هذه البودرة المسمّرة أقصى درجات توهّج السمرة الصحية مع لمعة خفيفة التأثير! ضعي البودرة برفق على أجزاء الوجه التي تعمل الشمس على تسميرها بشكل طبيعي.
 
 
(3)
22K Glowing Sparkling Baked Bronzing Powder
 
 تضيف هذه البودرة الفاتنة والطبيعية كلياً رشّة من التلألؤ على الوجه والجسم.  وزّعيها على كامل الوجه، العنق والصدر، اليدين والرجلين – وفي أي جزء من الجسم تريدينه أن يتلألأ!
 
تجد علبة مستحضرات التسمير هذه رفيقها المثالي في فرشاةKabuki من مجموعة Girl’s Tools!
 
وهذي اخر عروضه :
 
 
 
يبيله امره اشوف اليديد والعرض يشوقون ماشاءالله ..



 
بالانستغرام : @Mikyajy1

 
t

والسايت :LINK
Labels: , , | 0 comments
Wednesday, July 3, 2013

postheadericon مصلى المارينا !!!!

10:00 PM
 
بالويك اند كنا انا واختي الجوز بالمارينا ورحنا نصلي ..
 
واستانست انه تعدل الوضع بالمصلى وصار حده مرتب ..
 
بس اللي صدمني التنانير اللي موفريننها للصلاة ..
 
هذي نماذج بسيطه منها ..
 ااولة متقطعه وال2 مقطنين !!
والعامله قاعده تتمكيج بالحمام وانتوا بكرامه :\
 
ليش جذي ؟؟
 
 
Labels: , | 2 comments

postheadericon ريوقنا بالحمرا

10:00 AM
الحمرا اهو واحد من مطاعم الشيراتون الموجودين بغراند الافنيو..
 
قبل جم اسبوع عزمتنا اختي الكبيره ع الريوق فيه ..
 
 هذي طاولتنا ..
 
وريوقه عباره عن بوفيه بتشكيله كبيره وواسعه ومنوعه من الاكلات العالميه ع قولته فرنسي -تركي-هندي .. الخ وشرقي ..
 
هذي مفتطفات بسيطه من البوفيه..
 
 
وعندهم شغلات يسونها لكم خاصه عل الطلب مثل الفول وجنه الفلافل بعد واومليت والصاج ..
 
 
من الشغلات اللي كانت ع طاولتنا ..
 
فول و بان كيك وفرنش توست و كنافه وصمون ..
 
طبقي ..
 
الاسعار واوقات العمل :
 
رايي:
 
البوفيه مثل ماقلت فوق منوع كلشي فيه تقريبا ماشاءالله ...
الخدمة كانت ممتازه ..
 
واكرمج الله اختي :*
Labels: , | 0 comments
Tuesday, July 2, 2013

postheadericon homeslice pizza

10:30 PM
 
غرامي البيتزا وقريت وايد يمدحون هالبيتزا بالانستغرام قلت اذوقها يعني اذوقها وكل مره اتكيسل اروح السوق اخذها قبل جم يوم صادف رحت شرق جان اخذ لي 1 ..
 
واهي متوفره باكثر من نوع واكثر من حجم الدائري البيتزا الكامله او مثلثه كشريحه وحده ..
 
انا اخترت شريحة وحده من الببروني ..
 كحجم تعتبر كبيره وعجينتها رقيقه مو سميكه ..
 
وطريقتها :
توقعت انه نسويها عادي بالميكريوف تسخين ان كثر دقيقه طلع لا لازم فرن يتسخن فتره وبدرجة معينه وعقب نحطها لمده جم دقيقه ..
 
سعرها :
ب1,250 د.ك..


 
رايي :
 
ماحبيتها ..
طعمها اشكرا مو فريش جنه بيتزا هت بايته بالثلاجه ومسخنينها (مايندرا اذا احنا مو مطبقين طريقتها عدل ! مااعرف للفرن عطيت الخدامه تسويها )..
 
وهذا شي 2هم مو حلو فيها اهو الدهن :\
 
موجوده :
بمركز سلطان \سوق شرق- يم قسم الخضار ..
Labels: | 0 comments

postheadericon essence

10:30 AM
 
قبل اسابيع لقيت ستاندها برد تاغ الري وقالت لي دور الاسبوع تنزل ومر اسبوع و2 و3 والاستاند يصفر لي الحين ..
 
امس سويت جوله بالري ولقيته بلايف ستايل (تبع لاند مارك )
 
استانست .. ركضت خخ قويه .. بس ماخمطت :(
 
 
اول شي لفت انتباهي الحب الحب البي بي كريم ..
 
متوفر بدرجتين :
جربتهم ولا وحده ناسبتني رقم 1 ارحم رقم 2 طلع ابلق اموولح اشهب كلش ماناسبني ..
 
وماخذيته :(
 
ومالقيت سعره ولا في احد عبرني جان سالته ..
 
وبس خذيت بيس للشدو شفت بالانستغرام يمدحونه وانا محتاجته ..
 
هذي صورته من النت ..
 
لي الحين ماجربته ..
 
وسعره:
 بدينار ونص بس ..
 
كنت ابي حمره منه شفتها بالانستغرام بس ماحصلتها :(
 
والاسعار :
القيت نظره سريعه وخاطفه << احم احم
كانت تقريبا تبلش من 950 فلس لي 1.950 د.ك ..
 
Labels: , , , | 0 comments
Monday, July 1, 2013

postheadericon فقع & مشروم - faqaa&mushroom

10:30 PM
شفت ولد خالي حاط صورته بالانستغرام شوقني اجربه لانه غرامي البطاط بجميع اشكاله ونكهاته ..
 
صادف بالويك كنت هناك فرحت جربته ..
 
 
ماقدرت اصور لا واجهة المطعم ولا المنيو لانه ماشاءالله كان في ناس ..
 
واهو نفس الكشك الصغير مافي قعدات ..
 
وقريت المنيو مافهمت شالفرق بينهم جان اسالهم رد علي واحد اعتقد كويتي قالي هذا بطاط بصلصه او بدونها وهذا بطاط بصلصه وهذا بطاط بصلصه وهذا .. بيكمل ..
تنحت خخ جان اقوله انزين شنو الفرق بينهم ؟!
قالي الحميسه ..
 
جان اختار الميكس يصير فيه فقع وماشروم ..
 
سعره : 1,700 د ك..
 
رايي :
 
ككل حبيته طعمه زين وفريش البطاط و الصلصه غريبه غير عن اللي متعوده عليها وودي اطلبه الحين خخ ..
 
عنوانه :
 الافنيوز ،فيز ٣، السوق، شارع اللؤلؤه ..         
الانستغرام : @faqa3_and_mushroom
 
Labels: , | 0 comments

postheadericon مكياج توب شوب ع دينار بس ..

10:30 AM
بيوم اليمعه دريت انه توب شوب مسوي خصم ع مكياجه صار اغلبه ع دينار بس وبما انه هوس المكياج بلغ فيني مبلغه الله وكيلكم 2 يوم انا بالسوق خخ ..
 
 
 
وهذي حصيلتي ..
من فوق من يسار :
- كلينكس..
-صبغ اظافر ست 3 الوان الظاهر احد لاعب بستي المفروض كل لون غير :(
-اضاءه ..
-قلم جامبو ذهبي ..
ليب ماركر نفس الحمر التنتد ..
-صبغ اظافر راسه دقيق والصوب ال2 ستراس ..
- كحل كحلي ..
 
حسافه مالحقت ع البلاشرات وماكان في حمر ..
 
وبالنسبه الاسعارهم بدون سيل عموما في شغلات كانت ب3 او 5 او 7 د.ك يعني الفرق يسوى ..
 
 
Labels: , , | 2 comments
Sunday, June 30, 2013

postheadericon مبخر رمضان من ايار للعطور

11:51 PM
السلاموو ..
 
ولهت ع بلوقي وع متابعيني الصامتيين ..
 
بحاول انزل اليوم اكثر من بوست ان شاءالله ..
 
والمهم خلون نبلش بوست اليوم ..
 
امس اخوي دش يناديني معاه هالجيس لما شفته ولا هديه رمضان @ayarperfumes احلى شي اني مادري انه بيدزون لي بتقولون شهالعبو شهاليور شلون عرفوا عنوانكم معطتهم اياه العام دزولي نقصه ، استانست اول شي لانه مفاجاءه مو متوقعه 2 شي امي تحب عطورهم حيييل لدرجه بعيد الشر والله لايعوده لما انجلطت بالمستشفى وصتني ايب لها اغراض ومنها ست العطور اللي عطوني اياه العام وماشاءالله خلصتهم  هذا بوستي الاولي عنهم (اضغط هنا )..
 
 
اسم الهديه مبخر رمضان ..
 
وهذا شكله علبه مستطيله طواليه من البلاستيك محفور عليها بكل الجوانب نقش الاسلامي او الشرقي ومن جدام اسم الشركة ايار ..
 
وهذا شكله ع جنب ..
 
وهذا الغطا صج جنه مبخر ..
 
 
ومحتوياتها عباره عن :
 

-عطر سما ٧٥مل
-رشوشين (الدروازة ، دسمان) ٢٥٠مل
-تولتين معمول الدانه ..
وبما اني دقيقه وتشدني التفاصيل حبيت الالوان المستخدمه الاسود والذهبي فخامه ورقي شرقي والحلو انه من ورا حاطين نفس النقشه اللي ع العلبه مو مخلينها ساده وهم شدني انه حتى ع جيس مكتوب مبارك عليكم الشهر يعني ماله داعي جيس يديد للهديه وعبالة التغليف مثل ماتشترونها تودونها ..
 
سعر الهديه :
 
ببلاش اكيد يابوها لي خخ بس من اكاونتهم بالانستغرام عرفت انه 25 د ك ..
 
وايد مناسب ..
 
رايي :
 
انا احب هالعطور اسميها العطور الكويتيه الاصيله الخنينه بس مو لي لا لاميمتي و ديده الله يرحمها يارب، و امي كنت انطرها تيي ابي ارويها الهديه حدي متشوقه ابي تشوفها لما يت روايتها استانست وقلت لها شميهم يما قبل لا ارش قالت شحلاتها انا صرت جذي !!! خخ يما مارشيت اشوه اني مو رقيقه وايد جان غشيت واهي رشتهم علي عساس اصحصح ..
 
امي تحبهم وااايد اللي تحبه امي ويفرحها يفرحني امي تقولكم عطور ايار كثر لله خيركم وانا اقولكم شكرا ع احلى مفاجاااااااء ماقصرتوا وجزاكم الله خير اللي فرحتوا اميمتي :*
 
اللي محتاره بهديه رمضان هذي بتكون مناسبه لج حطيها بلستتج وشميها وان شاءالله تعجبج ..
 
اكاونتهم بالانستغرام : @ayarperfumes
 
Twitter: @AyarPerfumes
 
وللإستفسار والطلب:
55501991

"قريبا في برج جاسم"
Labels: , , | 0 comments
Subscribe to: Posts (Atom)

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

انستغرام المدونة (roroalk)

follow me

follow me

My Blog List

Show All

Ads

Meenakon Design Templates