تجربتي لـ nails work اول سبا للاظافر بالجهرا ..

واخيرا قدرت اشبك صارلي جم يوم مو قادره :(

 

المهم اليوم بقولكم عن تجربتي لاول نيلز سبا بالجهرا وجربناه انا وخواتي الصغيره والجوز ..

 

وهذا رابط البوست اللي كتبته عنه قبل في خدماته ككل ..

 

تجربتنا ..

 

صادف قبل روحتنا بيوم كنا بالمجمع فمريناه نسال وحجزنا ع الساعه 2 عساس يمدينا نروح استقبال اختي مبجر ..

 

وصلنا 2 بس الستاف ماكان ياي :\ يعني السبا مو مبطل اتصلت عليهم قالوا انهم بالطريج واشوه مالطعونا ..

 

 دشينا وضبطوا لنا المكان ..

 وهذا جزء من العده اللي استخدموها لي ..

 

والكريمات عندهم انواع وايد انا كان رمان وخواتي اعتقد عسل وحليب ..

 

كنت مختاره النوع العادي بديكير ومنيكير شامل سنفره وكريم وتعديل الاظافر وصبغ ومساج وتفرك ..

وزدت عليهم ماسك << سعره يختلف ..

 وهذا اللي نقعت فيه اظافري ..

 وهذا عقب ماخلصت نشفت فيه الصبغ ..

 

قلت لهم مااحبه خدر اصابعي وانا اضغط عليه جان وحده منهم ياحليلها يت تضغطه لي << حبيت

 

وهذي النتيجة ..

 

وبالنسبه للاسعار :

 

ع حظنا كان عندهم عرض ..

 

اهو البديكير ب7 والمنيكير ب5 والماسك بدينار للايد ودينار للريل ..

 

بس مع العرض صار المنيكير والبديكير والماسك كله ب7 يعني نص السعر..

 

والتوتل انا وخواتي 2 بديكير و3 منيكير =17 د.ك ..

 

رايي :

 

الشغل زيين والهنديه تشتغل بضمير خخ بس نبوها لا تجرحكم عورت اختي الجوز من كثر الدقه بس اختي حابه شغلها ولي رحنا مره 2 بتطلبها اهي بالاسم تسوي اظافر ريولها ..

 

الستاف خدوم وونيس ..

 

مكانه يميزه فكنا من عنوة الطريج ..

 

الاسعار وايد زيينه والعرض عجيب ماشاءالله ..

 

الادوات المستخدمه ماركات متخصصه بالعناية بالايد والريل ومن بوتس  مو سوالف المنصور او بو طقه ..

 

بس اللي ماحبيناه اللون الوردي ع الاظافر ..

 

وماعندهم كي نت ..

 

بس برد اجربه مره 2 بجرب الايسكريم وبرسم ع اظافري ان شاءالله ..

 

ساعات العمل :

 

بايام الاسبوع يبطل الساعه 2 ..

 

واليمعه من 10 لي 10 ..

 

العنوان :

الجهرا مجمع صحاري السرداب 

 

ت: ٦٦٩٦٩٢٢٦

 

الانستغرام : nailsworkkuwait