Wednesday, June 29, 2011
عقب ماتريقنا التم شمل العايله ورحنا اول مجمع وكان :


اهو من شهر مجمعاتهم لما كنت اسوي سيرج الاغلب كان يتكلم عنه وينصح فيه , واهو كبيررررررر 7 طوابق وكلشي فيه واسعاره اغلبها بين مناسبه ورخيصه ..

بكتب لكم عن خلاصة تجربي فيه رحت له 3 مرات , اول مره كانت استكشاف سريع وجوله بسيطة + غدا , 2 مره فصفصته عدل فريت كل الادوار تقريبا بس وصلت لي ال5 ووقفت لانه بلشوا محلات الاثاث وسولف 2 ماحتاجها وقلت محلات الهدوم البيوتي والاكسسورات ..

واحلى شي بمجمعات بانكوك انه بكل مجمع موفرين خريطة بالتفصيل وبعضها مترجم بالعربي :)

ملاحظة:ماصورت شي بالمجمع لانه ممنوع التصوير فاغلب الصور من النت .
 لا ولم تدشين يفتشونج اول مرتين فتشوني ال3 طوفني خخخ الظاهر حفظ ويهي :\

المحلات :

* البيوتي :

فيه وايد محلات بس اانا دشيت 2 :

الاول كنت ريحة لمجمع مخصوص عشانه :

اسمه:
beauty buffet

عجيييييييييييييييييييب فصلت فيه دشيته مرتين فاتورتي ماتصير فيه اقل من 2000 بات ..
واهو ماركة كوريه ..
فيه مكياج وفناتق وعنايه بالبشره ..
اللي شريت مكياج كريم وبودره و حمره وشدو ..
من فناتقهم قطرة الماسكرا و نفس منتج بنفيت لتوريد البراتم والخدود ..
عنايه :ست لويهي وكريم وصابونه لجسمي و ماسكات لرفيجتي..
واسعاره وايد مناسبه ..
واهو موجود بالدور ال2 ..

سايته (هني)

المحل ال2 اهو :
oriental princess

دشيته اتطمش طلعت بكريم وسنفره لجسمي واسفنجة فيشل لويهي ورحت مره 2 خمطت لرفيجاتي من االاسفنجة :)

سايته (اهني)

-*الملابس :
مااحس انه في وايد محلات ملابس ..
اكثر شي كشكات تبيع تيشرتات ..
بس المحل اللي حبيته اسمه vivi
موجود بالدور الارضي..
شريت منه تنوره ماكسي طلعت مقصمله خخ<< بلبس بين :\  بس عاجبتني :(
وخذيت قميصين طوال ..
وعيب محلات الهدوم ببانكوك انه ماكو مقاسات كله فري سايز
الاغلب كبري بس فيه عيب يامقصمل ياا الجم كاش اعاني من سالفة قصره اكثر من ضيجة :\
وفي محل بالدور لربع جنه خذيت من كارديغان ..
وميزتهم اسعارهم رخيصه :)

الاحذيه :
في محل بالدور الارضي تبدي اسعاره من 199 بات يعني دينار وشي ..
عندهم موديلات وايد بس ذا تبون اخذوا فلاتات و صنادل , اما نعل البحر وانتوا بكرامه تحصلونهم ارخص برا..
وفي محل بالدور ال2 عنده تشيكله حلوه جنه ااسمه فوتس شي جذي :\

الجناط :
(1)
محلات اللي 199 بات ع قفى من يشيل فيه ..
من الدور الارضي لي اال4 تقريبا ..
جنطة اعجبتج مالقيت منه لون اللي تبينه او حسيتها خربانه مثل جنطة لقيتها بدون العلاق الطويل ماخذيتها مريت محل للي يمهم لقيتها :)
واغلب شغلهم ماتعطينه سعره لانه جوده الجلد زينه و موديلااته ذربه ومضبوطة..
بس عيبه زحمه و ماشاءالله قشهم وايد ومو مرتبينه عدل فلازم تنبشين عشان تشوفين عدل :\

(2)
في محل او كشك مادري ربعه صغيره فيها جناط صنعه تايلنديه وسوالف جلديات مثل ابواك وجناط مكياج ..
اكثر شي حبيته فيه الكلاتش خذيت منه 2 ..
واسعارهم رخيص من 250 بات و 290 و 350 هالحروه س شغلهم وايد ذرب ومو مكرر ماشفته بمكان 2 ..
اسمه حسب للي مكتوب علي التاق  COOL.. 

شغلات 2:

-وهم في وايد كشكات تبيع حزامات بس لو تفترون عدل بتلقون سعر انسب يعني في كشك الحزام ب250 جنه ومايقل سعره حتى لو خذيتي اكثر من قطعه , ونفس موديلادته حصلتهم  بمحل ال2 اذاا شريتي 2 في نسبة خصم جنه 15 % ال3 جنه 20 % ..
- محلات الاكل المجفف منتشره فيه ..
-هم السبا وايد , تقريب بكل دور فيه ..
-في بقالات صغار..
- في محل نظارات بس مادشيته ووايد محلات تكنولوجيا وتلفونات ..
- في محل اسمه طوكيو نفس لاندمارك او سنتر بوينت وهم في جم ماركاته وماركات 2 بعد واهو اكثر من دور ..

شنو بعد !!  هذا اللي اذكره :\

المطاعم :

في وايد بس بتكلم عن  المطاعم الحلال ..

بركن المطاعم :
 فيه مطعم علي :


اهو اللي جربناه :

واهو اكثر من قسم بس مو كله حلال ..

بس قسم معين .

اول ماتدشون يعطونكم هالكرت وماتطلعون بدونه , لانه بمثابة كرت تعبي فيه حسابك ولما بتطلع تدفع فلازم يجيكون عليه اذا مستخدمه او لا احنا ماستخدمنا الا واحد اهو مال عمي..
 ماصورت الا الخبز ..
 وطلبنا كان عمي مشكل لنا من كل الاصناف, و الاطباق اغلبها عباره عن عيش و صلصة ع جنب واغلبهم سبايسي حارين لاهوب مااحب جذي :\

وفي مطعم جباله اسمه :

بس ماجربته ولقيت لكم منتدى كاتب معلومات عنه (هني)

موجودين بالدور ال5 ..

خدمات اخرى :

فيه مصلى بس مدشيته الصراحة ...

والحمامات وانتوا بكرامه بفلوس بس فيها هوز خخخ اما اللي صوب المطاعم ببلاش ..

16 comments:

ناعمة الهمس said...

تقرير حلو متابعين يا قمر

نزهاويه said...

الله ذكرتيني لما رحنا بانكوك قبل 11 سنه
هالمجمع يونس كله خشره :p
بس انا بانكوك ما اعجبتني وايد حررر و رطوبه و كلها حشرات ..
بس ودي اروحلها مره ثانيه و اروح بوكيت وياها

بالعافيه

msha3erha said...

الحمدلله على السلامه

تقرير شامل ماشاء الله :)

اهم شي تكونين استانستي علد بالسفرة

انا ما عمري رحت بانكوك و ماا فكر اروح لها مادري ليش ماحبها من الاسم لول

رورو الشخبوطه said...

ناعمه ..

مشكوره :*

رورو الشخبوطه said...

نزهاويه..

اي حده خخخ..

ذبحني البق ..واجو كن متقلب مره حر مره رطوبه مره مطر بس عموما زين

حتى ن لمره ليي خاطري بجوله فيها مع جم دوله :)

يعافيج يارب..

مشكوره..

رورو الشخبوطه said...

مشاعر..

الله يسلمج يارب..

الحمدلله غير جو واستانسنا..

خخ احنا ريحين مرافقة مريض :)

وحلاته ماتروحين لها بروحها بس احلى جوله ..

lazy dazy said...

عليك بالعافيه روروة

هلا هلا بالريفيو على مشترواتك الجمالية بعد ما تجربينها ان شاء الله

وهذيلي المحلين عندهم التوب هناك والا في غيرهم ؟؟

رورو الشخبوطه said...

ليزي..

الله يعافيج يارب..

اي ان شاءالله ولا يهمج :)

لا وايد عندهم محلات عدي وخربطي شكثر دشيت بس بهلمجمع مادشيت الا هالاثنين..

حتى عندهم جمعيه تشوق يبعون فيها سوالف سبا ..

وحياج الله..

i-Found said...

لاحاظتي انه حماماتهم اللي بالمجمعات انظف من حماماتنا !!!

رورو الشخبوطه said...

اي فوند..

مادشيت بس للي دشوا يمدحونها..

Walking_towards_you said...

أحلى مكان في بانكوك

رورو الشخبوطه said...

هلا اخوي..

اهو الحلو فيه انه شامل ..

وحياك الله..

Anonymous said...

مشكورة على التقرير
نبي صور مشترياتج ;p

رورو الشخبوطه said...

حنان..

العفو ولو ..

حياج الله..

ان شاءالله بصور جزء منهم :)

Anonymous said...

انا قبل اروح لها كنت ما ادانيها وكله اقول ويييع ويييع واين اكل واين اشرب ومن ذي السوالف بس من رحت لها حبيتها بس عييبها الحر وريحة الطبيخ بالشارع انا ما اروح ولا طبيت شترع العرب لان الجميع ومنهم اختي ساكنه فيه بس الزين فيه على قولة اختي ان فيه فنادق شقق يس اما انا وزوجي ما نحتاج شقق من جذية ما نسكن فيه وما شفته انا رحت 3 مرات وحبيتها بس الحر والريحة لوعت جبدي
اما اللي استغرب منه عمري ما رحت موول وفتشوني حتى الا م بي كيه
ولا حياتنا فتشونا ولا احد قال لنا ممنوع التصوير عموما انا ماصورت فيه بس التفتيش غريب ..ترا انا توني راجعه منها شهر 12 اواخرة وبدايه شهر 1

رورو الشخبوطه said...

غير معرف..

اهو جوهم ينبلع بس الريحه صج قاتله :\

وهم بالمدخل حاطين نفس نقطة تفتيش اللي بالمطارات :\

وسالفة ممنوع التصوير بنت عمي تقول شافت لوحة مكتوب عليها :\

وحياج الله..

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

follow me

My Blog List

Ads