Saturday, January 30, 2010

لمن لديه واسطة..

اممم في البداية دعوني أعرفكم بنفسي فتاه كويتيه ابلغ من العمر 21 ربيعا حديثة التخرج من جامعة الكويت تخصص إعلام شعبة صحافة .

كباقي المتخرجين من الجامعة او الهيئة بدأت البحث عن وظيفة كنت متفائلة حيث إنني ولله الحمد امتلك أهم المؤهلات من معدل مناسب و تخصص مرغوب و طموح ورغبة وحب العمل والانجاز, بحثت في الصحف عن اعلانات لوظائف تناسبني كما بحثت في مواقع الانترنت , لتكن النتيجة التقديم في بنكين عن طريق مواقعها و التقديم لأحد وكالات أنباء خخ بالتأكيد لا اقصد كونا و لاحد شركات البترول وبالتاكيد لديوان الخدمة المدنية.

النتيجة ستكون ع مراحل..

أبدائها بوكالة الأنباء ذهبت في البداية لتصوير مستنداتي الرسمية فاهو احد متطلبات العمل نسخ كثير لا اعلم مدى أهمية جمعها لديهم مع أن رفض توظيفنا هو أمر محتم ، وصلت للمكان المحدد قدمت أوراقي وعبئت استمارة التي لو كنت مكان لجنة القبول لقبلت نفسي وذلك بسب المعلقات التي كتبتها والتي بها حاولت أن أقنعهم بقبولي وعرضت لهم إمكانياتي ، وعند انتهائي من الاستمارة تم تسليمي ورقة تحتوي على موعد امتحان التوظيف دون وضع رقم عليها ليخبرني الموظف انه سوف يتم الاتصال بي لتحديد رقمي نظرا لعدم تواجد الموظف المختص بهذا الامر .

و كالعادة بحثت عن معلومات عنها بالانترنت لاجد من يمدحها والاخر يذمها واخر يخبر بان قبولهم يتم قبل نشر اعلان التوظيف بالصحف !!

نعود لورقة موعد الامتحان انتظرت اتصالهم بي منذ منتصف شهر يوليو وحتى يوم الامتحان في 10 من أغسطس وأنا انتظرهم لأقوم انا بالاتصال بهم استفسارا عن رقمي وللتأكد من موعدي وهذا أول مأخذ عليهم (لا توظفوني بس عاد مو من اول شي تكشتون فيني) لغير الكويتين لا توظفوني لكن لا تطنشون بي ...

وحان موعد الامتحان قرأت الجرائد لأنه اخبروني ان الامتحان سيكون بمحتواها ذهبت وانا خائفة وخصوصا انه لم يتم تحديد رقمي رغم ان الموظف المختص طمئنني بوجد اسمي في قائمة المختبرين اليوم.

(يوم الامتحان يكرم المرء او يهان ) الامتحان كان بمنتهى الصعوبة لم يتضمن أي سوال عن تخصصي بل أسئلة عامه .

انتهيت لأجر أذيال الخيبة راجعة إلى دياري منتظره اتصالهم لقبولي خخخ.


ملاحظات :


1-سبب نشري له اليوميات هو سوالفي مع بنات بلوقر قروب عن اهتمامات كل وحده منا وانا من اهتماماتي الكتابه ..


2- شكنت بقول :\ كالعاده نسيت في شي يقوي الذاكره :s


3- هالموضع كتبته قبل سنة وشهرين من جذي حاطه انه عمري 21 ..


4- بقولكم بعض الامثله عن اسئلة الامتحان..



ا- من وزير مادري لشنو :


1- فلان الدويله 2- فلنتان الدويلة 3- علان الدويلة 4- علانتان الدويله..



بيه انا ماحفظ الاسامي وماذكر الا العايله خخخ ..



ب- منو مدير البنك المركزي الامريكي ..... >> فراغ مو خيارات :\



فقرتين ترجمة كل وحده صفحة كامله هذيل زينين ..


و صفحتين نطلع الاخطاء >> صكني عقر بقر :\



واغلب الاسئلة عن برا مو عن الكويت .. انا توقعت بيشغلونا بقسم الاعلام فاهم شي طريقة كتابتنا واسلوبنا وصياغتنا الافكارنا ..


وكتبته بالفصحى لانه افضلهافي كتباتي خو كنت توني متخرجة وخلصه الميداني فكنت مبرمجة مخي ع الفصحى ..

25 comments:

~ Bnat Blogger ~ said...
This comment has been removed by the author.
سمو الأميرهـ ..ツ said...

مره ثانية رورو هانم لا تشككيين في قدراتج
:)

حلو المقال .. وبعدين ها حال الدنيا
بس زين توظفتي الحين ..

تدرين هالأسئلة لو حاطينها لي ما كنت بعرف أحلها أبدا ..
:|
وبالعكس أسلووبج حلو .. كاني قريته وما صابني لا ملل ولا شياته ..

:)

ولا تحرمينا من كتاباتج ..



تحيااتي

رورو الشخبوطه said...

هلا سمو ..

خخ ماشكك بس بعدي مبتدئه ..

اي للاسف صارت امورنا ماتمشي الا بواسطات :\

اي توظفت بس عقب اذا كملت لكم باكسر خاطرج خخخ ..

اي لانه يدوخون :\ مو هينين ..

بعد عمري مرسي ..


ان شاءالله..

ومشكوره جدا :)

وحياج الله..

HάķöØnã✿რätatã said...

كـ كتآبآت:
مآآآشآآءالله حلووو .. استمري .. فـ نحن فـ انتظآر مآفي جعبتك .. =)
و
أهم شي بعد هالمعآنآة
فــ الحلقة الأخيــرة توظفتي لووول

و
كـ يوميآآت:
فـ هي ذكريآت جميلة وإن كانت معآنآة .. بس يعني حلو يوم توصلين لـ شي بعد معآنآة تحسين باللذة.. يوم تتذكرين هآييج الأيآم وأحيــن =)


ربي يوفقج لمآ يحب ويرضى =)

Unknown said...

واااااي يارورو يبتيها عالجرححح
الله وكيلج الحين بيصيرلي سنتين وانا منثبرة بالبيت وماكو وظيفة مابي انقط بوزارة اشتغل بالبريد ولا انقط ورا الكاونتر بس الحمدلله الحين قاعدة اكمل ماجستير بغير تخصصي بس امري لله!
في اماكن قالولي بصريح العبارة ماعندج واسطة عيل ماعندج مكان عندنا!
شنسوي واسطتنا رب العباد وانشاالله مايقصر :(

وسالفة الامتحان التحفة سنتين على اتله وانا اقدم بهالامتحان مو امتحان حشا يبونج تصيرين موسوعة متنقلة لا وبعد ماتوفين تحلين بهالامتحان اسئلة مادري من وين يايبينها !

BookMark said...

لا تقلبين المواجع P:

للأسف الواسطة صارت اهيا كل شي .. ومن غيرها نقع شهادتك واشرب مايها ..

هههه واي حبيبتي كسرتي خاطري على هالامتحان .. عيل مشتطة وبالفصحى بعد واخرتها شنو

شنقول وشنخلي .. خليها على ربج

mese said...

هذي معانات كل المتخرجين :(

حلوه الذكريات..بس في أشياء لما ترجع تسردها وتتذكرهاتصيبك نفس الحاله.. عن نفسي أعيش نفس الحاله وكأني توه الموقف صاير لي ..خخخخ

ولا الإمتحان ذكرتيني بصديقتي لما قدمت لمقابلة التخصص..في قسم العلاقات العامه..أبد كان إمتحانها نفس جيه..طلعت مدوخه من الإمتحان..

المهم أنج في النهاية حققتي مبتغاج من الرحله الطويله للبحث عن الكنز ؛)

ودي وإحترامي..~

ميمة السبيت said...

** العنوان حده قوي والله ضحكتيني

- هذا و انت صحافة ليش ماتكتبينلنا قصص قاصة علينه بس تصورين خرابيط :)

Engineer A said...

وانا قاعدة أقرا علبالي انتي للحين حايسة وتنطرين الوظيفة وكنت بأنصحج وحيل متعاطفة معاج خصوصاً اني منبطة جبدي من الواسطات وملحقاتها..آخر شي اطلعت يوميات :)))


بس والله خو كتابة وخوش مذكرات كثري منها :)

رورو الشخبوطه said...

هلا هكونا ..

مشكوره خيتو ..

اي بقولكم عقب شلون توظفت :\

للاسف ماوصلت للي ابيه :\

اجمعين يارب وجزاج الله خير ..

وحياج الله..

رورو الشخبوطه said...

هلا زبوطة..

امبيه حتى انتي شهالدفعه كسرت خاطر نفسي ولا وحده اعرفهم متوظفه بمكان سنع ..

وزين تسوين ماشاءالله انا كنت بكمل جان يلغون الاعتراف خخخخ ..

وموفقه يارب ..

انا عيل قالولي شي 2 يبط الجبد بقوله لكم عقب ان شاءالله ..

ونعم بالله الله يعوض صبرنا خير يارب..

اي اشكره طرده :\ سليحط عاد من زين المكان انا مقدمه ع ابو اشتغل بشي دارسته ..

وموفقه يارب..

وحياج الله..

رورو الشخبوطه said...

هلا بوك..

اخييه شقول وشخلي :\

اهي الواسطه تمشيك وتعزك حتى لو بدون شهادة ..

ماذكر شهببت بالامتحان بس اقصد بالحجي الفصحى المقال (يومياتي)

والله كريم..

وحياج الله..

رورو الشخبوطه said...

هلا ميوسه..

اي للاسف..

هذا ماطلعته من ارشيفي كاتبته من زمان :)

اي امبيه شنو هذا بيعينونا شنو ؟؟ مكان قوقل مثلا!!

لا والله لي الحين ماوصلت والله كريم ..

حياج الله خيتوو..

رورو الشخبوطه said...

هلا ميمه ..

مو بس انا صحافه ..

وايد بنات صحافه بس ما يكتبون الظاهر تعقدنا خخخ..

خخ ومن قال اول مره اكتب كتبت وايد ونشرته ببلوقي شخبوطة قبل لا ادمجهم ..

والقصص مو وايد متمكنه فيها حدي مقالات ..

وحياج الله اخيتي..

رورو الشخبوطه said...

هلا انجو..

خخ لي الحين حايسه اي بس الحمدالله العوض ولا القطيعه واذا عندج نصايح ماننحرم بالعكس بتفيدينا وتفيدين باجي البنات..

:)<< ويه مستحي خخخ مرسي اهي له جزئين تقريبا او اكثر ..

ومشكوره ع الاطراء ..

حياج الله..

Fishah said...

الحمدالله يا رورو انج توظفتي وصارت هالاحداث مااااااضي :)

ذكرتيني نفس الموقف تقريبا لما قدمت على كونا خخخخخخ

حاطين اسأله مادري من وين .. منها شنو الجمعيات الخيريه اللي انتي مشتركه معاهم خخخ

موفقه حبيبتي

ba6alah said...

ghair el bonok mafe

بو ذياب said...

اللي يحر ان ليمن تخلصين دراسة .. وتبين تقدمين على مكان لازم تنسين كل اللي درستيه وتبدين صفحه يديده ..
لان اغلب اللي ندرسه ماله خص بسوق العمل :)
موفقة اختي

Crazy Girl in aGood Way said...

حبوبه لايحز بخاطرج ولا شي

انا رفيجتي الاولى على الدفعه تقول لما تخرجنا ابي احد يتصل علي يقولي وظيفتج موجوده بس ماكوووو

قلت ده كان زمان اللي يتصلون على الاوائل ويطلبونهم الحين مايدرون عن هوى دارهم


لا وقدمت بمكان لالالالازم فيتامين وااااااااو ومااقبلوها


اللي يضحك قالت انا مقدمه الامتحان ومتاكده من اجاباتي ومستعده اناقشها

قالها احنا قبلنا بس الاوائل ....


قالتله انا الاولى على الدفعه لووووووول


انتي المفروض تكونين متوقعه هالشي ومجهزة الواسطه قبل التخرج هههههههه


بالنسبه لتقويه الذاكرة الزلمات يمدحون الزعتر :)

شاي الضحى said...

بالنسبه لي .. لا تعليق


لاني حاليا قاعده اعاني

رورو الشخبوطه said...

هلا فشه ..

اي الحمدالله بس ماتوظفت ابيه :\

واي كونا ملاغه ..

شيبون مفروض تقولين مايصير هذا عمل خير لي قلت اخاف يروح الاجر خخخ..

اجمعين يارب..

ومشكوره..

رورو الشخبوطه said...

هلا اخوي بطالي..

لا في وايد مكان احسن واريح..

البنوك اغلبها ربويه والاسلامي يافي شك وم مضمون يا وايد عسرين بالشروط :\

وحياك الله..

رورو الشخبوطه said...

هلا اخوي بوذياب..

اي يحر لا والدبلوم والجامعه وحتى المتوسط يشتغلون نفس الشغل..

يعني بس نوظفكم وكيفكم :\

اجمعين يارب..

ومشكور..

رورو الشخبوطه said...

هلا كريزي..

ماتوقعت الوضع جذي كلش :\

اي توني ماكله كرواسان زعتر خخ..

ومشكوره..

رورو الشخبوطه said...

هلا جايونه..

وي ليش ..

عاد كنت ناطره تعليقج ..

وحزة الامتحان احنا وانتوا كنا مع بعض الظاهر احنا تخصصين مترابطين :\

والله يوفقج يارب..

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

follow me

My Blog List

Ads