Friday, April 9, 2010
السلام عليكم ..
امس كانت الحلقة الاخيره من مسلسل نور في سماء صافيه ..

وركز المسلسل على قضيه اساسيه العنف الاسري وخصوصا ضد المرأه ..
ومعظم ابطاله نساء ..
1- سعاد عبدالله : ام بدر "صافيه" زوجة الفنان عبدالامام عبدالله الذي يعاملها باشد قسوه يسرق مالها وذهبها ويستغلها اسوء استغلال بالاضافة الى انه سكير و صاحب نزوة اما ردة فعلها هي الصبر عليه مدة 37 سنه ..
ولها منه ابنان و 3 بنات هم :
-بدر : "احمد ايراج" دكتور ورث سلبية امه احب فتاة ماتت فبل عقد قرانهم بايام قليل وظل ممتنع عن الزواج حتى تعرف ع احدى الفتيات..
-جاسم : "حسين مهدي" محامي يقع بغرام صديقة شقيقته حوراء "بثينة الرئيسي" ويتزوجها رغم اختلاف المذاهب بينهما .
-غدير: "فاطمة الصفي" هي مطلقة وام لطفل ..
- ديما : "شوق" مالها دور يذكر وجملتها الوحيده شلون امي مستحمل ابوي خل تطلق منه << طبعا بما معناه :) تسريحتها عجيبه جنها ماروكو خخخ..
- اروى : "صمود" الابنة الصغرى و مدللة والدها تقع في حب 2 احداهما زميلها بالجامعة والاخرى دكتور زميلها بالعيادة ..
و تضم العائلة:
- حصة : "ملاك"حماة صافيه تعرضت للظلم من اخيها فقد اعماه الطمع وزوجها اكثر من مره اخرها من صديقه الذي كان يعاملها بقسوة ..
- الجدة : ماذكر اسمها بس دورها يتمثل بالمراءه المسنة "الملسونة".
- الخالة : مي البلوشي وهي تعاني من مرض مميت..
- منو بعد !!
اي تذكرت ..
-غدير صفر : اعتقد اسمها تهاني شي جذي "شريجة صافيه" من فئة غير محددي الجنسية "البدون "..
-فاطمة سالم :"رهام" هي ابنة اخ صافية وفتاة "كريه" ولعوب..
اعتقد هذول اهم الشخصيات ..
الجدير بالذكر انه مؤلفة المسلسل هي وهج ..
بالنسبه الرايي :
القضيه حلوة لكن كالعاده مانقاشوا او ووضعوا حلول او طرق لحل هذا المشكله باقل خسائر هم في تمطيط بالاحداث ..
للي طافه وحاب يشوفها موجوده بيوتيوب :)..
وللي شافوها رايكم بليز :)

35 comments:

bokeh of magic * said...

انا ماعجبتني المسلسله كانت عاديه و ما حسيتها تناقش قضيه بس احداث تصير بالعايله
الحلقة الاخيره كانت غير متوقعه و هذا شي من صالحهم لانه لو كانت متوقعه جان كرهت المسلسله P:
يعني اقدر اقول عنها تمشي حالها و تقزورة وقت

Abdulwahab said...

انا ما شفته بس وايد ناس كانوا يتكلمون عنه في الفيسبوك, و تدرين توني اكتشف ان المسلسل اسمه "نور في سماء صافية" و انا طول هالوقت عبالي مسلسل "نور" في قناة اسمها "سماء صافية" لوووووووووووووووووووول , مشكورة عالبوست :)

Anonymous said...

يسعد صباحك..

والله ياختي.. هالمسلسلات تجيب الهم.. والوضع مهوب ناقص..

كلة حزن وبكاء وصياح ومشاكل..

تقبلي مروري

ebtsamh said...

ما اتابع مسلسلات كويتية ..

وصـرت متفائلة وايد :)

iguiwaman said...

شكرا لك على المعلومات ...المسلسلات الكويتية تمتاز بهامش من الحرية وهدا يعطيها مصداقية لدى المشاهد ...وربما ستسحب البساط من المسلسلات المصرية والسورية فمزيدا من الابداع وتحياتي لاهل الكويت

daloo3a said...

كل ما اشوف اعلاان هالمسلسل اقول بشوفه ولكن ما اشوفه

زين يوم قلتي لي شو سالفة المسلسل ^^

شفتي العنف الاسري يوم هاك اليوم تقوليين لي بفجرج ترا الشرع محلل 4 عادي يعني ليش تفجريني ؟؟

سمو الأميرهـ ..ツ said...

اممم
تابعت المسلسل في حلقاته الأخيره
الحلو فيه أجواء المسلسل العائلية
وأحسن من مسلسلات اللي طالعه هاليومين
كلها قضايا ما تمت لمجتمعاتنا بصلة ..
حسيت انه مسلسل واقعي ..
بس الحلقة الأخيرة ... ما عيبتني حسيتها عادية ...

شاي الضحى said...

المسلسل باختصار ناس عايشين

ماكو هدف

ما حبيته ولا احب الكاتبه مالت المسلسل كل كتابتها سخيفه

'3ShMrGiaH said...

نسيتي منتاز :p

الحلقه الاخيره ..تحسينها ناقصه..

مادري ممتاز شصار عليها ..:p

نصيحه لاحد يتابعه

Made n Q8 said...

مممم
والله هالمسلسل ناس تمدحه وناس تذمه

ومن كثر ماقريت عنه بالجرايد ماتشجعت اني اتابعه..مو اهما من يخبونا بشغله عرفي انها خرطي!!

ويعطيج العافية

ميمة السبيت said...

** والله امي و خواتي تابعوه و يقوولوون حلوو

انا اشووف بس برمضان

AuThoress said...

كان المسلسل جميل .. قريب من الحياة العادية لأسرة كويتية .. متوسطة الدخل... الامر الجيد جدا فيه .. ان هناك شخصيات إيجابية كثيرة، والعنصر السلبي قليل ، الاب و زوج العمة .. وفتاة واحدة " بنت خالهم"... مما يعني تقديم صورة إيجابية / طبيعية عن البلد,.. بعيدا عما كان سابقا ، كل الشخصيات فاشلة وسلبية..

جهد جميل

Shaikha said...

عفواً بس Being one ..

البدون \ اختلاف المذاهب \ العنف الاسري \ الاستغلال والنصب \ المطلقات وغيره
وكل هذا ما ناقشو قضايا ؟ غريبة!

عموماً، بالنسبه لي ..
أشوف المسلسل هادف و تناول قضايا وايد واقعية بالكويت ، ما كان مأساوي وايد .
كان في مقابل الحزن .. فرح ، ملجة وزواج وغيره .. يعني عائلة كويتية طبيعية والاشياء الي صارت لها ممكن تصير بأي عائلة من عوائلنا
الكاتبة ما يابت شي من الخيال !

الحلقة الاخيرة حسيتها مبتورة .
كان في ثغرات بالمسلسل أكيد ، وهذا شي طبيعي .. مسلسل عالمية كانت ثغراتهم لي الراس فما بالكم p; !

عموماً انا استمتعت خلال مشاهدتي للمسلسل ولو ما استمتعت فيه ما تابعته للحلقة الاخيرة :) !

قواج الله

Shaikha said...

عفواً بدليه ..
مسلسلات عالمية !
لول p;

Engineer A said...

صارلي مدة ما اتابع مسلسلات كويتية أو خليجية :)

رورو الشخبوطه said...

هلا بينغ..

اهو في قضيه بس ماناقشته بحيث اثارة او طرحت حلول مناسبه ولا اهي تحجت عن العنف الاسري بشكل اساسي وتناولت قضيه فرعيه مثل زواج من مذاهب مختلفه -التحرش بالعماله المنزليه-البدون .. الخ..

اي مو متوقعه بس مثل ماقالوا البنات ناقصه جم جزئيه..

اي بالضبط اهي جذي ..

وحياج الله..

رورو الشخبوطه said...

هلا اخوي وهابي..

خخخ لا اهي ع ابوظبي ..

والعفو ولو حياك الله..

رورو الشخبوطه said...

هلا عناي..


اي استغفرالله..

بس ع الاقل نطلع من الروتين :\

حياك الله..

رورو الشخبوطه said...

هلا ابتسامه..

دوم ..

وحياج الله..

رورو الشخبوطه said...

هلا اخوي اوتو..

اتمنى هالشي واتمنى ترد لامجادها مثل قبل..

وحياك الله..

رورو الشخبوطه said...

هلا دلوعه..

يمديج تشوفينه :p

خخخ انتي شريجتي مو فهذا شي بسيط العنف الاسري انه اكفخ ريلي خخخ..

وحياج الله..

رورو الشخبوطه said...

هلا سمو..

اي جوه حلو مو سوالف المبالغات باللبس والمكياج والاثاث..

تحسين ناقصه احداث..

وحياج الله..

رورو الشخبوطه said...

هلا جايونه..

اهو يبيله احداث احس ينفع كسهره تلفزيونيه حلقه وحده مو 30..

انا هذا 2 مسلسل اشوف لها اعتقد اهي كاتبه القدر المحتوم ! اذا اي هذا احلى منه ..

يعني نوعا ما تطورت..

وحياج الله..

رورو الشخبوطه said...

هلا غشمرجيه ..

كنت بكتب عنها بس ماعرفها الاصلي خخخ...

اي صح الظاهر للحين منخشه بالدوانيه :\

وحياج الله..

رورو الشخبوطه said...

هلا مدمد..

خخ مثل هيلقيات :p

والله يعافيج يارب..

حياج الله..

رورو الشخبوطه said...

هلا ميمه..

عاد رمضان والياي في وايد مسلسلات :\

وحياج الله..

رورو الشخبوطه said...

هلا AuThoress

هم البنت الصغيره تبط الجبد ..

بهالناحيه يمكن اي بس لازم نركز ع القضايا بشكل اكبر بحيث نطرح مو لمجرد الطرح انما لمحاولة طرح حلول له ..

حياج الله..

رورو الشخبوطه said...

هلا شيخة..

بس ماحس طرح حلول لها جنه طرح لمجرد الطرح بس يعني الابو لما فلس من كل شي رد للام شالفايده :\

المفروض نعرض حلول لهالمشكله خصوصا انها مو شي هين..

بالنسبه للبدون طرحوه كاشاره بس لها بسياق الاحداث ..

مو لازم تيب شي من الخيال حلوه الواقعيه الاحلى انه نوظفها لحل المشكلات اللي نطرحت ..

اي صح احنا ننقدها مو عشان نطلع عيوبها لا حشى الهدف اهو تعرف غلطاتها وتحاول تفادهم المره اليايه :\ << بحالة انه قرته خخ..

اكيد ودوم مسمتعه ان شاءالله..

مشكوره وحياج الله..

وعادي البدليات ملح الكلام :)

رورو الشخبوطه said...

هلا انجو..

يمكن لانج لاهيه بشغلات 2..

وحياج الله..

أندلسية said...

هذا يمكن اول مسلسل خليجي أتابعه من البداية لين النهاية من سنوااااااات
و ذكرني بسبب كرهي للمسلسلات الخليجية -_-""""""
طبعاالنص من أوله لين آخره ثغرات و الشخصيات سطحية كالعادة <_<""
غير أنه الإخراج عبيط و ما ساعد ابداً
و ما أحس التمثيل\الأحداث واقعية
بالمختصر المفيد ما استمتعت فيه :0
هذا إذا كانوا يسون مسلسلاتهم عشان المتعة.. المميزات السابقة تمنع أي طيف متعة.. هذا غير الهم و النكد يالي صاير حالة عامة في المسلسلات الخليجية..
أكتب مسلسل بروحي أحسن خخخخخخ XD

رورو الشخبوطه said...

هلا اندلسيه..

اتوقع بيصير الاخيير بعد ..


موكا الشخصيات في شخصيات جوهريه في سطحيه مثل ديما ..

خخ طبيتي فيه وعقب ضحكت لما قلتي مميزات قصدج العيوب خخخ..

لا ماعتقد للمتعه شالمتعه بالطق والصراخ :\

وصاجه كله نكد بس اغلب الكوميديا صاير ماصخه فماكو بديل :\

اي اذا عندج موهبه كتبي :p

بس حسافه ع الساعات اللي ضيعتها عليه مدام مو عاجبج :\

وحياج الله..

أكتب مسلسل بروحي أحسن خخخخخخ XD

Crazy Girl in aGood Way said...

قبل ارجع الكويت كنت اشوف دعاياتها وشكله المسلسل حلو بس بدات حلقاتهم وانا بالكويت وماعندي وقت اشوف التلفزيون لاني مليته منه بجيرمني

اذا رجعت ان شالله اتابعها اذا انعرضت وبالنسبه اشوف مسلسل في الانترنت انسي اقعد 6 ساعات يمكن اكثر واااي اتعب ... افضل اشوف المسلسلات بالتلفزيون

شكرا :)

رورو الشخبوطه said...

هلا كريزي..

صح اهو احلى بالتلفزيون بس اذا طافتني اشوفها بلاب توب..

العفو ولو..

حياج الله..

cheese cake said...

ماتابعت هالمسلسل بس شفت جم حلقه ما عجبني وايد ...يمكن مليت من كثر المسلسلات بس بخاطري اتابع مسلسل استفيد منه بس وين ماكوووو....

رورو الشخبوطه said...

هلا جيز..

اي ماكو فايدة بس اثارة القضايا وساعات مبالغة فيها ..

وحياج الله..

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

follow me

My Blog List

Ads