Monday, October 25, 2010
السلام عليكم ..

هالرواية صارلي سنة متشوقه اقراها وقبل جم يوم حصلتها بالمعرض وشريتهاوقريتها :)



عدد الصفحات :255 ..

دار النشر : دار الساقي ..

سعرها : دينارين ..

النبذه الخلفيه :

 
قالوا إنها هربت من قبرها!

... منذ كانت صغيرة تتحرّش بالرجال، وتطفح ملامحها بسعادة الدنيا حين يحملها رجل بين يديه.

تقدم لخطبتها عشرات الشبان، ورفض أبوها تزويجها. ربما كان يشخى أن يُفتضح أمر ابنته، ويعرف القاصي والداني أنها فقدت عذريتها، ويلحقه عارها.

... وبعد أن فاحت "رائحتها"، أقامت أمها حظراً صارماً على دخولها وخروجها... لكنها كانت دائماً قادرة على خداع الجميع: كانت تضع في سريرها وسائد تغطيها جيداً، وتنسلّ بعد منتصف الليل إلى عشاقها الكثر... تُغويهم، وتقضي الليل معهم.
 
تعليقي:
 
المحور والحدث الاساسي :
هو اختفاء الشابه "جليلة " من قبرها ..
 
هل هربت ؟؟
 
اختطفت ؟؟
 
سرقت اعضاءها ؟؟
 
قضايا ومشاكل فرعيه عرضتها الروايه :
 
- تاثير الحب ع العشاق ..
 
- هيئة الامر بالمعروف والنهي عن المنكر ودورها !!
 
-هروب ا لفتيات ..
 
-الخيانه الزوجيه ..
 
رايي :
 
في البدايه كانت رواية صعبه من حيث الكلمات المستخدمه في السرد والاسلوب مبهم , بالاضافة الى ان طول السرد و تعدد الرواة شتتني في اكثر من مطرح بالروايه ..
 
مع هذا لم اتركها فقد شدتني لقرائته حتى النهاية ..
 
 نبذه عنها هنا

28 comments:

le Koweit said...

يعني تنصحين فيها ولا لا؟

ebtsamh said...

سؤال .. ما لاحظتي اخطاء مطبعية ؟

اعماله غير معتادة وجريئة

على فكرا املك الرواية وسأقرأها

لأرى هل سأصل لما وصلتي اليه ..

ودمتي

رورو الشخبوطه said...

هلا اخوي لو كويت..

مادري ع راحتك ..

مااعرف ذوقك عساس احكم ..

اهي حلوه ومو حلوه ووضحت هالشي بالبوست ..

بس عن نفسي لو يرد الزمن وار اقراها مره 2 ماتحسف :)

وحياك الله..

رورو الشخبوطه said...

هلا ابتسامه ..

لا والله مثبت كنت اقراها اول ماقعد من النوم كون دايخه خخخخ ..

اي قصه يديده ..

بس الجراءه لا عادي بالعكس طبيعي ومافي خدش للحياء مثل الباجي ..

ان شاءالله وقراءه ممتعه مقدما ..

وحياج الله..

فاطمة الابراهيم said...

بس قريت اللي مكتوب ورا الكتاب جان اغير رايي علطول و ما شريتها..!

هالنوع من الروايات ما تطلعين بشي مفيد ابد ..!

اسلوب الراوي حلو بس مادري ليش يتمركز بالجرأه الغير نافعة مثل روايته " ترمي بشرر "..!

ياريت لو يغير من مواضيعه

:)

رورو الشخبوطه said...

هلا لوتس..

عيل انا عكسج شدني وخلاني ادورها خخخ..

فائدة مباشره لا بس غير مباشره اي ..
ع صعيد الثروة اللغوية و مجالات معينه تكون عندج فكره بسيطه عنها ..

هو حلو بس انه قكت اضيع :\ هذا اول قراءه لي له واسلوبه زين مو جريئ وايد مثل الباجي لا عادي ..

اهو لازم يغير ومايحصر نفسه بموضوع او مجال او طريقة كتابه معينه ..

وحياج الله..

:)

الزين said...

قرأت تلك الروايه قبل سنتين
وكانت بداية اكتشافي لعبده خال

ومن ثم ادمنت كتاباته جميعا

القصة مؤلمه
مبهره
وتضع بصمات على امور يعاني منها المجتمع السعودي بشكل يهز القارئ


لكل من لم يقرأ القصه
انصحه بقراءتها

أحمد محمدي said...

شكرا لج على هل نبذة
اتمنى نشوف لج كتاب باذن الله

Made n Q8 said...

طافني معرض الكتاب حسافه مارحت

او بمعنى اخر انا ماكان لي خلق اروح خخخ

يعطيج العافية

ميمة السبيت said...

** ايه حلوه قريتها هذي قديمه بالبدايه تملل تالي تصير زينه
دزيت ايميل حق الكاتب حقرني :(

mazyona said...

شكلها الرواية معقده بس حلوه
تسلمين

Amwaj said...

هل هربت ؟؟ اختطفت ؟؟ سرقت اعضاءها ؟؟
الأسئلة بروحها شدتني

يعطيج العافية رورو :)

ROro Mania said...

بنت خالتي شرتها ان شاء الله باخذها منها و بقراها :)

Amal Kh said...

شكلها حلوه بس انا ما احب اقرا عن الخيانات والسوالف الي تصير في مجتمعنا الحين احسها وايد كبيرة علي
بس لي كبرت ان شاء الله اقراها
مشكوره ع البوست

خاتون said...

عرضج لها
يقولي صرفي نظرج
*_^
شكلها من النوع اللي
يترك اثره على النفس

شكرا مراسلتنا من قلب الحدث *_^

رورو الشخبوطه said...

هلا الزين ..

اي وايد مؤثره خصوصا من ناحية تاثير الحب ع الابطال :\
وعرض عيوب المجتمع لسعودي بشكل واقعي بدون مبالغه ..

اعتقد :)

شكرا ..

وحياج الله..

رورو الشخبوطه said...

هلا اخوي احمد..

العفو ولو ..

اتمنى امتلاك هالموهبة ..

وحياك الله..

رورو الشخبوطه said...

هلا مدمد..

وهالسنه ماكان في معرض غيره اقصد الهديا وهالسوالف ..

فللي مايحب الكتب مايسوى يتعنى :)

ويعافيج يارب..

مشكوره..

رورو الشخبوطه said...

هلا ميمه ..

اي لانها صعبه بالبديه عقب تتعودين ع الاسلوب..

وي اتوقع ماشفه او مايتابع ايميله ..

وحياج الله..

رورو الشخبوطه said...

هلا مزيونه..

لانه تتناول قضايا صعبه ..

حلو الاكشن اللي فيها والحب :)

الله يسلمج..

وحياج الله..

رورو الشخبوطه said...

هلا امواج..

يعني انفع كاتبه خخخخ..

والله يعافيج يارب..

مشكوره..

رورو الشخبوطه said...

هلا رورو..

ان شاءالله..

وحياج الله..

رورو الشخبوطه said...

هلا اموله..

ان شاءلله..

اي كبيره عليج هالسوالف حلاته تقرين سوالف اجتماعيه بسيطة ..

مو عشان شي عشان ماتاثر عليج ..

انا كبرج كنت اقرا الجريمه واثرت علي ويد سلبا للاسف :\


والعفو ولو..

حياج الله..

رورو الشخبوطه said...

هلا خاتون..

امم انا حبيت وايدشغلات فيه اهي تترك اثر بس انتي اللي تحددينه..

:)

العفو ولو..

حياج الله..

Anonymous said...

يعطيج العافية على النبذة
وايد حبيت قصته

رورو الشخبوطه said...

هلا حنون..

الله يعافيج يارب..

قريتيها؟؟

وحياج الله..

Anonymous said...

ummmm

yomkin i add to my 'soon-to-read-list' :pp

مشكوووره رورو

رورو الشخبوطه said...

هلا برنسس..

العفو ولو..

حياج الله..

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

follow me

My Blog List

Ads