Wednesday, February 3, 2010

روتين..

نشرت الجرائد أسماء المقبولين بالديوان وكنت احدهم وتم قبولي في الرغبة الأول هوب لأحد يحسدني ترا هذي غلطة عمري J

طبعا لا يخفي عليكم أمر الإجراءات الروتينية من تصوير 60000 نسخة من كل ورقة رسمية مرورا بالفحوصات الطبية التي تستدعي ذهابك للمجلس الطبي أكثر من مرة ولمستشفى وللمستوصف انتهاء بالديوان الخدمة..

ديوان الخدمة يعني أن تدور حول نفسك في مكان مغلق ولكل مكان رقم أي أن تعود لاستقبال لتأخذ رقم وتعود للمكان الآخر (ودوخيني يالمونه) وهلم جرا..

انتهينا من إجراءاتهم لنعود لوزارة الهنى لنتجول في ربوع أروقتها للنهي أوراقي
(وأخير تم بحمد الله )انتظري اتصلنا بك كان هذا أخر رد سمعته من الموظفة لأعود لبيت العز ابحث عن فراشي J

تم الاتصال وتم الدوام و مرت الأيام بين محاولة تعلم العمل ونصائح مختلفة ومتباينة من زميلات العمل و أعمال وأوامر منهم !!


(المعاش ماعاش)


يوم الرواتب (ها سحبتي معاشج , ترا نزل المعاش ) لسان حال زميلاتي و صديقتي تخبرني عن عدم نزول راتبها اتصلت على بنكي لأتأكد من رصيد لانصدم خخ مبدعة بالتشري الحساب وصل لي القاع والراتب لم ينزل..

راجعنا إدارة الحسابات لتخبرني الموظفة عدم توفر بنك لأنزل راتبنا به (نعم يروح أمك) راجعي البنك وعودي لنا بعد يومين !!

ومتى ينزل الراتب ؟؟ احتمال بأثر رجعي الشهر القادم لالا بتطوفني شغلات وايد وانا مو متعوده اطلب من اهلي فلوس كبرت وتعودت اصرف ع نفسي صج مايقصرون بس هم مابي..

انزين بشيك لا ماعندنا !!

الله كريم ..

ويبون نحب الدوام..

اخر امل :\(امنحوس منحوس حتى لو عطوه فانوس , التم المتعوس ع خايب الرجا )

لم ينتهي مشوار بحثي عن العمل بعد ان توظفت , بل نتيجة لعدم اقتناعي به (مالقى نفسي فيه :\) قدمت على احدى الجهات المستقله في اخر يوم لتقديم بها وكان هذا بعد مضي سنة ع تخرجي و اشهر عدة تقارب ال8 على عملي.
وكانت احد متطلباتها هو اجتياز دوره سجلت بها واستمعت فيها جدا (الحمدالله شغلت مخي بعد ماجيم من الروتين القاتل) .
بعد شهر تم الاتصال بي لاجراء مقابلة التوظيف وهناك التقيت بهم كانت اسئلة بمنتهى السخف وكنت (خايفة حدي من اخاف اعرف انه السالفه ماراح اتم :\) .
و بعد انتهائي منها اخبرتني صديقتي بان هناك من كان ينتظر مقابلته معنا وتلقى اتصال من ادارات اخرى تطلبه للمقابله بعد سواله عن شعبة التخصص (المطلوب صحافة) بس كالعادة تم تطنيشي انا وصديقتي :\
عموما لم يتم قبولنا لامرين :
1- يريدون ذكور فقط لانهم ذكور رغم ان المتقدمات من الفتيات هم افضل منهم وبشهادة القائمين ع مقابلات الاختيار (لم يتم توضيح هذا الامر بالاعلان).
2- عدم عملي بالصحافة .

سوال يسدح نفسه جان سؤلونا قبل لا نقدم عن هالشي شكو يعنونا ع الفاضي :\

بس قالها الرويشد من متى صابت معي حتى تخيب البخت عمره معي ماصدق ..

و هم ال3 ثابته حطيت عليها اكس بشده خخخ..

تم بحمدالله :)

ومشكورين ع متابعة :)


20 comments:

ba6alah said...

yallah kheerah Inshallah

شاي الضحى said...

من يداوي الجرح الي ما يطيب (الواسطه)

من يرد اللي من ايامي انسرق (ليلحين بطاليه)

البحر عالي وفي صمته رهيب (وحق غيرنه البحر هادي)

BookMark said...

يختي محد لاقي نفسه بمكانه .. شفينا طموحنا فوق فوق p;

يالله ان شاالله خيرة لج هالمكان ..
ودامه رغبتج الأولى ان شالله تلقين نفسج فيه مع الأيام :)

يعطيج العافية عالمذكرات الحلوة

Engineer A said...

ههههه

صج لوية!!

يلا الحمدلله افتكيتي واهم شي استقرارج بالوظيفة الحين ..

انا على كثر ما كنت احلم واطمح الحين اقولهم تكفون مابي مناصب متى بس التقاعد؟ :)

Sn3a said...

وييه خنت حيلي
املق شي ماينزل المعاش
انا زميلاتي ينزلهم الظهر وانا المغرب كل شوي داقه عالبنك

daloo3a said...

ماعليه هونيها و تهون

HάķöØnã✿რätatã said...

O_o
اللـــه كـريــــمـ
سبحآن الله لعله خيــر .. يعني يمكن هالمكآن خيـره لــج ..

أثبتي وجودج .. بإيــدج تغيرين الظروف التي حولك كي تتنآسب مع مآ تتمنيــن .. هيئي الجو لينآسبك ..يمكن صدق صدق يكون بعيــد كل البعد عن طموحـج .. بس إن تمسكتي بطمووحج وأرغمتي الظروف لكي تتغير من أجلك فـ ستتغير رغمًا عن أنفهآ

فــ نحن من نخلق العآلم من حولنآ .. ليس العكس

يعطيـــج العآفيــة ع هالمذكرآآت .. جميــلة رغم مرارة الشعور بالضيآع بين تلك الأمور

سلمت أنآملكِ .. والله ييسر أموورج

>> اسمحيلي ع الرمسة الزآيدة .. بس ساعات أنفعل وأقول كل شي خخخخ

دمتي في حفظ الرب ^^

ميمة السبيت said...

* شوفي يا ام الفناتق كل شي حكمه من رب العالمين ( و عسى ان تكرهوا شيئا و هو خير لكم )

انتي بنت باجر وراج ريل و سهر و طلعات و انشالله عقبها يهال و تطعيم و صخونة و اسنان يعني بالنسبة حق المره احسن شي لها الحكومة مرضيات و استئذانات و معاشج ماشي سمعي نصيحتي و خلي عنج الجهات الخاصة و مسكي مينونج احسن

بو ذياب said...

لول
لاحظت شغلتين ابمقالاتج :
1- كله خايفة حتى من غير سبب :)
2- وين ماطقينها عويا

رورو الشخبوطه said...

هلا اخو بطالي..

ان شاءالله..

ومشكور..

رورو الشخبوطه said...

هلا جايونه ..

اخييييييييييييه صح لسانج ..

ومشكوره..

رورو الشخبوطه said...

هلا بوك مارك..

مو طموح زايد اهما لو يحطونا ع اساسا تخصصاتنا جان الوضع وايد ارحم ..

يعني مو من المنطق ادارتنا فيها اللي بالمتوسطة مثل الجامعه كلنا مثل الشغل :\

مالها شغل المدة طول مالشغل ثابت ماتغير بيصير لي سنه ونص ومحلك سر وكلش ماتوقعت انقبل بهالمكان حاطته عبط وكان يبون 3 بس وانا مسجله باخر الايام :\

بس مثل ماقلتي خير ه ان شاءالله..

الله يعافيج يارب..

ومشكوره ع المتابعه ..

رورو الشخبوطه said...

هلا انجو..

اكيد لويه خو مو عيال تجار كلشي لي عندنا :\

انا مابي منصب ابي مكان القى نفسي فيه ..

والتقاعد يبيله فوق ربع قرن فما افكر فيه :\

وحياج الله..

رورو الشخبوطه said...

هلا سنعه ..

انتي بالوطني اهو يتاخر..

الباجي اغلبهم الصبح..

لا واذا فلستي يصادف يوم المعاش عطله فياجلونه خخ..

مرسوو ..

رورو الشخبوطه said...

هلا دلوعه..

الله كريم..

ومشكوره..

رورو الشخبوطه said...

هلا هاكونا ..

اي الله كريم ..

خخ من صجج بيكدوني كد ومايبين بعينهم بعد ..

قلت بيب عدتي مالت الاهتمام بالبشره بالدوام اغلب مكتبي صالون :)

ان شاءالله بحاول والله يسهل ..


الله يعافيج ويسلمج يارب ..

امين يارب..

لا اخذي راحتج ومشكوره ع النصايح حسستيني انه في مجال اعدل الوضع بدون لا اغير المكان ..

حياج الله..

رورو الشخبوطه said...

هلا ميمه..

اي خيره ان شاءالله..

اي الحكومه اريح لهسوالف بس انا مكاني معاشي شويه مقارنة بوزارات ثانيه وهم بعيد وايد عن بيتنا مره وصلت الدوام عقب ساعة ونص طريج اهي اهي ..

انا مابي خاص ودي بهيئات مستقله تقريبا مثل نظام الحكومه..

ومشكوره..

رورو الشخبوطه said...

هلا اخوي بذياب ..

خخ امبيه صح هذا الصج انا اخاف منو وايد اشياء وخاصة المجهول او بالاحرى المستقبل..

بس لحظة وين حسيت اني خايفه :\

انا حتى ماكتبت انه رازه امي او ابوي او ع الاقل رفيجتي معاي للمقابلات وغيره خخخ..

ومالي حظ اهي اهي من عقب ماتخرج وانا منقردة بس الله كريم ..

ومشكور ..

5rbish.mrbish said...

الله كريم

عسى ان تكره شيئا وهو خير لكم..


خربش

رورو الشخبوطه said...

هلا خربش..

ونعم بالله..

وان شاءالله..

مشكوره..

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

follow me

My Blog List

Ads