Sunday, February 28, 2010
السلام ..
اليوم الصبح غصب شلعت نفسي من الفراش ورحنا المباركيه وجهتنا الاساسية كانت البلوكات لانه اخيتي تبي كلف ..
والحمدالله من اول محل حصلنا اللي نبي ..
وماشاءالله من كثر الكلف اللي عندهم تحتارين ..
هذا جزء من الحصيله اهي خذت 2 انا اخترت لها اياهم :) بس ال2 وديناه الخياط اهي كول اكثر والوانها فرايحيه ..
والوردة هذي خذيتها ابيها بروش قالي يركب لي جلاب بربع قلت اوكي قال 10 دقايق قلت لا خلاص مالي خلق انلطع ..
وفي احجام والوان 2 منها ..
هذا اسم المحل :

بس اهو يتعنفق يقولكم بسويلكم خصم ولما يحسب ماينقص ولا فلس ..
انا مو من النوع اللي يكاسر بس ليش يتفلسف ويقول بيسوي خصم خخ لما قالي السعر ماكان وايد كان 12 قلت جم حسبتها ولا يقول وحده المتر بهالكثر وال2 هالكثر<< (سعرهم الاصلي) قلت عيل وين الخصم :\ جان ينقص دينار لو مخليه امي تكلمه خخ جان خذيناهم بدينار :p
وفي عندهم كي نت << هذي احلى ميزه :)
وبطلعتنا جان نلقى هندي يبيع فراوله فخذينا منه هالكرتون عاد انا مو وايد احب الفراوله بس بوزع منو يبي ؟؟



عقب وعقب وعقب عناء طويل وصلنا سرداب الشايع مرينا ع اماكن فيها ريحة بواليع وانتوا بكرامه وسوق اللحم و اماكن يبنون فيها ولما لقينه قلت خل اسحب بوكي مافي الا 7 جنه ندور مكينه ماكو يمين يسار ماكو هو انقرضوا خبري كان في :\
المهم جان نشوف بنك الاهلي جان نروح له ولا السالفه فيها نخطر الشارع بيه اخاف خخخ جان اتل اختي ونسرع ..
وبالشارع ال2 اول سيارتين وقفوا لنا و ال3 كان بيدعمني انا مانتبهت بس سمعت اختي تقولي لحظه لحظه بيدعمج تخيلوا اوقف اقوله تفضل :\
وصلنا البنك دخلت البطاقة فتح الباب يخرع من داخل والصدمه المكينه خربانه :\
رحت لل2 الباب مانفتح خخخ..
واشوه كان التمويل يمه وسحبت ..
ردينا لامي وصلنا ركبنا الاصنصير انا ماحبه بس للضروره احكام دشينا ضغطنا واحد محلك سر :\ ضغطنا صفر جان يبطل الباب ردينا ضغطنا واحد ولا هم محلك سر :\ قلت اذا مانزل بطلع مابي يسكر علينا بعد بحياتي كلها ماركب اصنصير مو ناقصني رعب وصج تنح جان نطلع ..
الله يعافي الدري اول كنت اصعد للي دور ال6 بالدري ماعندي مانع خخخ..
رحت ادور منظم الجنطة ينباع بالنت شفته ب8 و5 ارخص شي 3 مادري 4 مع التوصيل 3 بيوصل 10 :\
انا اتحجى عن الحجم الكبير خذيته بدينار ونص ..




وهني متشردق ..

وكنت ابي كريم اماندا مال مصر يمدحونه لما جربته ع ايدي واغمج درجة لانه قايلين لي انه فاتح وانا احب الكريم الطبيعي او اللي يصير ع برونز لانه فايدة الكريم انه يصفي البشره لما جربته ولا ماساة ع قولة اختي يص يعني جص يعني حاطة طحين :\

فماخذيته ..


الشي ال3 اللي كنت ابيه الصبغ الاسلامي خبري فيه ايام الطفولة كنت العب فيه ..

وطلع مو الكل يعرفه..

للي ماتعرفه اهو صبغ تحطينه وتقدرين تشيلينه متى ماتبين بدون اسيتون ..

توني جربت الاحمر بس كنت حاط وايد فما انشال بسرعه المره اليايه ماراح اكثر ان شاءالله..




هذيل ع موضة 2 يصيرون مطفي مع اني ماحبه بس كتغير ..


اما السلفر فهو اللي جنه قلتر هم موضة هالسنه ..

وكنت ابي العادي بس ذهبي او سلفر مثل درجات المينكس ماحصلت :<
سعر الصبغ الواحد بنص دينار..

*وبما انه نتكلم عن صبغ الاظافر في هالشغله شريتها قبل جم يوم وتوني جربتها حبيتها اهي قطن يوخر صبغ الاظافر ..

اسمه :

boots moisturising nail polish remover pads


وايد حبيته بدال عبالة القطن والاسيتون ..

حجمه حلو ..

ريحته ماتصك الراس مثل الاستون ..

واهو من بوتس تحديدا مال الافنيوز اللي بسطرة بروي ..

سعره 800 فلس ..

وفي نوع 2 الفرق بينهم ان هذا فيه فيتامين e..

وهني صورته اوضح :)

http://www.boots.com/en/Boots-Moisturising-Nail-Polish-Remover-Pads-15-Pads_929434/?cm_mmc=Shopping%20Engines-_-Affiliate%20Window-_---_-Boots%20Moisturising%20Nail%20Polish%20Remover%20Pads%20%2015%20Pads&cm_mmc_o=-uubkbzfwlCjCKww5kbELCjCvi%20i9%20niioCjCC



وسلامتكم :)

24 comments:

ساره النومس said...

لوووول ساعات اشك اني بنت لوووول

بس استانست على هالتشكيلة الحلوة :)

F6o6a Al-b6a said...

ضحجتيني على :"تخيلوا اوقف اقوله تفضل :\ "

انا ما كنت اكلمج

بعدين من الخرعه

شكرا خيتي ..

كوكتيل said...

زين حصلتي مالت الجنطة كنت تدورينها من فترة

عليج بالعافية غلاي :)

ebtsamh said...

شخبوطه .. نفس مشاوري الصبح

اول المباركيه بعدين سوق الخام ..

وتعالي شفت مال الفراوله ..

امبيه لا يكون شايفتج وان مادري ..

حلو .. عاد يا ريتني عارفتج :)

وفرصه سعيدة ..

لمار said...

حبيبتي والله انتي بصراحة رهيبة و تونسين مومثل حلاتي بطاليةوماعندي الااقراء مدونتك كل يوم وانتظر بكرةبكل حماس عشان اشوف شنو صارمعاك بس عندي سؤال انتي موظفة وين يعني اقصد اي مجال..يعني اعتبريها مني حب استطلاع الله يسعد ايامك.

mazyona said...

لووووووووووووووووووول
حلو تسلمين

Anonymous said...

صراحه مدونتك ممتعه ومميزة

الله يعطيك العافيه يالغالية

Anonymous said...

أبيييييييييي, من أي محل لقيتي الصبغ الاسلامي؟؟؟؟ :)

-_- said...

عليكم حاجات غريبة يا بنات !

ShaymoOona said...

من زمان ما رحت وكلما اقول حق ريلي اقولي مومال عائلات طاااا هذا :/

Abdulwahab said...

لوووووووول اهم شي اللي بغى يدعمج , بعد الشارع ما فيه تمشي ركضوا!!

خوش اشياء عليج بالعافية مع اني صبي راز ويهي لووووووووووول, مشكورة :)

رورو الشخبوطه said...

هلا طموحة ..

خخ لي فضيتي بتجابلين نفسج عدل الحين لاهيه :)

مرسي..

وحياج الله..

رورو الشخبوطه said...

هلا اخيتي..

اي نو سيس انا اتحجى عن الذكي اللي كان بيدعمني..

والعفو ولو..

حياكي وبياكي..

رورو الشخبوطه said...

هلا كوكتيل..

اي الحمدالله..

والله يعافيج يارب..

مرسي..

رورو الشخبوطه said...

هلا ابتسام..

انا اول شي البلوكات صوب الكلف محل وطلعت قبل ال11 و رحت السرداب ومريت صوب سوق اللحم والسلاح خلصت 12 انا بالسياره ماطولت ..

خخ مااعتقد شفتج لانه كنت لاهيه ادور المحلات..

انا اسعد ..

حياج الله..

رورو الشخبوطه said...

هلا لمار..

انا ماجربت احساس البطالة :(

بعد عمري حياج الله ..

اجمعين يارب موظفه بالحكومه :)

ومرسوو خيتو..

رورو الشخبوطه said...

هلا مزيونه..

الله يسلمج يارب..

وحياج الله..

رورو الشخبوطه said...

هلا رندا..

مشكوره ع الاطراء..

والله يعافيج يارب..

حياج الله..

رورو الشخبوطه said...

هلا غير معروف..

والله ماثبت ع اسم المحل ..

افتريت اكثر من محل اسال ولقيته عندهم ..

وحياج الله..

رورو الشخبوطه said...

هلا اخوي شارم..

ماغريب الا الشيطان :)

شغلات غريبه عليكم وطبيعيه عندنا :)

حياك الله..

رورو الشخبوطه said...

هلا شيمونه..

لا شكو عادي اهو اساس السرداب والبلوكات حريم ..

وحياج الله..

رورو الشخبوطه said...

هلا وهابي..

ماكنا نتمخطر كنا مسرعين بس مو لدرجة الركض ..

فشلة مو منظر :\


والله يعافيك يارب..

و عادي خخ حياك الله ..

والعفو ولو..

Made n Q8 said...

ناعمين الكلف مشالله

وي حتى انتوا بعد اخترب عليكم الاصنصير! حتى احنا يوم رحنا طفا علينا الليت الي بالاصنصير وقف قلبي ماصدقت تبطل الباب جان افتلت

واشوه لقيتي منظم الجنطه من زمان وانتي تبينه

والاسيتون في مثله عند الحواي بس ماركه غير قالي اخذي بس ماخذيته


واليص اقصد اماندا شفي جذي لونه خبونا فيه طبيعي وطبيعي وين الطبيعي بالموضوع!

وعلييكم بالعافية

رورو الشخبوطه said...

هلا مدمد..

مرسي..

اي احنا محضضين خخ والوضع يخوف ياحلات الدري حتى لو تكرفستي قومي وكلمي شوبينغ خخ..

اي الحمدالله..

اي كان ودي اخذه بس مالي خلق افتر ادوره ..

وخو ذوقهم خورائي وغصب طيب بيصيرون بيض :\

والله يعافيج يارب..

حياج الله..

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

follow me

My Blog List

Ads