شخبوطة كويتيه

Thursday, April 8, 2010

ابراج الكويت :)

11:29 PM

السلام عليكم..

من زماني خاطري اروح ابراج الكويت هالمره تعتبر ال2 خبري فيه ب2003 ايام 4 ث ..

أبراج الكويت هذا المكان الأمثل والتي صممت لتتماشى تصميمها مع معالم الكويت التراثية فالبرج الأكبر والرئيسي والذي يحمل الكرتين يدل على " المبخر " والبرج الثاني الذي يحمل كرة واحدة يدل على "المرش " والبـرج الثالــث وهو الأصغر يدل على " المكحلة " والصحون التي تكسو الكرات تبلغ عددها خمسة وخمسون ألف صحن وهي مصنوعة من الحديد المطلي بالصيني بثمانية ألوان زاهية تناغما مع السماء والبحر . وتعتبر من أهم المعالم السياحية في دولة الكويت وهي تمثل من رموز النهضة المعاصرة ودليل تقدمها وإرتقائها. (منقوله هالمعلومة من سايت الرسمي للابراج ).

وصارله ماشاءالله 30 سنه بس اتمنى يهتمون فيه اكثر ويطورونه ..

الروحه كانت لمكانين اول شي المطعم ..

من ورانا جايونه ماسويه بوفيه :p

وهذي طاولتنا رقم 1..

وهذا الفيو كنا ع ارتفاع 82 م طلعت من الاصنصير اذني منسده جني راكبه طياره :\

وعقب ماحطينا قشنا ع طاوله هجمنا ع البوفيه..

ركن المشروبات ..

في جاي ونسكافيه وعصير برتقال وعصير اناناس..(حسب اللي شفته)..

بعدين الاكل سوالف لبنه و انواع الجبن وتريكي ومرتديلا و خضار .. والخ..

فطاير ومكدوس ..

كورن فلكس و مربى وروب فواكهة وتوست وخبز والخ..

فجاءه طلع السويت حسبالي خلص البوفيه..

طلع لا وهذا جزء من اخر شي..

اكلنا ..

طبق رفيجة اختي..

طبق اختي وفيه فلفولتي ..

فول للبنات ماذقته..

طبق مشترك..

شوربتي ..

طبقي قبل ..

طبقي بعد مع مشاركة بسيطه من اخيتي..

وقعدت اصور رايحه اصور ما اكل خخخخ..

اهني لما خلصنا نزلنا صوب الكافيه وهم قعدت اصور لقيت اورغ او بيانو المهم كنت بطربهم بس خفت ينظلوني :p

عقب قصينا تذاكر للكره الكاشفه اول مره ادشها ..

واول مادشينها كانت في لوحات عباره عن صور تبين مدى الدمار اللي حاش الابراج ايام الازمه الله لا يعيدها يارب..

هني منظر الابراج يدوخ ..

والمدينه المائية خبري فيها ايام الابتدائي :)

وهذي مجموعة 2 من الصور عن اثار الازمه ..

يلا نصد ونستكشف فوق ..

وصلنا شوف احنا وين وشكثر بعاد عن الارض..

الارض قسمين صوب يتحرك القريب من الجام وال2 ثابت انا كنت واقفه ع اللي يتحرك فجاء استوعبت انه يتحرك حسبالي بيطح البرج كنت بشيل الابراج بصراخي بس اشوه ثبت ع هالشي قبل لا يحوش الابراج دمار 2 بعد اخاف مااموت يبلشوني صلحيه..

ورفيجة اختي الذكيه اقولها هالمكان يتحرك تقول لي لا @@

المهم رحت اطل بالمنظار..

ولا انصدم من هالعباره قطع ماكو شي بلاش خخ..

عاد رحنا الكافتيريا نشتري ..

خذينا 2 وحده لي وحده لاختي رفيجتها ماتبي تقول تدوخ :)

ومايمدينا نشوف شي لا مسكر المنظار ماتوقع يوصل وقت المشاهده 5 دقايق امبيه شنو هذا ع الاقل ربع ساعه نشوف جم منظر ..

وفي كشك يبيع سوفنير ..

بوك مارك وكروت..

يونس..

حبيتهم حسافه ماخذيت منهم :\

وبس خلصت جولتنا :)

Labels: اكل, جولة مكوكية |

28 comments

Wednesday, April 7, 2010

velvet touch

10:56 PM

السلام عليكم..

طلعت لكم صور بايته من جهازي صار لها قرن :\

قبل فتره كنت احوس بالجمعيه بقسمي المفضل الكريمات وهالسوالف عاد لقيت هالشغلات اول مره اشوفهم بس مااعتقد انهم يدد..

اول شغله لفتت انتباهي اهي هذي ..

بما انه غرامي الاظافر وماحب ايدي من غيرهم احسها قرعه خخ..

فلما قريت اللي ع هالعلبه شدتني بس جيكت ع اظافر طلع مافيهم ولا شرخ الحمدالله فرديت ماخذيته ..

المكتوب عليه :

الضمادة السحرية للاظافر ..

مع طقم ادوات العناية ..

الطريقة الجديدة لمعالجة وحماية الاظافر من التشقق والتقصف

شفافه غير مرئية - تدوم لايام عدة و لاتتاثر بالماء - اصلاح فوري للتقصف ..

واذا ماخب ظني محددين مدة العلاج بس اللي ردني انه اخاف تكون عازل عن الماي مثل صبغ الاظافر فمايصير نحطها ونتيدد :\

احد جربها ؟؟

****************

*هالشغله اول ماشفته طاحت عيني ع صورة الريال قلت ويع منتج لازاله الشعر للرياييل قطع خخ عقب استوعبت انه لكعب الريل ..

هذا انا جربته مريح و خفيف كاستخدام و التخزين و تنظيفه سهل ..

في عندهم اكثر من منتج لازالة الشعر جربت واحد منهم وللامانه غير المعروض اهني وماعجبني بس مره وحده جربته وخليته ..

بهالسايت في مميزت هالمنتجات ومقارنتها بمنتجات الازالة الشعر التقليدية ..

وبس سلامتكن ..

Labels: beauty, اظافر |

20 comments

Tuesday, April 6, 2010

ماكنتوش :(

4:25 PM

السلام عليكم ..

اليوم اختي الوسطية ورفيجتها يابولي ماكنتوش خخخ انا احبه وله ذكريات حلوه اول لما كنت اتفوق ايام الابتدائي لازم اوزع ع الناس ماكنتوش عقب كل شهاده .

فاختي قالت لي غمضي وراحت تطلعه من الجيس قلت لاه شفته (حسبالي حركاتنا قبل ع ابو مفاجئة غمضي عينج ومدي ايدج خخخ) المهم قالت لي لا غمضي ولفي ويهج ماوعيت الا حاذفه علي الككاو اح منو مطلع سالفة النون !! ترا تعور خخ ذكرتني هالحركه هم بالابتدائي بس هالمره بالتكريم قلت لكم هالسالفه من قبل هون (كان الموضوع في وايد ردود مادري علامه اونكل بلوق زعل علي وحذف كل الردود اللي بالمواضيع القديمه :(

الزبدة نرد لموزوعنا اللي استجد علي انه منزلين انواع يديد .. حطيت نيشان عليهم بس مو مبين لانه الصوره صغيره:\

هذيل اهما انا ذقت البنفسجيه بس حاسة التذوق خافه عندي حلجي صاير جنه عيادة اسنان احس طعم الدوا اقوى من الاكل فما استمتعت فيه ولا اقدر اكل ع راحتي اهي اهي يالله كله بسبيل الجمال :)

وطعمها احس مو يديد مار علي خخ طبعا مو طعم الادوا لا احس قريب من طعم المثلثه الخضرا او جواهر جلكسي شي جذي << اذا طلع طعم غير طوفوا خخ..

الصفرا(شكولاته بحشوة اللوز المقرمشة ).

البنفسجيه (شكولاته بكريمة البندق)

بس الصدمه الككاوتين اللي احبهم انقرضوا اهي اهي احب الحمرا ام فراولة والبرتقاليه ام البرتقال ولا وحده موجوده ليكون قطعوهم بعد :\

وبس ..

مرسي اخيتي مرسي صقيقة اخيتي تعيشون وتيبون لي يارب :)

Labels: اكل |

24 comments

Monday, April 5, 2010

طق يامطر طق

9:47 PM

السلام عليكم ..

اليوم اول مابطل باب الطلعه من الدوام طق مطر وناسه ..

احنا الطريج طويل وهالمره مطر فلازم نمر بشوارع حلوه جنه استغفرالله ناقصنا , هالشارع او بالاحرى دوار توه يديد اعتقد سوه باخر سنه لي بالجامعه ب2008 تقريبا وشنو ماحبه زحمه الصبح و غيله بايام المطر مكانه غلط والمفروض مدام يديد يكون الشارع زين مو جذي :\ بس المفروض غير الواقع..

اخليكم مع الصور ..

اهني وهقه في سياره طبعت وصاحبها يدزها كسر خاطري وعليه لو جوتي مو خام وماستحي جان نزلت اعاونه :\

اهني اوضح..

يبيله سياره برمائيه ..

واهني اخر صوره والحمدالله عديناه بدون خساير ..

نبي حل مو كافي طريج طويل وزحمه !!

كانت معكم من ارض الحدث ..

رووووووووورو :)

Labels: شخبوطة |

40 comments

Sunday, April 4, 2010

توحيد اللون

11:46 PM

السلام عليكم ..

من اول اهدافي من اهتمامي بنفسي بالنسبة للعناية بجسمي اهي توحيد لونه والمحافظه ع نعومته لانه الجفاف يساعد ع اسمرار الجلد ..

شغلات بسيطه وجربتها وحسيت انه له نتيجه ..

(1)

صابونة الشبه من بيت الصابون اللبناني ..

نتيجتها قد تكون بسيطه بس لها فايده ,وهم ريحتها مع عنها عاديه بس احبها بالنسبه لاستخدامها اكثر شي استخدمها لغسيل كوعي قبل لاانام ساعات بس بالليل ساعات قبل لا اقيل ..

ومثل ماهو مكتوب ع علبتها طريقة استخدامها : للوجه والجسم ترغي صباح او مساء وتترك دقيقتين حتى تعمل ثم تشطف بالماء .

انا كنت اخليها وافرش ضروس و اغسل ويهي و عقب اغسلها يكون مروا الدقيتين او اكثر.

صورة لكم البرشور عساس تشوفون شكلها من داخل لانه رفيجتي عطيتها صابونه مثل شكلها بس نوع 2 تقول شنو هذي بطاطه خخخ.. << عذروها من جيل انا اكل :p

المكتوب في الصفحه :صابونه نباتية غنيه بزيت الزيتون المغذي , الشبه وملح اللبن (هذول نباتين !!), لتبيض الاماكن الداكنه من الجلد وتوحيد لونه وكذلك التنعيم وشد البشره .

(2)

كريم بريتي تفتيح الركب والمرفق من خلاصة زيت قشر الرز وفيتامين e..

حسب ماهو مكتوب لجميع انواع البشرات..

مكتوب ع العلبه حسب اللي اذكره يستدم مره باليوم ولنتائج افضل مرتين و تبين النتيجه عقب 4 اسابيع وحاطين صور قبل وبعد ..

وسعره تقريبا 890 فلس محصلته بجمعية الفيحاء وخذيته طبعا بناء ع مدح بنات :)

*رايي فيه :

استخدمته لمدة شهر تقريبا او اكثر ليما خلصت العلبه , النتيجه هم بسيطه ومو ناويه اشتريه مره 2 واكبر عيب فيه انه لما اتدهن فيه تظل مثل الطبقه الشهبه ع الكوع نفسه بحيث يبين ابلق ومو سهل تروح يعني عادي اتم لي اليوم ال2 الصبح ..

(3)

الصابون التونسي ..

جربت نوعين منه :

*بالنيله الصحراوية ..

وايد حبيته من 2 مره حسيت بنتيجه حلو ماشاءالله احس اهو التوب بمجال التوحيد اللون وخصوصا لكوعي لاني اركز عليه ..

*وجربت بالعكر الفاسي ..

عادي وماراح اخذ منه مره 2 ناويه اخذ اللي بالليمون وبالاركان هالمره ان شاءالله..

هذي تجاربي البسيطه ..

دوركم الحين :)

Labels: beauty |

32 comments

Saturday, April 3, 2010

شخبوطيات

10:42 PM

السلام عليكم ..

ودي اكتب بوست وماعندي شغله معينه اكتب عنه يمعت لكم جم شغله اسولف لكم عنها ..

(1)

اول امس اختي الكبيره يابت لي هالكوكيز خخ اهي مادتش بلوقات ولا قلت قرأت بوستي اللي عن الكوكيز ويابت لي اياه ..

وهذه القوطي واهوميني وطعمه حلو وخفيف بس مو طعم الكوكيز لا ع قولت اختي الوسطيه مو عينة (عجينة) الكوكيز عينة البسكوت العادية..

(2)

يوم الاحد اللي فات عقب ماسويت مسمار اللحم مريت سوق شعبي ابي طشت :)

عاد شفت هالقطوه مرتزه عند الكاشير قلت حلو خل اخذه لسمسومي يحب القطاوه .. واهي لي عصرتي ايدها مره تغني ومره تطلع صوة مواء القطاوه..

اليوم كانت انا واختي الوسطيه نتناقش واهي يمنا وبالغلط اهي جاستها جان يطلع حس القطوه اهي فزت زين ماطبت بحظني وحذفتها خخخخ..

واعرفكم ع حارسي الشخصي بوبي والاجر ع الله خخخ..

يبته لليهال خافوا منه قلت استغل هالشي واخليه يحرس لاب توبي بغيابي من هجومهم المباغت البربري ..

اهو طريقته يمشي وفجاءه ينقز اليهال من ينقز يفزون وسمسم بعد يركض من الخرعه خخخ.

(3)

الاسبوع اللي فات مريت نيو لوك عجبتني هالشغلات ..

شنو العامل المشترك بينهم ؟

Labels: اكل, شخبوطة, شخصي, مشتريات |

29 comments

Thursday, April 1, 2010

جمان لعلياء الكاظمي

8:44 PM

السلام عليكم ..

الامس انتهيت من قراءة هذه المجموعه القصصيه التي حصلت عليها مصادفة من صديقتي فقد طلبت منها ان تحضر لي رواية المنتظر لعبدالله المضف فاحضرت لي هذا الكتاب بدلا عنه خخخ..

وكما هو موضح على الغلاف فهي بعنوان جمان للمؤلفة علياء الكاظمي ..

و الكتاب عباره عن مجموعه من القصص ليست بالقصيره فكلها قد قارب عدد صفحاتها الـ100 صفحة او تجاوزها ..

وهي بالتحديد 5 قصص:

الاولى : حنين واشواق ..

وهي قصة شقيقتين الكبرى هي حنين واما الصغرى فهي اشواق انفصل والديهما بطفولتهم نتيجة تعرض والدتها للضرب من والدهم بالاضافه لاستهتار الاب وعدم انضباطه , ومالبثت الام ان تزوجت من رجل اخر بعد حصولها على الطلاق وتخلت عن ابنتيها .

تكبر الفتاتين فتتزوج حنين من كريم جارهم دكتور الاسنان بعد علاقة حب طويل فانجبت منه 3 بنات لتظهر في حياتهم شهد مهندسه جميله شابه في ال23 من العمر وهي من عائلة فقيره واحبت كريم وتقربت منه !!

اما اشواق فتتزوج من طارق شقيق صديقتها الذي جمعتهم علاقة حب بعد لقائهما في الكليه لكن بسبب ظرف معين تنفصل عنه..

القصة الـ 2: عند تعود الافراح ..

قصة فتاة يتيمه تدعى فرح جمعتها علاقة حب بعمران واتفقا على الزواج بعد تخرجه لكن تأتي الرياح بما لا تشتهي السفن ..

القصة الـ3: الضرير ..

وهي قصة شاب ولد ضرير ولكن تميز بحبه للموسيقى مما ادى الى اشتهاره في مجال التلحين وعندما بلغ ال30 طلبت امه منه الزواج لتختار له فتاة يتيمة الام هي ابنة احد العاملين بمصنع والده وقد اتصف والد الفتاة بشحه وبخله وحب للمال .

والجدير بالذكر ان هذه الروايه تم نشرها بمجلة اليقظة على شكل حلقات ..

القصة الـ 4 : غالية..

بطلب من مركز الاشراق للفتيات تمت كتابة هذه القصة للمراهقات .

لذلك فان ابطالها هن مجموعة من المراهقات في الثانويه :

فجر : فتاة الخلوقة المجتهدة..

غاليه :ابنة عم فجر وصديقتها , فتاة وحيدة ومدللة.

اوراد :معجبة بغاليه تتبعها كظلها وتستشيرها بجميع امورها.

فجر :طالبه مجتهده تميزة بجمالها الخارق (ابد تشابهني خخ) وصاحبة مبدأ (موقلت لكم مثلي :p)ابنة لام كادحه تعمل بالخياطة ووالد ميسور الحال لكنه بخيل جدا .

وكباقي القصص للحب دور في القصة ودور اساسي فغاليه احبت نواف اخو اوراد ..

القصة الاخيره هي جمان :

والجمان يعني اللؤلؤ ..

وهي بطلة القصه فتاة جميله مدللة احبت ابن خالها هشام وتزوجا , ولم تكن وحيده بل لديه شقيق يدعى فواز وشقيقة تدعى رزان تكبرها باعوام تزوجت من دكتور وتعرضت لخيانته وسوء معاملته و انجبت منه بالبداية اكثر من بنت ..

بالنسبه لي هذه القصه هي الاسوء لعدة اسباب اهمها ان احداثها مكرره اختان علاقتهم جيده احدهم تتزوج دكتور و في البداية لا تنجب الا البنات وتسعى لانجاب صبي وتتعرض للخيانة ولا تتطلق تقريبا مثل القصة الاولى حنين واشوق :\ والاخت ال2 تتزوج عن حب و من ثم تنفصل بسبب سوء المعاملة ..

اما الاحلى فهي الاولى , عموما لا تستهوين قصص الحب وعلاقاته :\

*عبارات اعجبتني :

-من القصة الاولى هذه العبارة بصفحة 136: ان التركيز سر النجاح , وان العقل ان لم نشغله بالايجاب شغلنا بالسلب.

-خخ العبارة الثانيه طلعت نفس الاولى :p

وهي من القصة الخامسه حتى العبارات طلعت مكرره خخخ بصفحة 460 اشغلي نفسك فالعقل ان لم تشغليه بالايجاب شغلك بالسلب .

Labels: قراءه |

14 comments

ابراج الكويت :)

velvet touch

ماكنتوش :(

طق يامطر طق

توحيد اللون

شخبوطيات

جمان لعلياء الكاظمي

About Me

ايميل المدونة :)

Labels

Followers

Blog Archive

انستغرام المدونة (roroalk)

follow me

My Blog List

Ads