Friday, September 2, 2011
هالسفره كلها اكشنات اول مره بكتب عن شركة طيران جربتها , مع انه المفروض انزل عن القطريه قبل بس لانه لهيت + في سبب اقوى خلاني ابدي السعودية عليها..


رحلتنا كانت ع متن الخطوط الجوية لسعوديه , وخط سير رحلتنا كان (الكويت, المدينه , جدة , الكويت)..

اول يوم رحنا المدينه وتمينا فيها ليله الرحلة كانت موفقه باستثناء النزله شويه لف فينا وقحص بالهو اللي لاعت جبدنا :\

وكان وقت رحلتنا من الساعه 4 الربع العصر الى تقريبا 6 الا ربع يعني ماكنا فيها حزة الفطور ..

بس اثناء الرحلة وزعوا علينا اكل مرتين اول مره الاغلب ماخذا الا الفاطرين وال2 كان بعلب ..
 وداخله حاطين جيس نايلون بعد سهل علينا شيله ..
 فيه (لبن , ماي , توست بتركي وتوست بجبن , فطيرتين جبن وسلطة خضرا مع ملفوفه وحدة "ورق عنب", وبسبوسة , وتمر , وعدة الكل القفاش وكلينكسات وقلاص)

حبيت الحركة :)

و2 رحلة كانت 2 يوم نفس الحزه من المدينة لي جدة ماوزعوا شي الا عصير لونه خبط خخ حسبالي منكر طبعا الاغلب ماشرب لانه صيام ..
وهم عدت الرحلة بسلام ..

اما ردتنا للكويت كانت حدها متعبه ..

المطار زحمة ولوية و ماكو تنظيم كلش و ساعتين يالله حطينا جناطنا بالشحن ولما رحنا صوب شحن ماي زمزم الماي مكتت من الضغط وجنه جبل كل صوب مقطوط جيس ..

قبل رحلتنا بنص ساعه عرفنا انه تاجلت الرحله ساعة ونص :\
على ال2 طرنا ..
وعطونا وجبه وهالمره خذيناه ..

كان في عيش دياي اخترته ..

عيبه طعمه مبين انه مسخنينه اكثر من مره :\
 وعقب بادلت بنت عمي بحميسة لحم بخضار ..
زين بس البطاط مو حلو ..

والكيكة استغفرالله ضيييييييييييييييييييم لا من شكل ولا طعم لقمة وطلعتها بعد ماقدرت ابلعها :\

كلشي يهون الا بردتنا الكويت واقفين ننطر جناطنا ماكو بح ع قولة ولد اخوي :\

مني مناك ماكو اللي كانوا واقفين قبلنا بجدة يشحنون جنطهم عايله من 12 جنطة وصلوا 2 بس :\

واللي قبلنا ع طول ولا جنطة :\

واحنا بس ماي زمزم :\ عاد عمي توقع من مكانه مبين ماراح يوصل لما شافه قال معجزه خخ..

لي الحين ماكو اي خبر عن جناطنا ولد عمي راح يجيك عقبنا قالوا بعد 24 ساعه مو الحين تبلغ :\

عمي يتصل عليهم مايردون :\

بنت عمي 2 تقول عادي يردون جنطتج عقب ماياخذون اللي يعجبهم منها :\

ابي جنطتي !!!!

10 comments:

Now or Never said...

مع اني ماخذة على خاطري منج !


ماتبين اتعرفين شصار علي من مستجدات

ليش مو ضايفتني متابعة ؟

عالعموم :

ان شاء الله ترد لكم جناطكم - الله يعينكم

رورو الشخبوطه said...

ناو..

هو عس ماشر !!

توني راده ممداني اسوي شي وحدي تعبانه ياالله انزل جم شغله واغفي :\

قصدج باللسته زين ذكرتيني كنت ناويه بس من اللويه ما مداني اسوي شي :\

امين يارب..

شكرا..

gaFsHa ;p said...

الله يعينكم
السعوديه طول عمرها زفت
مره كان وياي جنطه و ما اطول احطها فوق نادي المضيفه اقولها حطيها لي جان تقول اسفه مو شغلي هذا
نعممم !! @@
جان اركب على الكرسي و احطها و لما شافني مضيف ريال ركبت جان اييلي يساعدني اشعقبه !! :@

و ان شاء الله ترجع جناطكم سالمه و غانمه :p
و تقبل الله طاعتكم مره ثانيه

رورو الشخبوطه said...

وي مو هالدرجة الدفشة بالله هي شمهنتها ع الاقل تنادي زميلها :\

امين يارب ..

منا ومنكم صالح الاعمال يارب..

مشكوره ..

maha said...

الحمدالله على السلامه رورو

وتقبل الله طاعتج

وبالنسبه للطيران اللي يصير فوق المدينه بالذات
ترى الكل يتخرع منه داايم فيه مطبات هوائيه تخرررررررع


اهم شي الحمذالله على السلامه

Gold Medal Ribbon said...

wiiiiiiiiiii wiiiiiiiiiiiiii!!!! hatha action mu 6ayraan LOOOOOOOOL!! il7imdillah 3ala salamtkum o taqbal allah 6a3tkum inshallah o inshallah eridoon likum iljan6aaa la et7ateeeen

Anonymous said...

انا مرة جربت الخطوط السعودية وكلش ما عجبتني

وكان الوضع مو حلو وصارت مشاكل داخل الطيارة بأماكن الجلوس :/

بس عاد الله يعينكم كلش ولا تضيع الجناط

ان شاء الله يوصلون بأقرب فرصة

Anonymous said...

انتي زييين ساعه ونص !! احنا بالرده تأخرنا بمطار جدة 4 ساعات !! حتى مكان نقعد فيه مافي واذن واحنا كنا لي الحين بالباص ناطرين يركبونا الطياره طافت ربع ساعه على ما صعدنا الطياره والكاتبن نطرنا نفطر بعدين طرنا :\

Made n Q8 said...

وييه جنهم طيران الكويتيه

محد يمدحهم

Anonymous said...

امبيه ذكرتيني بسفرتنا قبل 6 سنين رايحين عمرة طيران داخلي من الدمام لما جده ووصلنا متأخرين من زحمة الشارع وطيارتنا المفروض 2 الظهر بس طااارت ولقينا حجز الساعه 2 بالليل! عقبها توبة نطلع متأخر

الحمدلله على سلامتكم وتقبل الله

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

follow me

My Blog List

Ads