Wednesday, May 3, 2017
السلام ..
 
هم هم البوست توثيق لسناباتي ..
 
بالويكند نزلت بوستات عن الكعوبه اللي احبها واكثرها كانت لبايليس المعرف بمحل ابو الكراتين انا حسبالي بس انا اسميه جذي خخ..
 
هالمحل وايد احبه ..
 
لعدة اسباب باختصار  رخيص وكويس ..
1- اسعاره مناسبه وغالبا عنده عروض انا احب العرض الكل شي ب5 يصير :P
 
2-موديلاته حلوه ومرتبه ماشاءالله ..
 
3-اغلبهم مريحين واذا مو مريح يكون عواره المقدور عليه...
 
البوست بيكون جزئين اول شي لجديدهم عقب بعض تجاربي ..
 
# التشكيله الجديده :
 
 
 
 
 
مادري ليش تخترب الصور :\
 
المهم سعره ب15 دك
 
 
حبيت وفي منه لونين هم سعره 15 دك ..
 
 
هذا لقطه من فيديو وكالعاده ماينزل الفيديو هني :\
 
 
هذي صورته اوضح من سايتهم وهم سعره ب15 دك موحدين السعر الظاهر خخ..
 
هذا من اكاونت بانستغرام مسويه هاش تاغ لهم اسمه #nona_payless
 
وايد شكله مقارب لكعب سان لوران الكلاسيك ..
 
 
 
وهذي الصوره من سناب صديقتي الالكترونيه ..
 
 
#بعض تجاربي ..
 
كعب ابلتي بالمتوسط ماشريته بس قايست الاسود بالمحل وكان اللي مقاسي يعود من جدام والاكبر من مقاسي بنص وسيع قلت له سوو 3\4 طالعني منصدم قلت دعابه ..
 
 
هالكعب رزه عادي مو مريح ولا يعور بس احبه ..
 
 
 
هالودج  جيكر بس مريح حده عادي اروح فيه الافنيوز من داخل جنه فيه مخده من كثر ماحبيته خذيت من لونين ..
انا عندي الكعب عشان يصير مريح لازم ارتفاع معقول وهم من جدام يكون مرتفع شوي + القالب مايكون صلب او اطرافه حاده هالشي لاحظته ببعض الكعوب اللي تكون خام مو يلد\جلد ببايليس ..
 
هذا الحب ديالاي مريح حللته شتا 2016 ووااخر شتا 2015  لانه ماحب البس جواتي وانتوا بكرامه مسكره الا بالشتا الصيف احب الموديلات اللي فوق مو الصندل لا بس اصابعي تبين :)..
وشكله مرتب ميكس بين ديور وشانيل العام اظن نزلوا مثل ودج انزلكم صورته عقب ان شاءالله ..
 
 
وطبعا تجاربي شخصيه يعني اللي ناسبني مو شرط يناسبج اختلاف مقاس الريل وشكلها ومدة الاستخدام وغيرها من شغلات تفرق بينا ..
 

افرعه :
بالافنيوز بين فيز1 و2 يم بروي وجبال كارفور..
العقيله بذا قيت ..
بالجهرا باوتاد السرداب .
وايد جمعيات تحصلون التفاصيل بهالسايت link
 
سايتهم احب ادشه اشوف شنو جديدهم بس ماطلب منه ومادري اذا يوصل او لا ..
 
 
وبس شكرا انا
Tuesday, May 2, 2017
السلام ..
 
عسى الله يتمم علي نشاطي ..
 
بدوامنا او دوام يرانا كانوا بالشتا كل خميس ايبون كاترينغ لكافيه او مطعم ..
 
اول مره شفتهم سوو هالحركه كانت لدوز كافيه ..
 كالعاده قلت له ابي قهوه حاره حلوه قالي هذي وطالبتها مادري شسمها ..
كان فيها حليب وكارميل وملح هذا اللي ثبت عليه ..
 
رايي:
 
الصراحه ماحبيتها  طعم الملح طاغي :\
 
دوز مكانهم الاساسي بالديره  بشارع مبارك الكبير ..
 
باكاونتهم بانستغرام حاطين اللوكيشن ..
 
هذا اكاونتهم @dose_cafee

Monday, May 1, 2017
السلام ..
 
من زمان مو متفنتقه باظافر بعي ميلادي يالي فاوتشر اظافر ( منيكير وبديكير وماربل )
 
الحين هبة الماربل (الرخام) بكل مكان منتشره بالفاشن (ملابس واكسسورات ) بالديكور وحتى المعين والبيوتي بعد هبة الاظافر ..
 
 
الفوتشر كان بسبا لي لي اند دي ..
المفروض فيديو بس ماضبط  المهم الماربل عندهم نوعه الجليش (جل) ..
الجليش اهو الصبغ اللي يتم تقريبا 10 ايام مايتقشر او يخترب وله تكنيك معين جهاز + صبغ خاص ..
ومايروح بالاسيتون العادي لا لازم صالون لانه طريقه معينه ومو بلاش :\ خخ المهم طريقته انه قطن متروس اسيتون ينحط ع الظفر وينلف بقصدير ويتم تقريبا ربع ساعه عقب يتشلع :\>> هذا عيبه الوحيد انه لازم صالون او بالبيت للي متمنكنه انا اخاف ع اظافري رحت الصالون وغصب لقيت صالون بالجهرا يشيله ..
 
 
 
 
واهو يكون رسم ومتوفر باللونين اسود وابيض (البيس او القاعده ) انا اخترت كلهم بيض الا ظفر واحد اسود..
 
 
 
حسافه الصور مو واضحه :\
 
وايد حبيته وكستاف وايد حليوين ماشاءالله حتى صاحبة السبا ماقصرت معاي..
 
على طاري مو اول تجربه لي بهالسبا جربته قبل جم سنه ونزلت لكم عنه هني
 
وشفت بنات مجربينه بصالونات ال2 ماياز لي كثر صبغي طبعا انا اللي محليته :p
 
والقالب غالب ..
 
وبلوقي عادي اطير عمري فيه خخ..
 
عنوان السبا ..
 
بالديره مجمع الغوالي بالسرداب ..
 
جبال الرايه اذا ماخاب ظني المهم ذاك الصوب..
 
انستغرامهم ..
 
@lilyandd
 
Sunday, April 30, 2017
السلام ..
 
الاسبوع اللي فات نزلت بسناب بوستات عن هبه القهوه والكفيهات اللي جربتها ..
 
وكالعاده اذا عجبتني سناباتي احولهم لبوست ببلوقي يعني اوثقهم بارشيفي الخاص..
 
لانه الذاكره مييح يالله من فضلك ..
 
كنت ناويه انزلهم كلهم بوست واحد بس عقب مانزلت صوره القهوه وصديقتي الالكترونيه هديل مدحت اجواء الكافيه تذكرت اني مصوره وايد صور له بسنابي الخاص لما رحت له فقلت يسوى انزل بوست خاص ..
 
مالكم بالطويله ماعتقد في اطول من جذي خخخ .. 
 
نبلش بالمكان  
 
الحلو بمكانه اول شي انه في ساحه يعني تسفطون ع راحتكم مو بنص الشارع :\
 
  الكافيه عباره عن دورين ..
 
الدور ال2 ..في اوت دور-قعده خارجيه
 
وهذي القعده الداخليه الحلو فيه انه الطاوله فيها بلاكات كهربا وايد مفيد ماشاءالله
 
 
 
وهذي لقطه للدور اللي تحت ..
 
 وهذا طلبنا ..
انا اذا رحت اي كافيه اقولهم ابي قهوه حاره حاليه- حلوه اهما يرشحون لي ماحدد طلب معين ..
 
 
يابلي قهوتي قرعه !!
جان اروح واخليه يكتب قلت له اكتب اول مره بس الظاهر ماثبت ومدام خاطري وانا رايحه لانه ابي يكتبون لي عليها فرحت قلت له ..
 
 

 
الاسعار :
كنت معزومه فما ثبت ..
 
رايي:
المكان هادي انا رحت له الصبح وشرح واجوائه مريحه واتوقع ينفع للي يحبون يدرسون بالكفيهات ..
ومثل ماقلت فوق الساحه اللي جدامه زينه كمواقف ..
اما طعم القهوه فعادي ..
 
عنوانه :
بالديره صوب الكنيسه
 ..
وهذا اكاونتهم بالانستغرام :
@musecoffeesphere 

Monday, April 3, 2017
السلام ..
 
كالعاده ولهانه ع بلوقي وعندي وايد سوالف بحاول انظم وقتي الصبح وانزل بوستات احب اذكر تجاربي هني كارشيف لي متى ماحتجت ارد له ..
 
اليوم تجربه بيوتي وهالشي هم فاقدته مع انه وايد احبه ..
 
امس جربت شي وايد حبيته ماشاءالله اهو ..
 
اهو :VITAMIN RECHARGE
PEDI IN A BOX DELUXE 4 STEP
 
منتج للعنايه بالقدم تقدرون تقولون بديكير منزلي ب 4 خطوات موزعه ع 4 منتجات كل منتج بمغلف  بنكهة الجريب فروت..
 
المغلف يكفي اكثر من شخص انا استخدمته مع اختي وماخلص ماشاءالله وهم كنت احط وايد مو اللي متجيعصه ..
 
ولو باستخدمه بروحي الباجي بفرغه بعلب للمرات اليايه ..
 
 
 وخطواته الاربع اهيا محتوياته :
 
  •  Sea Salt Soak - ملح لتنقيع الريل ..
  •  Sugar Scrub- سنفره ..
  •  Mud Masque- ماسك
  • Massage Cream- كريم ..
  •  
    ماياخذ من وقتج ثلث ساعه (20 دقيقه ) ..
     
    1-تنقيع الريل 5 بالماي + الملح  دقايق او كثر ماتبين ..
     2-السنفره تفرك سريع
    3-و الماسك من 3-5 دقايق  ..
    4- الكريم نفس السنفره مايحتاج وقت ..
     
    بالنسبه لقوامهم ..
    - الملح عادي ناعم مادققت فيه بس مو اللي صلب وكبير ..
    - السنفره اقرب للجل مع حبيبات وسط لا ناعم ولا خشنه ..
    - الماسك كريمي ..
    -الكريم خفيف ويرطب ومو ثقيل او دبغ ..
     
    سعره :
    3 دك ..
     
    وين حصلتها ؟؟
     
    وحصلتها بوتيكات تعرفون اماكن 2 توفرها ؟؟؟
     
    رايي :
    وايد حبيتها وبتكون هبتي اليديده كل اسبوع باستخدم واحد..
    نتيجه حلوه ماشاءالله لاحظتها من الخطوه ال2 والفرق اكثر من 70% ماشاءالله (كنتيجة نهائية ) انا ريلي بسرعه يبين فيها الجفاف والتشققات وهذا تبارك الرحمن خففهم حيييل يعني لو مسويه تفرك سريع بالاداه جان النتيجه بيرفكت ..
    استخدامه وايد سهل ماياخذ وقت ..
    حبيت بعد حجمه حلو للي مثلي تحب تنوع وتجرب وتكود ..
     
    وفي منه انواع 2 تفرق عنه بالنكه تنقال نكهه ! او بالخطوات ..
     
    في 3 خطوات بدون الملح وفي 6 خطوات زياده مزيل كالوس ع قولته يعني الجفاف والاماكن الصلبه يبيله + مرطب ..
     
    هذا سايتهم الاساسي : LINK
     
    Monday, March 27, 2017
    السلام ..

    المفروض انزل الجزء الاخير من معاناتي ..

    بس اهيا مستمره ..

    وهم هالفتره مو حابه اتكلم او افكر بهالموضوع وايد يتعبني ! وراده انتكس ...

    وفي استفسارات مزعجه حييييل  بانستغرام تطلع لي خاص و تعلق تحت كذا صور وبسناب برايفت صوت وكتابه لدرجة اتصلوا على اختي اوك تعبانه الله يشفيج بس الحنه ماحبها اوفر !!! تعالي بيتنا بعد  وهم ارد عليها انه مو حابه اتكلم واغلب المعلومات حطيتها ودكاتره بيفيدونها اكثر ماكو فايده ! واول وتالي من حاله لي حاله يفرق ومن عمر لي عمر يفرق ..

    من جذي ولاني مو حابه اتكلم الموضوع باعتبره مسكر واعتذر عن الرد عن اي شي يخصه كتبت اهم التفاصيل ..

    وعند منو عالجت ..

    د. مساعد العصفور اهو اللي شخص حالتي عقب سنتين ونص من معاناة ..
    د.باسل السميط اهو اللي سوا عمليتي الاولى المنظار (جراحه ) وتابع حالتي عقب ..
    د.جابر العلي سوالي منظار ال2 النفخه ..

    كلموهم اذا حابين خوش دكاتره بيفدونكم ان شاءالله ..


    وعناوينهم تحصلونهم بقوقل لانه راجعتهم قبل سنتين ونص جريب ال3 فماعندي كل التفاصيل عنهم ..

    السموحة..
    Sunday, November 20, 2016
    السلام ..
     
    قبل شهر بسناب وهني نزلت لكم هالبوست جولي شيك vs زارا
     
    وهو عن قطع زارا مقلدها جولي شيك ..
     
    وعساس ابري ذمتي بنزل هالبوست وهو نفس الرد على البوست الاول خصوصا عقب ماجربت جم قطعه منهم ..
     
    بسم الله نبلش..
     
    (1)
     
    اول قطعه جربتها هذي ..
     
     
    وقلت لكم اني طالبتها بالبوست اللي فات ..
     
    ووصلت ولبستها مرتين ..
     
    كخامه خفيفه وشويه الوان باهته بس زوينه تمشي الحال  وبلبس زينه..
     
    اللي عاجبتها تحصلها هني ..
     
    (2)
    هذي عاد كنت ميته عليه ..
     
     
    في من ريحة الحبايب ..
     
    طلبت طلبيه كامله عشانه :\
     
    نطرته يصير بالعروض الموقته = الفلاش سيل (بشرح لكم عقب شنو يعني فلاش سيل)
     
    واشوه مااستعيلت عليه ..
     
    انا عاجبني علبو انه خامة شانيل فتخيلته مع سكيني اسود وقلب لولو وجنظة وكعب اسود (يفضل شانيل موشرط اهيا بس اذا متوفره نحللها )
     
    لما وصل ولا خامة اقرب للستان ومطبوع عليه ستايل خامة شانيل !!!
     
    هم باللبس اشوه زينه :\
     
    اللي تبي تطلبه تحصله هني ..
     
    (3)
     
    هذا مادري اذا تبع زارا او لا ..
     
     
    بس هذا الشي الوحيد اللي اقول لااااااااااااااااااااااااااااااااااااااااااااااا تاخذونه ..
     
    صج الناس اذواق بس هذااااا ضيم ,,
     
    تخيلوا اول مابطلت الجيسه انصدمت ماعرفته اساسا قلت انا مو طالبه مايوه اسلامي !!
     
    عقب عرفته من الصوره اللي ع جيس !
     
    ضيم الخامه بيزو بيزو لا الخامه الردي النايلون !
     
     
    اللي تبي مايوه تاخذه لا تطلبه مقدم مالي هديه وفوق حبة راس بعد خخخ ودعوه من قلب .. اللي عندي اسود لو احمر جان منهاره خخخ ..
     
    كاهو هني
     
     
    * العروض المؤقته = الفلاش سيل*
     
    اممم هذي عروض يوميه تتغير كل جم ساعه ..
    لحظه اطلع لكم مواعيدها ..
     
    كل يوم فيه   تقريبا 3 عروض..
     
    عرض الساعه 7 مساء وعرض الساعه 10 بالليل وعرض الساعه 12 بعد منتصف الليل ..
     
    شنو فايدته اهي القطع تقريبا فوق 100 قطعه يصير عليها خصم ساعات يوصل فوق 50% يعني مره لقيت جاكيت كان 27 تقريبا صار ب7 !
     
    واغلب القطعه تصير ب2 و3 ..
     
    فتطلبين باقل الخساير يعني ب3 ويطلع مو حلو احسن من 10 !
     
    وكل وقت القطع تغير وكل قطعه في منها كميه محدده بالعرض ..
     
    في قطع تتكر وفي قطع لا !
     
    اسعار القطع حتى بالعرض مو ثابته كل عرض غير ..
     
    يعني القطعه ال2 اللي نفس اللي من زارا مره لقيتها ب2.700 دور الاسبوع بالعروض صارت ب3.900 دك ..
     
    طبعا العروض تكون موجوده قبلها بيوم بس اسعارها ماترخص الا لما يصير وقت العرض ..
     
     
    * الشحن*
     
    مجانا اذا فوق 30 دك ..
     
    بس اذا تبين الدفع عند الاستلام تدفعين مبلغ معين  اهو 3 دك  زياده سعر طلبيتج ..
     
    واذا وصل تدفعين اول كان 4 الحين ع حسب الجمارك ..
     
    *التسجيل *
    سهالات بس اتبعي الخطوات ..
     
    وبس ..
     
    كل اللي اعرفه قلته :)
    Sunday, November 6, 2016
     
    باخر شهر 10 نزل الفيلم الهندي بالسينما ..
     
    وانا اكثر شي احب بالسينما الافلام الهندي وافلام الرعب عقب الكوميديا ..
     
    الهنديه نحلل سعر التذكره الرعب اجوائه احلى بالسينما الكوميديا بكل مكان حلو سينما ولا بيت مافرقت ..
     
     
    ابطال الفيلم :
     
     
    Ranbir Kapoor
    باسمه بالفيلم ايان واهو و دميعه الفيلم ساعتين ونص اهو ساعتين يبجي خخ لدرجه اهو يبجي وانا ضحك عقب بجى اغلبنا ضحكنا ! المفروض دراما بس اوفر بجي ..
    هذا واهو غني لو حاكه الفقر جان ساعتين ونص بجي او لا الفقير من كثر ماسطرته الدنيا مايبجي تعود خخ مناعه ..
     Anushka Sharma
     
    اسمها بالفيلم اليزا خان واهيا اللي محليه الفيلم مع بودميعه بس ماعرفنا نهايتها !
     
      Aishwarya Rai Bachchan
     
    طولت يالله طلعت لدرجه حسبالنا داشين فيلم 2 !! احنا داشين علبو فيلمها يعني اهيا اللي بترتز باغلب الفيلم يمكن طلعت بنصه ودورهااا بسيط  لسمها صبا واهيا شاعره وهم طلع شاروخان ودوره انه طليقه يمكن طلع بمشهدين بس !
     
     
    Lisa Haydon
     
    اول ماشفتها قلت انجلينا جولي فرع بوليوود خخ ..
     
    دورها بسيط انها حبيبة ايان الاولى ..
     
     
    النوع:
    درامي, عاطفي
     
    كاتبين بكل سايتات انه دراما بس انا ضحكت فيه وايد خخ ..

    مدة الفيلم:
    152 دقيقة
    تقريبا ساعتين ونص ..
     
    قصته :
     
    بودميعه جرب الحب مع 3 بنات الاولى بنت مستهتره اتعرفون اللي شكل بس ماكو مخ وتحبه او بالاحرى ماتحبه تبيه عشان فلوسه اما ال2 فهي كانت صداقه وتحولت من طرفه لحب ! وال3 لما فقد حبه ال2 حاول يدور حب يديد معاها ..
     
    رايي :
     
    الفيلم ونيس بس النهايه كانت مفتوحه ماحب النهايات المفتوحه والفيلم احس لفوق 18 ..
     
    مو لمراهقين او يهال !

    Thursday, November 3, 2016
    تابع بوست المخمل ,,
     
    بس هالمره كولكشن من مانغو..
     
    ع فكره مانغو عنده شوبينغ اون لاين واذا كان الطلب فوق 20 دك يوصلونه ببلاش ..
    نبلش..
     
     
     (!)
     
    هالنفنوف اهو اللي بالصوره الاولى بعد ..
    Velvet dress
                           
     
     
     
     
     
     
     
     
     
     
     
     
    KWD25.900
    وفي منه لون 2 اهو النود ..
     
    (2)
     
     
     
     
    وهالبنطرون اهو اللي بالصوره ..
    Cropped velvet trousers              
    KWD35.90

    Colour:
    Maroon
     
     
     
    (3)
    Velvet blazer
                           
    KWD29.90

    Colour:
    Black
     
    (4)
     
    Velvet dress
                           
    KWD29.90

    Colour:
    Wine
     
     
     
    (5)
     
     
     
    Trims velvet jacket              
    KWD39.90
     
    (6)
     
     Velvet top
                           
    KWD9.90
     
     
    (7)
     
     
     
    Velvet blazer
                           
    KWD39.90

    Colour:
    Sky Blue
     
    وفي منه لون 2
     
     
    (8)
    وختامها اكسسوار ..
     
    شكلها باللبس,,
     
    Tassel velvet clutch
             KWD11.90
     
     
     
    باجي الكولكشن تحصلونه هني

    About Me

    My Photo
    رورو الشخبوطه
    الكويت, قسم الاعلام:), Kuwait
    بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
    View my complete profile

    ايميل المدونة :)

    دايركت انستغرام 😁

    Followers

    Blog Archive

    انستغرام المدونة (roroalk)

    follow me

    My Blog List

    Ads