Wednesday, September 15, 2010
السلام عليكم ..

امس كنت احوس بيوتي بار بشوف عينات الشامبو والبلسم اللي عطوني اياها اتناسب اي نوع شعر لقيت هالمنتج ..

dry shampoo = الشامبو الجاف ..

يعني يستخدم بدون ماي ع الشعر الناشف ..

وموجود باكثر من ماركه قبل جم سنه شفته ينباع بمنتدى بس مو ذاكره كان من اي ماركه :\

هذا اهو مال بيوتي بار.

والنبذه اللي عنه  منقوله من سايتهم ..

إنّه شامبو جاف، خالٍ من مادة الطلق ويكافح آثار الشيخوخة. صُمِّمَ هذا المستحضر المميّز خصّيصاً ليمتصّ الإفرازات الدهنيّة الزائدة ورواسب منتجات العناية بالشعر والأوساخ بلطف وعناية فائقة.



مفعوله

يحافظ على تسريحة شعرك مدّة أطول، وينعشه بشكلٍ فوريٍّ بين الغسلة والأخرى. يعيد للشعر حيويته ويتركه نظيفاً وناعم الملمس يفوح بعطرٍ منعش.

ما الحاجة منه؟

• يساهم التخفيف من غسل الشعر في حمايته من الأضرار الناتجة عن تعرّضه للحرارة القويّة كما ومن بهتان اللون.

• إنّ 'دراي شامبو' أشبه بـ'عدّة استحمام متكاملة وضعت في عبوة'، إذ ينظّف الشعر بعمق كما لو تمّ غسله بالطريقة التقليديّة. بالتالي، فهو مناسبٌ للاستعمال في الأيّام التي تريدين تنظيف شعرك إنما تفتقرين فيها للوقت لخوض عملية الغسل والرغو والشطف مرة بعد مرة.

• هو الوسيلة المنشّطة المثاليّة التي تضع الانتعاش والحيوية في متناول يديك. أبقي 'دراي شامبو' في حقيبة اليد أو حقيبة الرياضة لإعادة الحيوية لشعرك قبل الخروج للاستمتاع بعد عناء يومٍ طويل في العمل.


• قد يكون تسريح الشعر المغسول للتو أمرٌ صعبٌ إن أردت القيام بتسريحات تتطلّب رفع الشعر، لذلك إستخدمي 'دراي شامبو' لإضفاء الحجم والرونق والملمس الناعم إلى شعرك، ما يُسهِّل عملية تصفيف الشعر النظيف.

الإرشادات: أميلي العبوة ورجّيها بلطف بالقرب من جذور الشعر لرشّ المنتج. دلّكيه بأطراف أصابعك حتىّ يتمّ امتصاصه، ثمّ سرّحي شعرك وصفّفيه كما ترغبين.

سعره : KD.9.900

موجود هني ..

وسويت سيرج بقوقل عنه وحصلت موضوعين عجبوني :
 
(1)
 
يحتوي الموضوع ع معلومات عنه وطريقة استخدامه وافضل 8 منتجات منه ..
 
 
(2)
 
يحتوي الماء في بريطانيا على الجير وهو أحد الاملاح المعدنيه التي تسبب تقصف الشعر,ويوصي الخبراء بضرورة عدم غسل الشعر بالماء المحتوي على هذا الملح ,ولذا لاتغسل

البريطانيات شعوروهن اكثر من ثلاث مرات في الاسبوع ,ويزكي لهن خبراء العنايه بالشعر الشامبو الجاف الذي يعد بمثابة سلاح سري للحفاظ على نظارة الخصلات .جربي شامبو Magic Dry Shampoo

الذي يعمل على تكثيف الشعر وإنعاشه في الوقت ذاته.



رايي :
 
كفكره مو وايد متقبلها بس احس يفيد باوقات معينه اللي مانقدر فيها نتسبح لظروف صحيه ,ولما كلش ماعندنا وقت , واتوقع يفيد وايد البنات اللي شعرهم دهني لانه مهم يتسبحون بسرعه يدهن :\
ومن ناحيه 2 مفيد للدوله بحيث انه بنوفر ماي خخخ..
 
في احد مجربه من قبل؟؟
 
**ملاحظه بيوتي بار مو سايتي ولا انا الوجه الاعلاني او الاعلامي مالهم بس جربتهم مره وعجبني منتج فضفته بس توضيح عساس مايصير عندكم لبس الله لو اهو مالي جان بدعت خخخ البضاعه اخلصه ع نفسي :)

38 comments:

Made n Q8 said...

انا اذكر دازيلي ايميل عن منتج نفس طقه الي انتي حاطته بس ماجربته

خوفج يدبق الشعر

يعطيج العافية

cheese 7cake said...

اول مرة اسمع عن هالمنتج بس مو متقبله الفكرة كلش ...

Unique Girl said...

اول مره اسمع فيه غريبه

شلون اغسل شعري بدون ماي ؟؟

نعيش ونشوف

يعطيج العافيه ومشكووووره

Anonymous said...

كللش مللش مو متقبلة فكرته!
الشعر لازم تطلع فيه ريحة و ما يوخرها غير التسبح والغسل
بس يعطيج العافية على هالخبر، حدج صدمتيني لووول

ذهب صافي said...

...
السلام عليكم وايد يعجبني بلوقج ومواضيعج بس ولا مره
أرسل كومنت علي اي شي
الصراحه الفكره كلش ما اعجبتي احس ما ينظف الشعر
زين الدهون وين تروح ؟تختفي مستحيل
احس راح يدبق الشعر من الشامبو
يسلمو علي المواضيع الحلوه

swera said...

jarbeeeh 3aleech gabel b3den golilena etha yeswa wella la2 lol :P

VELVET said...

سمعت عنه وايد واعتقد يفيد وقت الحرج احد يايج على غفلة والا ظرف طبي
بس مادري ليش احس ماينظف !

Crazy Girl in aGood Way said...

تصدقين مومتقبله فكره اغسل شعري بدون ماي


حلاته رغوه وتغمضين عيونج ويدخل الشامبو وتطلعين عيونج حمرا ههههههه


اهم شي اثار الشيخوخه وماده الطلق ؟؟

الوتيــــــــــن said...

تصدقين عندي واحد من بوتس صارله سنه عندي وما ايا على بالي اجربه !!!!

BookMark said...

أول مرة أسمع فيه
بس اعجبتني فكرته!
يصلح حق الشعر الدهني مثل ماقلتي
وحق الحالات المستعجلة
أو تخلينه بالجنطة مثل ما قالوا يمكن يدهن الشعر فجأة ;p
يعني مفيد للطوارئ :)

يابختي said...

انا ماجربت هالشامبو بالذات بس جربت من نفس البراند... وايد وايد حلوين منتجاتهم واسعار غالية شوي بس شنو يفيدون الشعر وينعشونه... ودي اطلب من بيوتي بار بس للحين مو متحمسة...بالعافية اغراضج


يابختي معاج

koko said...

انا شعري من صبغته صار دهني بطريقه مو طبيعيه

اغسل شعري والله بدون مبالغه ثاني يوم يبدي يدهن :/ لوع جبدي انا خبري الصبغ ينشف الشعر ما يسوي جذي

تسلمــين عالبوسـت المفيد

Anonymous said...

انا جربته بس من شركه ثانيه اخذته من لندن

هو مكون من بودره مضغوطه ترشينها علي الشعر وتدلكينه وبعدين تمشطينه عشان تتخلصين من البودره الزايده

مفيد حق الطوارء

شكل الشعر يكون فرش ومنفوش

بس ما يعطي شعور النظافه لكن ينقذ عند الحاجه (:

Engineer A said...

فكرته غريبة صج

مادري جربوه وشوفو ينفع لنا والا لا :)

اعتقد فكرته مثل الجل اللي نغسل فيه ايدنا من غير ماي .. بس مادري اذا يصلح على الشعر والا لا؟ :))

يعطيج العافية

قلب طفله said...

مساء العسل :)

اول مره ادري عنه وبشرة
اختي يننها شعرها دهني :/

يعطيج العافيه خيتو

رورو الشخبوطه said...

هلا مدمد..

تهقين ؟؟

ماعتقد يكون مثل طريقة الشامبو العادي من ناحية التدبق :\

والله يعافيج يارب..

مرسي..

رورو الشخبوطه said...

هلا جيز..

حتى انا مو متقبلته بس تنفع لاوقات معينه مو بشكل دوري ..

وحياج الله..

رورو الشخبوطه said...

هلا يونيك..

من قال تغسلينه بدون ماي..

اهو الشامبو طريقته جذي نفس مستحضرات الشعر ال2 ..

والعفو ولو..

وحياج الله..

رورو الشخبوطه said...

هلا حنان..

شدعوه الريحه خخخ ماتطلع الا اذا قطنتي ..

وبعدين هذا تستخدمينه عقب يوم او يومين بالكثير من سباحتج ..

مو عقب مايرجخ دهن وتطلع ريحته قطع خخخ..

وحياج الله..

رورو الشخبوطه said...

هلا ذهب..

وعليكم السلام والرحمه ..

مشكوره من ذوقج :)

شوفي بالنسبه لي احس للاوقات معينه مثل ماقلت عقب يوم او يومين بالكثير من السباحه مو عقب فتره لما يرجخ الشعر دهن او عقب خلطات وخرابيطنا لا احس ماينفع..

واعتقد مايدبق ..

الله يسلمج يارب..

حياج الله..

رورو الشخبوطه said...

هلا سويره..

خخ الا شعري ماجرب عليه وعليه انقرض ..

وحياج الله..

رورو الشخبوطه said...

هلا فيوليت..

حتى انا احس مابنظف اهو حلاته اذا مضطره مثل ماقلتي مو ع طول ..

وحياج الله..

رورو الشخبوطه said...

هلا كريزي..

لا وي مو حلاته يدش بعيوني مااحب هالشعور خخ..

اهو طبعا مو مثل الشامبو العادي ولا راح نستخدمه باستمرار بس الاوقات محدده ولما نكون مضطرين بعد..

لا تدقيقين بالكلمات خخ ..

وحياج الله..

رورو الشخبوطه said...

هلا الوتين..

اذا مانتهى جربيه وعطيني خبر بليز ..

ومشكوره..

رورو الشخبوطه said...

هلا بوك..

اي مفيد بس مايندرى شلون النتيجه .؟؟

مادري اتهور واجربه خخخ..

وحياج الله..

رورو الشخبوطه said...

هلا بخ بخ..

وين مدونتج؟؟

حتى انا جربت العينات ومبدائيا زينه..

وصاجه اسعار شويه غوليه بس اذا مفيده تسوى نقط فلوسنا عليها ..

وليش مو متحمسه؟؟

حياج الله..

رورو الشخبوطه said...

هلا كوكو..

وي كلمتي الصالون اللي صبغتي شعرج عندهم يمكن عندهم حل ..

اي رفيجتي جذي شعرها دهني وايد بس اهو طبيعته جذي..

الله يسلمج يارب..

حياج الله..

رورو الشخبوطه said...

هلا غير معرف..

انتي اول مره تردين بمواضيع ولا ع طول ؟؟

لانه في غير معرف كل ترد واستانس ع ردودها اتوقع انتي :)

ومشكوره ع عرض تجربتج ..

اي اهو تقزوره لمواقف معينه ..

وحياج الله..

رورو الشخبوطه said...

هلا انجو..

الله يعافيج يارب..

وانتي جربي المعقم ع شعرج خخخ لا اتغشمر :p

انا اذا حصلته بمحل جدامي بشوفه اذو ولمني شكله باخذه ان شاءالله..

وحياج الله..

رورو الشخبوطه said...

هلا قلب..

مساء النور والسرور..

مسائج قيمر :)

ان شاءالله تجربه ويفيدها ..

ويعافيج يارب..

مشكوره..

خاتون said...

بيني وبينج يخوف
مع انه كفكرة حلوة
بس أكاد أجزم وركزي على أكاد أنه له مضار والكيميكال اللي فيه إلا ما تبين آثاره على المدى البعيد بس مو وايد بعيد
ما اتوقع أجازف أجرب شي جذي غلا بعد أستشارة طبيب ومعرفة التكنيك و الفكرة العلمية اللي من وراه
بس يعطيج العافية على المعلومة اليدية ولأنج مخليتنا مواكبة الحدث
*_^

Unknown said...

مدونة ممتازة
بالتوفيق
www.abirelshouq.com-
www.abirelshouq.com/vb

ROro Mania said...

ودي اجرب هالشامبو

ينباع ب سيفورا بعد

Amal Kh said...

انا سامعه فيه من قبل جم اسبوع وزين انج كتبتي عنه لاني كنت ابي اعرف شنو فايدته بالضبط وشلون استعماله
ومشكوره انج سويتي هالبوست
ويعطيج الف عافيه

رورو الشخبوطه said...

هلا خاتون ..

وي وي مافكرت انه مضر :\

بس عموما اهو مو اللي دايما للحالات طارئه مو دايمه وان شاءالله مايضر ..

الله يعافيج يارب..

وحياج الله..

رورو الشخبوطه said...

هلا عبير الشوق..

مشكوره..

واجمعين يارب..

رورو الشخبوطه said...

هلا رورو..

صج بروح اشوفه واذا جربتيه عطينا خبر لو سمحتي..

ومشكوره..

رورو الشخبوطه said...

هلا امول..

العفو ولو..

والله يعافيج يارب..

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

follow me

My Blog List

Ads