Friday, January 16, 2015
10:17 PM
وين وصلت امممم !
لي انه الدكتور قالي العضله (عضلة المرئ) لي الحين شاده مارتخت وحسب اللي قريته بالنت من اسماء مرضي اللارتخائيه !
فقالي اهي مسائله وقت ان شاءالله وموعدج عقب العيد ..
هالصوره نزلته بالبوست اللي فات ..
شفتوا شكثر كنت ماكله !
وانتوا بكرامه رجعته اتوقع لانه لبن المراعي مع انه خالي الدسم بس كان ثقيل ولما قلت للدكتور قالي اخذي لبن الوفره اخف وصج اهو اخف بس مو كل مره احصله ..
الصيام الحمدالله استمريت عليه والوضع كان عادي ترجيع مهما كان قوي بس .،
مره كنت رايحه مع اختي السوق تبي شغله وعقب بمر الجمعيه اشتريلي سوائل مشيت شوي يمكن ربع ساعه كنا بالغانم قست وزني ولا ٤٥ كيلو..
وبلشت اتعب ورحت اريح ع ماتخلص اختي عقب رحنا الجمعيه توني واصله صوب السوائل جان ادوخ :/
فتحت اللبن اشربه ماكو فايده !
نزلنا تحت كنا نبي شغله الدوخه زادت اللي غصب اوقف اختي شافت كراسي جان تخليني اقعد وتركض صوب البهارات تيب ملح تعطيني اياه (واي صكتني العبره) عقب تصعد تيب لي ماي وانا قاعده واحس شي يتحرك بجسمي ويصعد لي فوق مو مثل كل مره لا غير والله حسبالي خروج الروح اختي تيي تعطيني شغله وتروح تيب شغله ٢ من تروح اخاف ابيها يمي!
عطتني جيس وراحت جان ارجع وانتوا بكرامه بس مامداني افتح الجيس حتى دمرت عباتي والكرسي والقاع :/ اختي يابت الماي جان تغسل ويهي امبيه احس ويهي يحرقني منه شب ضو !
عقب جان اقعد ع القاع وابجي اقول لاختي بموت بموت :/
واي استغفرالله الله لا يعيدها من ايام :/
المهم عقب الترجيع والبجي حسيت صرت احسن واقدر امشي ..
بس قبل لا اقوم كان في وحده يمي تطالعني وتتمشى ! انزين مانتي مساعدتني لا تطالعيني ع الاقل!
خلصت وطلعت وانا امشي ماسكه اختي قلت لها اذا تبين شي اخذيه وجدمت شوي جان تيي مخترعه تدورني حسبالها انصرعت :/
والحمدالله عدت ..
شكلي بلش يتغير :/
وايد ضعفت صرت يلد ع عظم اخرع :/
انا خدود وخدودي ٢٧ سنه ماعمرهم راحوا ماشاءالله بس مع المرض اختفوا! بياض عيني صار مصوفر اي احد يلمسني يحس باعظامي:/
ماقمت اقدر اقعد ع اي كرسي جسمي يعورني اذا نمت احط تحتي كوشيه !
وانتوا بكرامه ماقمت ادش الحمام الا عشان ارجع او اتيدد او افرش اسناني شي ٢ لا!
اختي الكبيره مره زايرتنا وشافتني جان تقولي امشي اوديج المستشفى .،
قلت لها مال داعي وصعدت فوق جان تطرش لي واتس اب ..
تعالي اوديج ع اقل مغذي بس :/
المهم رضخت ورحت طبعا لي الحين احنا برمضان بس تقريبا كنا بال١٠ الاواخر ..
رحت ع ١٢ طلعت جريب ال٣..
اول مره اشوف دكتور يعرف حالتي بمستشفى الجهرا ..
طبعا اول مادشيت المستشفى وعقب ماخذوا حرارتي والضغط دزيت مسج للدكتور باسل قالي روحي طواري السيف او مستشفى مبارك واول ماتوصلين كلميني..
قلت له الحين بمستشفى الجهرا قولي عن الشغلات اللي تناسبني ..
وماقصر دزلي مسج بالشغلات مغذي وابر وفيتامينات ..
خذيت المغذي بمستشفى الجهرا عقب رحت المستوصف عشان الابر فلقيت زحمه ماكو الا دكتور واحد للحريم والرياييل وطابور عليه ..
كنت بالمستشفى ماخذه لي عصير برتقال ولبن :/ شربته بالمستشفى ومع المغذي حسيت بنشاط الحمدالله بس وصلت المستوصف اختي راحت تاخذ ورقه وانا افتر ادور ربعه محد يشوفني فيها عشان ارجع وانتوا بكرامه ..
ولانه زحمه قلت ايي عقب ..
المهم رحت الصيدليه اخذ الفيتامينات ..
وحزتها كان ياذن الفير ورديت البيت ..
اخر رمضان هبيت بميرندا الحمر ! وانا قاطعه هالسوالف من الثانوي:/ والمشروبات الغازيه من توصل بلاعيمي يحوشني حارج قوي !
قمت افتحه واخليه بس ماكو فايده !
الترجيع كان مو طبيعي لدرجه خدامتنا لاحقتني مره عقب مارجعت جان تقولي ليش جذي انتي سويتي العمليه وماصرتي زينه قلت بعد الحمدالله بس بسوي عمليه ٢ ..
قالت ٢ قلت اي قالت متى قلت مادري ردت علي قولي عشان اصليلج ! كنت ببجي!
وكنت ادور شغلات بارده عساس لي رجعت وانتوا بكرامه احس بروده مو حرقه مع اني خلقه مااحب هالسوالف..
ماذكر اذا صار موقف بعد برمضان بس خلص ع جذي ..
بلش العيد واول يوم كنا يايبن بوفيه من وحده واروح ارتز ومعاي سفن اب علبو السفن زين ! عاد هذا خلقه مااحبه ولا اشربه شربته جان يشب مرئ ركضه للحمام وانتوا بكرامه ..
اشرب ماي ارجع بقوه والترجيع يعور لانه جروح العمليه مابرت بعدها ! وكنت حيل ضعيفه لدرجه احس الجرح لازق بعظامي ..
اذكر باول يوم العيد عقب الترجيع حاشني عوار قوي بالمري اللي بجيت منه ! تعرفون وضعيت انه تكورون ع نفسكم من العوار جذي كنت واختي حبيبتي تدور االادول علبو مسكن ..
شربته جان ارتاح الحمدالله ..
مو قادره اتحمل العوار قوي من الترجيع قمت اصرخ ! كله دايخه وتعبانه غصب اتحرك من امشي بو ٥ دقايق ادوخ ..
نسيت اقولكم رحت المستوصف باخر رمضان وبلشت اخذ الابر اهي جنه ٣ مرات بالاسبوع ..
واهي بالعضل وعلى خاصرتي..
وكل ماشافتني سيستر قالت لي انتي وايد ضعيف !
المهم ٣ ابره كانت بالعيد خذيتها ورحت اطلع العاده كنت اصير احسن منها هالمره مامداني وصلت السوق الا دخت وحيل بعد بس لما اقعد ارتاح اشوه بس لا امشي !
المره اللي عقبها رحت اخذ مغذي بالمستشفى علبو لما خذيته برمضان استفدت اللي صار انه الدكتوره اول مادشيت دوري تكلم بالتلفون ايو البهارات بعلبه باسكن روبنز!
خلصت جان اشرح لها حالتي جان تسالني من اي ده؟ قلت مادري والله جان تقول يعني ماشربتش كرولكس وانتي صغيره ؟!
كنت برد عليها شنو مشروع غساله؟!
المهم عطتني تخطيط قلب و تحليل دم و مغذي ..
وقبل لا ادش كنت قايسه ضغطي وطلع عندي هبوط وردت جيكت السستر ولا هم هبوط !
الدكتوره تسالني ليش ! اقولها مادري..
ماكنت ابي تخطيط للقلب وماله داعي وصارت قصه عليه ماتستحق الذكر المهم خذيت المغذي ولما خلصت ..
قبل لا اطلع من المستشفى قلت لاختي لي الحين دايخه!
مع هذا كابرت ورحت السوق لانه اختي تبي شغله !
طول مانا امشي اخاف اطيح عقب كل ٥ دقايق قمت اريح ماتمينا نص ساعه جان نطلع ماقدرت خلاص..
رديت البيت ابجي عند امي اقولها بموت :/
وبعد عمري اهي تبجي معاي ..
ماقدرت استحمل اتصلت ع السيف قلت لهم متى الدكتور باسل يكون موجود ؟ قالوا عقب العيد قلت اوكي ابي موعد باول يوم ولقيت اول موعد بعد ..
كلمت رفيجتي اني تعبانه حدي بموت اتصلت تهديني و يت معاي بالموعد..
طبعا على ماقرب الموعد وصلت مرحله انه غصب امشي واتل ريولي تل احسها ثقيله وهالشي تعبني نفسيا لاني ماشاءالله حرچه واحب اتحرك ..
وصار موعدي ب٣/٨/٢٠١٤ الساعه ٥..
شصار فيه عقب اقولكم ..
يتبع ..
Labels:
اكاليزيا ، ضيق بالمرئ
Subscribe to:
Post Comments (Atom)
About Me
- رورو الشخبوطه
- الكويت, قسم الاعلام:), Kuwait
- بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
انستغرام المدونة (roroalk)
follow me
My Blog List
-
-
-
-
نواقيس العزلة4 years ago
-
-
عندما نسعى لتحقيق حلم5 years ago
-
-
بينكيو تكشف النقاب عن جهاز العرض TK8006 years ago
-
-
مكتبه ليويلا livraria.lello7 years ago
-
السكوت علامة الرضا7 years ago
-
مع الخيل يا شقرا7 years ago
-
عدنا إليكم من جديد7 years ago
-
سلمان الفاتح!7 years ago
-
مشتاقة8 years ago
-
Summer cooling refreshing drink recipe8 years ago
-
انت مش انت !!8 years ago
-
I'll be Back Soon راجعين قريبا8 years ago
-
-
VARIETY ON BONUS POKER ONLINE8 years ago
-
كاريكاتير مابعد أسعار النفط8 years ago
-
-
Salmon recipe9 years ago
-
Review: The Martian9 years ago
-
ضيفوني9 years ago
Ads
15 comments:
عاد انتظرج حبيبتي طمنينا عنج
اجر وعافية ان شاء الله :( غورقت عيوني بس انتي قوية وقدها ما شاء الله
سلامات وماتشوفين شر والله سبحانه وتعالى يشافيج يارب
اي عليج :(
سلمات عزيزتي
ادري بوستج قديم
بس ان شاء الله احسن الحين ؟
طمنينا عنك،ان شاءالله امورك طيبه وتوسع المرىء،ولدي واهو صغير كان نهايه المرىءضيق بس توسع لما كبر شوي .
مشكورررررررر على المجهودمشكورررررررر على المجهودمشكورررررررر على المجهودمشكورررررررر على المجهودمشكورررررررر على المجهودمشكورررررررر على المجهودمشكورررررررر على المجهودمشكورررررررر على المجهودمشكورررررررر على المجهود
مشكورررررررر على المجهودمشكورررررررر على المجهودمشكورررررررر على المجهودمشكورررررررر على المجهودمشكورررررررر على المجهودمشكورررررررر على المجهودمشكورررررررر على المجهودمشكورررررررر على المجهودمشكورررررررر على المجهودمشكورررررررر على المجهود
beautyshopbh:* مشكوره حاليا الحمدالله بخير
Asma Soud >>
الله يعافيج يارب ..
مشكوره :*
والحمدالله الله سهلها
غير معروف ..
الله يسلمج والشر ماييج ويشافي كل مريض يارب :*
Kawkawii ..
الحمدالله بفضل الله :*
والله يسلمج من كل شر ..
نونا ..
عيب خلقي ولا مشكله صحيه ؟؟
الحمدالله بفضل الله :*
مشكوره..
الحمدلله على سلامتج مأجورة إن شاء الله داومي على سورة البقرة والصدقة شي فظيع وكله بأجره وفي ميزان حسنانج نشر تجربتچ للإفادة
خطاج السو.. عندي مشكلة قريبه .. بس انا سوء تغذية بسبب التكميم .. ياريت تكملين وتعلمينا شلون حليتي المشكلة يمكن مستفيد لاني تعبببببت حيل والله
خطاك اللاش .. سوري ع التاخير بس توني قدرت ارد البلوق مادري شفيه متنح من جذي كلمت شروق عنك ..
قلت لها شوف دكتوري باسل وايد زين ماشاءالله لسوء التغذيه ومضعفاتها وانا لاحظت اللي مسوين تكميم اغلبهم مثلي حاليا ! المهم عليك بالفيتامينات بما انك ماتاكل عدل وبدال الككاو والبطاط <<طاع من تكلم خخ حاول تاكل شغلات مفيده اذا تعاني صعوبه بالبلع او تنغث من الاكل خلك ع مهروس والشغلات اللي بسرعه تذوب والسؤال ..
والله يشفيك .،