Saturday, February 16, 2013

 الخميس مو اللي فات اللي قبله كنت معزومه ع عرس ومحتاره وين اروح احط مكياج واسوي شعري وشلون ؟؟ طبعا انقذتني رفيجتي بقبله بيوم حجزتلي بهالصالون ..

 اول ماشفت اللوحه قلت لا مابي مكياجي جذي :\ بس دشيت وسويت وايد شغلات عندهم ..
 
مكياج +شعر (تسريحه وغسيل) +صبغت اظافر ايدي وريولي + شيره ..
 
تجربتي + رايي :
 
الشيره كانت زينه ، صبغ الاظافر عجبني حلوووو وشغل مضبوط ماشاءالله اهو الوحيد اللي بتشوفون نتيجته ..
 
 وهذي النتيجة احب هاللون ..
 وبالنسبة للمكياج :
 
اللي حطت لي اهي منال مكياجها ماشاءالله حلو الفاونديشن طبيعي ورسمت ويهي والشدو كان فخم مو مثل اللي احط كالعاده يعني اقدر اقول مكياج لبناني (سموكي ع بني شي جذي مااعرف اوصف :\)وحواجبي انا مااحف الحمدالله فرسمتهم لي بشكل وايد حلو الرسمه اللي احبها اول مره صالون يسويها لي العاده ياعرضونهم ياضعفونهم والاغلب يحط العجينه اللي مااحبها كلش تقبح :\ هذا ماشاءالله على قولت اختي جنج حافتهم ولونهم طبيعي مو غامج  ..
 
وماشاءالله تم ثابت حطيته تقريبا 7 لي 2 بالليل واهو ثابت ماطلع خطوط التعابير اللي ساعات تبين بمكياج السهره او دهن او قشر كريم الاساس حتى اختي الكبيره ماشافتني الا عقب العرس ع 1 وشي ومدحت المكياج تقول جنج توج حاطته ماشاءالله ثابت ..
 
وماحطيت كريم جسم حطتلي لمعه على جسمي راقيه حبيتها وايد طبيعيه وناعمه مو الهيلوقيه ..
 
ومع انه المكياج ثابت الا انه بنفس الوقت ماذاني مسحته بسرعه سهالات مو اللي طن ع ويهي ..
 
اخوي اول مره يمدح مكياجي ويقولي عيونج حلوه وابوي بعد مايحب المكياج مدحني ..
 
وعلى فكره اغلب مكياجهم ماركات مو شغل بو هناد ..
 
 
الشعر :
 
هم حبيته ماكنت حاطه بالي اني بسوي تسريحه اساسا مو بالي شي وبنفس الوقت شعري خفيف مو اي شي يناسبني وهم استحرم اركب شعر ..
 
بس سولي تسريحة وضبطوا خفت شعري بالحشوات العاديه مو وصلات شعر والقذلة الموديل اللي الحين هابين فيه مرفوعه بحركة هم شي يديد علي وخفت تطخ اذا لبست ملفعي بس اشوه ظلت ثابته ليما فتحتها ماشاءالله لبست ملفعي مرتين و رقصت اكثر من مره وحده منهم بداوي والشعر ماشاءالله ثابت ..
 
وهم ماذاني لما بطلته ..
 
وهالشي الحلو يخلونا نحط على ويوهنا عشانا المكياج مايتاثر بحرارة الاستشوار ...
 

رايي باختصار :
حبيت مكياجي وشعري << اللي سوتهم لي منال ونفسيتها حلوه ..
 
بالنسبه للاسعار ..
 
المكياج 45 د.ك
والشعر 25 بس حسبت لي 20 ..
والشيره والصبغ ببلاش :)
 
عنوانه :
 
صباح السالم يم مدرسة الرؤية ..
ت :25519685
 

2 comments:

Imahamac said...

والله ماشاء الله مو على شكله من برة. ، انا اهم شي عندي النظافه بس شكلة مرتب وبسيط

رورو الشخبوطه said...

اهلين مهاوي ..

اي اهو بسيط مو اللي فخم بس نظيف وحبيت شغلهم خصوصا المكياج ..

ومرسي

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

follow me

My Blog List

Ads