Monday, September 3, 2012
9:39 PM
من المحلات البيوتيه اللي دشيتها وخمطت منها بماليزيا هالكشك :
وفي شغلات تشوق صورت لكم جم شغله منها مع مشترياتي :
شفتوا الثلاجه اللي تبين بالصوره فيها صابون ع اشكال اكل ( كب كيك ، كرات برد، وماكرون) وبالوان ونكهات مختلفه وفيها بعد صابون عادي:
وشور كب عجيبن كيوت ..
اصباغ الاظافر خذيت من اللي ب١٠ رنجت تشترون ٤ تحصلون ١ فري بس تشكيلتهم بسيطه وتحسفت اني خذيت منهم لقيت باماكن ٢ اصباغ ع ٣ رنجت وتاخذين ٢ يعطونج ال٣ ببلاش..
توقعون هذا شنو؟؟
زبدة ككاو lip blam ع شكل بوك وحجمه نتفه صغيرون..
وهذا شكل ٢ ع برد وهم صغيرون..
مشترياتي:
غير اصباغ الاظافر:
خذيت صابون ع كرات البرد هذي وحده منهم الباجي وزعتهم وخذيت ع كب كيك هم وزعتها:
وخذيت ماسك للريول نفس اللي هابين فيه اسبوع ويقشر الريل تقول يخليها ريول بيبي (نجرب ونشوف): ومعاه قلوس هديه:
عنوانه:
مجمع برميد (سلانجور)
وتحصلون بعض منتجاته اعتقد بصيدليه واستن ..
- Posted using BlogPress from my iPhone
Labels:
Sunday, September 2, 2012
10:06 PM
من المحلات اللي كنت حاطتها بلستتي الشوبنغيه هالمحل اسمه نوز واهو متخصص بالجواتي وانتوا بكرامه والجناط واكسسورات وحبيته كل ما اشوفه بمجمع لازم ادشه :
الصور من افرع مختلفه يعني هالجنطه موجوده بمجمع برميد وماشفتها بالافرع ال٢:
باجي الصور مع الباب كلهم بمجمع ميجا مول ميدفالي ..
هذول خذيت منهم ٢ صوغات:
خذينا من هالجناط الحجمين بس كل وحده لون وحده لنا انا واختي وال٢ صوغه لاختي الكبيره:
هالجوتي حبيته نعوم بس كنت ابي الوان ٢ اساسيه مثل الكاميل او الابيض ..
وهذا جزء من مشترياتنا منه ماشاءالله:
المحل موجود :
برميد (سلانجور)..
كوالالمبور:
-سونجي اللي اهو و بي بي بلازا بنفس المجمع ( بالسرداب)
-ميدفالي ميجا مول..
-بافليون..
-سوريا klcc
هذا اللي اذكره ..
- Posted using BlogPress from my iPhone
Saturday, September 1, 2012
10:57 AM
كنا نتمشى بمجع برميد (بسلانجور) وشفنا هالمطعم !! انصدمت انا شايفته بالنت بس ماتوقعت اشوفه بالصج وخصوصا بماليزيا كونها بلد مسلم ..
عقب الصدمه قلت بصوره عند بابه كان في لويه فماقدرت اصور الا ع طرف بس مبين الديكور , وسويت سيرج عليه بالعربي ماكو شي بس بالانجليزي حصلت اسمه وتفاصيل عنه ..
هذي صوره له من النت ..
وهذي الصوره اللي صورتها ..
مكرم القاري وعفيه نفس ياكلون بهالمكان :\
Friday, August 31, 2012
10:19 PM
واي يما اختفى البوست :/ بس مدام نزل اللينك بتويتر بعيده :/
ابتداء من هالشهر وفرت صيدليه بوتس مجموعه من منتجات ماركه باري ام واهي متخصصه بالتجميل ومواكبه للموضه وباسعار مناسبه (حسب كلامهم لي اللحين ماشفتها)..
وهالمنتجات للعين (كحل ، ماسكارا،ايلانير ) وللشفاه ❤(حمر وقلوسات ومحدادات ) و للاظافر ❤❤❤❤..
- Posted using BlogPress from my iPhone
3:00 PM
امس الحمدالله الله سهل علينا وردينا بالسلامه من السفر , واختي الكبيره كانت مزهب لنا العشا ع سلامتنا ..
نوعين سلطات ماعرف اساميهم ..
و4 اطباق رئيسية :
ستيك مع المشروم.. (زين طعمه يعني 2 احلى طبق من اللي ذقتهم)
فته .. (عيبها فيها بديان مااحبه :\)
الملكيه شي جذي اسمها (عباره عن برغل ودياي وحشو وبالنص حاطه صلصه ) مو وايد عجبني ..
احلى طبق العيش الايراني , عيش ملون وفي لون وردي بعد خخ وعليه حشو و تحت العيش دياي بالكريمه ..
وهذا منيوها ..
( MY CHOICE )
للبوفيهات / مها الراشد
السلطات
فتة - الامبراطورية - الهندية - الناشوز - ذره بالكريمة - كشري - الفول الاخضر - الماستر - الحمراء - المشروم - اليونانية - قوس قزح - تبولة بالتفاح - فتوش - التونة - معكرونيه الفرح - البطاطا بالكريمة - روسية - ورق عنب بارد - بابا غنوج - سلطة كسكسي - مكس جاينيز - معكرونة بالفواكه - الاميره - بطاطا مهروسة - التفاح الاخضر مع الجوز - الجرجير بالمشروم - سلطة الحمص - شمندر بالذره مع اللبنه - فتوش لبناني - ربيان بالصلصه - هرم الباذنجان . ملاحظه جميع السلطات السعر الواحد 6 دينار
الاطباق الرئيسية
قوزي لحم - برياني دجاج - لحم - ربيان - عيش ايراني دجاج - كرواسون الدجاج بالكريمة - كفتة الباذنجان - جاينيز - نودلز - دجاج بالعسل - خضار بالكريمة - اعواد الدجاج بالمشروم - ستيك بالمشروم - معكرونية بشاميل - لازانيا - توست بالبشامل - مشروم بالبطاط الهنديه - كبب مشكله - كفته طبقات - دجاج بالباذنجان - عيش اشبنت بالبشاميل - فتة الباذنجان بالدجاج - افخاد الدجاج بالصلصة المكسيكية - جوانح بالصلصة الصينية - كرات البطاط - زهرة دجاج الاشبنت بالكريمة - مشويات مشكله - فوتوشيني سبانخ - زهرة مع الدجاج بالكريمة - قباقب بالصلصة الحمراء - مطبق زبيدي - فليه هامور بزبدة الليمون - مرق سمك هامور - دجاج محشي بالخلطة - قبوط - مرقوق - جريش - كشري - كوسا بشميل - دجاج مع البطاط المقرمش - ملاحظه جميع السخانات الكبيره 15 دينار والسخانات المقسومه 17 دينار
ملاحظة يوجد حافظات
ت :66622182
اكرمج الله ام سالم :*
- Posted using BlogPress from my iPhone
Sunday, August 19, 2012
4:14 PM
عيدكم مبارك ..
وتقبل الله طاعتكم ..
وعساكم من عواده ..
(هالبوست يقرقع بقلبي )بكل رمضان يتم عرض العديد من المسلسلات بس اللي تابعتهم 2..
(1)
اعتقد انه الاشهر والاقوى بهالسنه وخذا شهرته وقوته من اختياره لاقوى واصعب حقبة زمنية كويتيه الاغلب عاصرها واهي الغزو العراقي الغاشم , واهو يعتبر اول مسلسل (30 حلقة مو سهرة تلفزونية ) تعرض هالفتره وهم اهو اول مسلسل عنه بعد اعادة العلاقات مع العراق ..
الاغلب كان ينطره بيشوف شنو بيعرضون وشلون مسلسل عرض جزئين منه عن قصص حب بيعرض قصة عن الوطن قدروا نوعا ما يركزون ع حب الوطن بعرضه للمقاومة والشهداء والاسرى والمظاهرات وغيره , وكبداية المسلسل كان قوي لي اخر جم حلقة برد والاحداث غصب يمغطونها واخر حلقتين وايد استعانوا باليوتيوب بشكل (ماصخ) نص الحلقه تقريبا بمشاهد مصوره منه ! لشغلات ماتخدم المسلسل مثل فوز المنتخب بكاس الخليج والمسرحيه وغيره (رقعته لهم لما شفت انه المشهد اللي عقبه كان ب2000 قلت يمكن قصدهم عرض اهم الاحداث اللي صارت بالتسعينات ) وهم مشهد فيصل كان دعايه اشكره لتسهيلات ..
ملاحظة : انا موضد الاستعانه بمشاهد من اليوتيوب بس لازم تخدم المسلسل وماتاخذ نص الحلقه بالبداية كنت مستانسه انه استعانوا بمشهد مظاهرة الجابريه بس كثرت المشاهد مثل ماسلفت الذكر خربت اخر حلقتين ..
واكثر شي حبيته بالمسلسل ( فهد& سالم ) وحتى القفاص يونس ..
وفقدت صمود بهالجزء ..
(2)
مسلسل من تاليف هبه حماده يعني مجموعه من المشاهد مو شرط مترابطه واغلبها ذكريات يرويها لنا راوي بس هالمسلسل اعتمدت ع راوي واحد العاده اكثر من راوي تستعين فيه بمسلسلاتها , هالمره بدعت ببعض المشاهد قٌبل ع راس من الممثل و الممثله من طقت بعض فاطمة الصفي ويعقوب عبدالله يعني مو كالعاده ممثل شاب او ممثله شابه للمثل كبير او ممثله كبيره ! (يرقعونه حسبت امه \ابوها) غير شبه احضان :\
مسلسل مااحترمت فيه الشهر الفضيل ولا المشاهد المحافظ !
واختمتها بالحلقه الاخيره بمشهد غير مكتمل وبوعد المشاهد بجزء 2 !!
(3)
حبر العيون هالمسلسل ماتابعته عدل بس بالويك اند اشوف جم لقطه منه ..
بس بدعت فيه هيا عبدالسلام اتقنت الدور ماشاءالله ..
Saturday, August 18, 2012
2:39 AM
قبل فتره نزلت لكم بوست عنه واليوم وانا احوس لقيت انه جم ماركة نزلوا منه ..
اشهر ماركة منزلته اهي Ciaté®
ومسميته :
Velvet Manicure™
وموفرته ب3 الوان ( الكحلي والبنفسجي والرمادي )
وكل صبغ عباره عن ست في صبغ عادي و فرشة والماده اللي تخليه مخملي (البودره) ..
وسعره : 19$
وبالنسبه لطريقته :
اول شي صبغ ينحط كبيس عقب تحطين البودره ع ظفرج بالفيديو البنت غطست ظفرها بالماده او تقدرين تنثرينه عليه مثل الكفيار والفرشه للتضبيط وازاله الزايد من البودره ..
وهذا جم صوره من قوقل عجبوني..
كوول..
لونه هادي ..
فوشي
حلو اللون والغرشه اللي ماسكتها هم نوع مخملي ..
وفي نوع 3 بعلب صغيره شفافه..
حبيته :)
Thursday, August 16, 2012
8:30 PM
قبل فتره كنت احوس بانستجرام ادور طبخات من الشغلات اللي لقيتها لقيمات بس بدال لا يحطون شيره معاها حطوا نستله او جوكلت صوص..
جربتها مع صوص الكراميل وصوص هيرشي ككاو ال٢ ماحبيتهم طعمهم مو زود لو نوع ٢ يمكن تكون الذ واحبها مع الشيره اكثر ❤
- Posted using BlogPress from my iPhone
Wednesday, August 15, 2012
9:30 PM
ذاك اليوم كنت بمحل ميزون دو سنتور ابي اخذ هديه (طلعات رمضان كل للهدايا )
خلصت اخترت الهديه وقعدت افتر اشوف شنو عندهم في فناتق وايد (اغلبهم حطيتهم بالانستجرام )
بس اللي لفت انتباهي هذا ..
لاني احب ريحة التفاح الاخضر شميتها وسالت لشنو هذا قالت يوخر ريحة الزقاير..
اهني التفاصيل ..
ومتوفر باكثر من نكهة ..
التفاح الاخضر..
فانيليا
اوشن ..
تي روز ..
لافندر ..
سعره :1.500 ..
ومادري شلون مفعوله . احد مجربه ؟؟ ماعندنا احد يدخن جدامنا الحمدالله ..
عنوان المحل :
الجهرا, صحاري بس كاتبين ع جيس انه بالسرداب غلط اهو بالدور العادي مادري شيسمونه اللي فيه باب الدخله..
الفنار -الارضي ..
حولي -مجمع بلازا \ مجمع المهلب (فرعين ) بالسرداب ..
الفروانيه :الحمرا مول - الارضي \ العربيد بلازا - السرداب ..
العقيله:البيرق - السرداب \الليوان - الارضي ..
كويت ماجيك - الارضي ..
Tuesday, August 14, 2012
6:22 PM
لانه زادت المعكرونيه اللي كنا مزهبينها لمعكرونيه مع شاورما سويت فيها سلطة:
المقادير:
معكرونيه
خس
ذره
شرايح زيتون اسود
الصلصة:
ثوم
روب كامل
قفشة خل
ليمونه (حطيت ١كامله لانه نحب الحامض)
٢م ك مايونيز
الطريقه؛
طبعا نفوح المعكرونيه بالطريقه العاديه ، ونقصص الخس ونزهب باجي المقادير الصلصه ونخلطهم مع بعض ونصبهم فوق المعكرونيه ونخلط ( يعني الطريقه اخلط وبس خخ خو سلطه)
راينا؛
هم ماذقتها عدل بس طعمها زوين اذا ماخب ظني واختي الوسطيه تقول طعمها احلى من سلطة المعكرونيه اللي نسويه العاده.
- Posted using BlogPress from my iPhone
Monday, August 13, 2012
4:48 PM
المقادير :
شاورما لحم (كوبين) بس اللي حطيته ٣/٤ القوطي (امريكانا)
١ م طحين
١م ص سكر >>> ماضفته
١/٤ كوب صلصة صويا ( حطيت بالنظر اللي يكفي الشاورما)
بصل
ثوم
زنجبيل
مشروم
بهارات
معكرونيه
الطريقه:
نفوح المعكرونيه بالطريقه العاديه مع ماي وزيت وملح..
ونتبل الشاورما بقفشة طحين وصلصة الصويا و قفشة ص شكر (ماضفتها ) ونخلطه عدل ونخليها ساعه بالثلاجه..
-نحمر البصل والثوم والزنجبيل والمشروم والبهارات وماجي (ماذكر اذا حطيت بهارات او لا بس جنه ماحطيت ماجي قاعده انقل الوصفه من انستجرام ! ) ونضيف اللحم لهم ولما استوى ضفت المعكرونيه..
رايي:
توقعت بيكون طعمها حالي ، بس اشوه طلع لا ماذكر الطعم عدل لاني ذقته لقمه او 2 بس عجبني ..
- Posted using BlogPress from my iPhone
Saturday, August 11, 2012
2:12 PM
هالطريقه خذيتها من بتول الكندري حاطتها باكاونتها بالانستجرام (batoul_alkandari@) والوصفه اساسا موجوده بكتابها افكاري في اطباقي ج ٥
المقادير؛
-عجينة الرفيولي الجاهزه ( اهي اختارت اللي بالسبانخ انا اختر فور جيز) وحصلته بلولو هايبر الري ..
الصلصة:
٣قلاصات ماي..
١ قلاص كريمه سائله (كريمة كي دي دي للخفق)
١جيس شوربة فطر ( اللي حطيته كريمة المشروم اتوقع غلط:/)
اهي ضاغت شبنت ١/٢ كوب (ماضفته ماحبه)
وزينته بمشروم محمر ( حطيته بس غرق خخ مو مبين)
الطريقة:
-يخلط الماء مع شوربه البودره ع النار حتى يمتزج جيدا..
-تضاف الكريمه السائله مع شوربه حتى تمتزج ، ثم يضاف الريفيولي لمده ١٠-١٥دقيقه
- يضاف الاشبنت
- عند التقديم يزين الوجه بالمشروم المحمر..
رايي:
بدعت بطريقه توني استوعب بس النتيجه كانت زينه اشوه واخوي واختي الوسطيه مدحوا الصلصه واذا بسويها مره ٢ بغير نوع الرفيرلي ان شاءالله..
- Posted using BlogPress from my iPhone
1:01 AM
الوصفه خذيتها من اكاونت @kitchennoor بالانستجرام ..
المقادير:
-الخضره اللي تحبينها انا حطيت خيار وطماط وزيتون اسود و ذره وخس وزدتها بطاط وماحطيت مثل الوصفه الاصليه لا جزر ولا فلفل اخضر
-برجر
-الصلصة:
صلصة فرنسية+صلصة ثاولزند ايلند
الطريقة:
نقصص الخضره ونقلي البطاط ونشوي البرجر ونقصصه ، نخلط الخضرا مع البطاط ومعاهم الصلصه و اخر شي نحط فوقهم البرغر ، كنت بضيف جبن بس نسيت:/
رايي:
ماحبيت الصلصه حاليه:/اذا سويتها مره ٢ بغير الصلصه لانه كفكره حبيتها..
- Posted using BlogPress from my iPhone
Subscribe to:
Posts (Atom)
About Me
- رورو الشخبوطه
- الكويت, قسم الاعلام:), Kuwait
- بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
انستغرام المدونة (roroalk)
follow me
My Blog List
-
Hello world!1 year ago
-
-
لا تخبئ السعادة فهي قابلة للتبخر.7 years ago
-
حساب جديد معني بإدارة المنزل7 years ago
-
-
-
خطوة أولى نحو الثقافة8 years ago
-
بينكيو تكشف النقاب عن جهاز العرض TK8008 years ago
-
-
مع الخيل يا شقرا9 years ago
-
هل للحزن طقوس !؟9 years ago
-
عدنا إليكم من جديد9 years ago
-
AssASsIN'S CREED9 years ago
-
-
Summer cooling refreshing drink recipe10 years ago
-
فكرة10 years ago
-
I'll be Back Soon راجعين قريبا10 years ago
-
اعرف نفسك10 years ago
-
مشتاقه لقلب طفله .. مشتاقه لي10 years ago
-
VARIETY ON BONUS POKER ONLINE10 years ago
-
كاريكاتير مابعد أسعار النفط10 years ago
-
-
Salmon recipe11 years ago
-
Review: The Martian11 years ago
-
ضيفوني11 years ago
Ads
