Sunday, October 7, 2012
الاسبوع اللي فات شفت منيوهم بادارة يارنا سابقا فسالتهم عنه قالوا لذيذ قلت عيل باجر باخذه منكم من كثر ماكان عاجبهم  وحبوه خطر لا يحلفوني ارد المنيوو خخخ ..
 
جربته انا بيرو مع رفيجتنا 3..


هالايام صااايره احب التوست خصوصا المحمش وهالمطعم يوفر 15 نوع من التوست ماشاءالله :
 
توست الجبنه - توست الشيدر - توست بالزعتر - توست بالبصل - توست بالفلفل الاسود - توست الزيتون الاخضر - توست صلصة الطمام - توست السمسم - توست بالزعفران - توست الدراسين - توست الشبت - توست سادة - توست البقدونس (منقول هالسطر من هني )
 
وهني منيوه بالتفاصيل ..
 
اخترنا نوعين من التوست مع بطاط ..


اعتقد هذي اللبنه :
 
مكوناتها لبنه وزعتر وزيتون وخيار وطماط وخس بتوست بنكهة الزعتر ..


وكلوب مسحب دياي ..
 
دياي مسحب مخلوط بالمايونيز وزيتون وذرة وخس وطماط بتوست بنكهة البقدونس << لحظه ماذكر انه كان فيها ذره !! خلوا الذره مو مكتوب انه فيها بصل وكانت مترووووووووووووسه بصل كرهت عمري وانا اشيل لدرجة انه لاعت جبدي وقلت خلاص ماني مكمله ماراح اشيل الباجي لاني ماراح اخلص وباكل لقمه من الصوب اللي وخرت عنه البصل وهم ماقدرت اكلها انسدت نفسي منه استغفرالله مااحبه مااحبه ..

رايي :
 
الفكره حلوه الاكل زينونظيف لو ماهالبصل واللي بط جبدي انه لو كاتبين انه في بصل جان قلت شيلوه او غيرت الطلب المره الياي بساله عن مكونات طلبي احتياط ..
 
البنات يمدحون اللبنه ذقت شوي منها كانت زينه و يمدحون الحلوم ..
 
رغم اختياري غير الموفق بس بجربه مره 2 بطلب 2 بس باكد عليهم انه يكون بدون بصل ..
 
مواعيد التوصيل :
من 6 صباحا حتى 2 ظهرا ..
 
عنوانه :
شرق -بمجمع الصقران ..
 
ت: 22456610 – 66997800 – 65653400
 
- Posted using BlogPress from my iPhone

0 comments:

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

follow me

My Blog List

Ads