Friday, January 29, 2010
السلام ..
اليوم بحط لكم بوست خفيف لانه امبيه حدي مستغربه احس هذا مو مكاني اهي اهي وانا وهالبلوق الاقرع المهم الظاهر مع الدموع طاحت المعلومات :\
الاثنين اللي فات رحت هالفيلم ..
امم قبل لا قولكم رايي فيه بعطيكم نبذه عنه..
اهو من بطولة جورج كلوني ودوره يتمثل بموظف شغلته انه يروح للشركات عموما اي جهة عمل عشان يبلغ الموظفين انهم نطردوا من شغلهم واستغنوا عن خدماتهم وخل يدبرون عمرهم كيفهم السبب بقيامه بهالشي انه مو كل مدير عنده القدره او الجراءه انه يبلغ الموظف بهالامر :\
انا لو يطردوني اقولهم فرقاكم عيد خخخ ..
نرجع للفيلم و حياته كل تنقل وسفر من مكان لي ال2 الطياره اهي بيته ..
خلال هالرحلات تعرف ع وحده وحب يستقر معاه , وهم راح ترافقه موظفه صغيره عمرها 23 << بصير كبرها فدققت ع حجيها لما قالت انا توقعت بهالعمر اصير ام و الخ الخ انا توقعت اكون ميته :\
رايي بالفيلم..
ولا بيزه مو حلو احلى شي فيه الممثل :\
الفيلم خلص واحنا طالعين لقيت سطرة شياب قاعدين قلت لاختي الظاهر حسبالهم ماخلص خخخ ..
ع طاري عندي سوال :
ما ودكم ترد السينما فتره الراحه بين الفيلم انه تقسمه نصين؟؟
انا ودي ووايد بعد خصوصا انه افلام تكون حزة صلاة فعلى الاقل نطلع نصلي ونرد نكمل واحنا مرتاحين ..
*********************************
والاسبوع اللي فات رحت مطعم زعتر وزيت ...
المنيو يونس .

طلبنا بيتزا ..(زينه مو وااو)

عروسة لبنه شفتها بايميل وتشوقت اذوقها وذقتها وكانت يمي يمي ..

لحم بعجين اختيار اختي شرايكم بالحركات خخ انا افتح واختي ودها تهفني بالكاميرا (حبيتها لزيزه)..


هذا نقانق بالجبن هم زين ..


الفاتوره ..


عن نفسي حبيته وجان زين يفتحون بدوامنا :)

ومرسوو ..

26 comments:

شاي الضحى said...

عدل كلامج الفلم ولا ببيزه ما عجبني يملل ... بنص الفلم السينما فضت الناس اطلعوا

لا انا ما أأيد البريك بنص الفلم الا بالأفلام الهنديه لانها طويله ... واذا على الصلاة احنه كله نختار فلم ما يكون حزة صلاة فنطلع ومو طايفتنه ولا صلاة

زعتر وزيت لذيذ كله اطلبه بالبيت ومره وحده قعدت فيه بس مو بالكويت بدبي

عليكم بالعافيه :)

Eluded Euphoria said...

نصيحتي لج ذوقي الحبش ياااوليلي لذيذ اكو منج صاج اذا تبين يقرمش و اذا تبين خبزه اثقل .. يعني مثل خبزه ايرانية بيضه, جربية بالفرن.. انا اللي بالفرن عندي احلى..
و ثانكس علموضوع كان بخاطري اشوف الفلم عاد هههه الحين هونت

Unknown said...

يميم شكله الاكل يشوق بالعافية:)

militco said...

هلا اختي والله الفيلم حلو بس عيبه المط الي فيه طولوا بالقصة شوي:).

زعتر وزيت كفتة وبس بالنسبة لي :).

تحيات ميليتكو

militco said...

لكن كلوني مستواه اكبر من الي قدمه

يعني النجاح درجات من الجيد الى الممتاز

اعطيه درجة جيد خصوصا ان الفكرة جديدة وحلوة:).

رورو الشخبوطه said...

هلا جايونه..

احنا من الاول السينما كانت فاضيه ..

عكسنا احنا نختار العصر ولا الظهر لانه احب ارد مبجر :\

بالعافيه يارب زين يعني حتى التوصيل فرش خفت يطلع التوصيل مو شي ..

والله يعافيج يارب ومشكوره..

رورو الشخبوطه said...

هلا براون..

شوقتيني اجرب ان شاءالله بالمرات اليايه ..

واذا خاطرج تشوفين الفيلم ياتاخذينه ديفيدي بنص خخ ولا تروحين له يوم الاثنين ويخب :\

ولكم ..

وحياج الله..

ba6alah said...

7asafa 6ela3 el film mo 7elow

رورو الشخبوطه said...

هلا زبوطة..

انتي هنا يامرحبا يامرحبا خخ..

اي خبرج تصويري اللي محليه :p

والله يعافيج يارب..

حياج الله..

رورو الشخبوطه said...

هلا اخوي ميليتكو ..

بالنسبه للفيلم صاج في تمغيط واساسا مافيه احداث تسوى ولا قصه ..

وهم بنت الديره مثلك تمدحه لانه كل واحد وذوقه للحين تعادل انا وجايونه مو عاجبنا وانت وبنوته عاجبكم :)

وع مستوى كلوني الصراحة اول مره اتابع له شي اذا ماخانتني الذاكره..

خخ يبيله زعتر وزيت مره 2 وبجيك ع الكفته..

وحياك الله اخوي ..

رورو الشخبوطه said...

هلا اخوي بطالي ..

مو عند الكل مو حلو انا وجايونه ماعجبنا بس اخو ميليتكو و بنت الديره عاجبهم يعني تعادل لي الحين :)

وحياك الله..

daloo3a said...

افلاام هالسنه كلها ييييييييييييييع

انا كان في خاطريه اشوف هالمطعم

شفت اسمه في نشيد فرشي التراب خخخخخ

كنت اتمصخر ع الأسم بس شكله حلو

^^

Engineer A said...

شوفي بالنسبة لفترة الراحة بين الأفلام انا ما أأيدها بس افضل انهم ما يحطون أفلام بحزة الصلاة..

يعني يوقتون الفيلم على موعد الصلاة ينتهي مع الأذان او يبدي بعد فترة الأذان .. شي جذي ما احب يقطعون اندماجي بالفيلم :)

وعليكم بالعافية الأكل .. يوعانه :/

رورو الشخبوطه said...

هلا دلوعه ..

توها مبلشه وهذا اول فيلم فنااقدر احكم ..

جربيها جايونه تقول عندكم بدبي :)

وحياج الله..

رورو الشخبوطه said...

هلا انجو..

اي جذي احلى بعد..

والله يعافيج يارب..

وحياج الله..

Made n Q8 said...

لا ما هقيتها منك يا كلوني !
علامه قام يخوره على كبر

وعلييكم بالعافية

ميمة السبيت said...

** تخيلي رحنه انا و ريلي افاتار الساعة 12 و نص بالليل و انا كنت قاعدة من الساعة 8 الصبح @@

5 مرات نمت و قعدت و الفلم مو راضي يخلص و انا اصلا ما احب افلام الخرالبيط والله طلع من جبدي

جربي التيركي من زعتر و زييت مو صج بس تتلف

بالعافية :)

A Human said...
This comment has been removed by the author.
A Human said...

الفلم الكل يقول عنه سخيف ... ما توقناها من جورج كلوني P: ... وزعتر وزيت ما رحتله الا مرة وحدة وكل ما اقول حق ربعي ابي اروحله يقولون لا مو حلو ... بس انا لي الحين مقتنع انه مطعم حلو ... يعطيج العافية :)

Fishah said...

انا ماحب يردون البريك .. حلاته الفلم سنه وحده بدون بريكات

وعليكم بالعافيه

ماميتا said...

ليه مو حلو ؟؟؟ عاد انا احب جورج كلوني توقعت فيلمه حلو ؟؟؟
:::
الويكند ان شاءالله بننزل البحرين
يعني اشوف فيلم غيره؟؟
انا عارفه باجلس اتخير وفي الاخير بدخل مع عيالي اطالع معهم افلام ديزني خخخخ

رورو الشخبوطه said...

هلا مدمد..

الشكو لله الكبر شين خخخ..

الله يعافيج يارب..

مشكوره..

رورو الشخبوطه said...

هلا ميمه ..

وي جان ناقزتي جود تصحصحين خخ انا بالافلام اصحصح اشوه بس ماجربته متاخر:\

عاد يمدحونه بروح له ان شاءالله..

ان شاءالله اجربه ..

والله يعافيج يارب..

ومشكوره..

رورو الشخبوطه said...

هلا اخوي اي ..

لا في ناس عاجبهم خخ ...

وهالدرجه افلامه قويه يبيله اشوف له شي قديم..

لا صح اهو حلوو..

والله يعافيك يارب..

ومشكور..

رورو الشخبوطه said...

هلا فشه..

ساعات ودي اروح اشتري او الحمام وانتي بكرامه بس اخاف يطوفني شي :\

خخ..

والله يعافيج يارب..

مشكوره..

رورو الشخبوطه said...

هلا ماميته..

مو حلو لانه مافيه قصه ..

اهو حلو بس فيلمه لا :)
:::
تروحين وتردين بالسلامه ع راحتج عن نفسي ماعجبني ..

خخ ياحلات افلام ديزني :)

وحياج الله..

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

follow me

My Blog List

Ads