Saturday, December 19, 2009
السلام عليكم..
وكل عام وانتوا بخير يارب..
واجازه سعيده :)
امس الله يسلمكم رحت الافنيوز خخ المهم وكنت ابي هالكافيه و فيلم امير البحار
المنيو :

بطاط مثل فكرة تويستر بس عيبه مكان الكريمه وايد ومكان شويه ..

بس لذيذ هجمنا عليه خخخ..
في كالعاده صوره مختفيه اهي كانت هالمره لسلطة السيزر و عجبتني حموضتها واختي حبت الدياي..
وهذا باستا عيبه ماصخ :\
اختي زادت ملح وعجبها ..

ملحوظه صغيره احنا اللي عندنا عادي عند الناس مالح :)



همبرغه نايس احلى من مالت فرايديز..

وحلينا بهالحلو اسمه شي جذيبافلوز صنداي براوني..

عباره عن براوني ساخنه مع برد فانيليا وفوق عليها كريمه و كاجو وكوكيز وصولص ككاو ..


واكلهم زين وسعرهم رخيص كل هذا ب11 دينار بس,,
والاهم اختي عجبها المطعم :)
***************************************
عقب رحت فيلم امير البحار للهندي كنت ناطرته من العيد وقبل يومين نزل ..




لما شفت دعايته:
قلت عسى مايقلد اسماعيل ياسين بالبحريه :\
بس طلع لا..
معلومات عنه من سايت السينما وغريبه ليش ما يحطون اسم المؤلف !!
عموما اهو من تاليف يوسف معاطي ..

القصة
تدور احداث الفيلم حول الطالب أمير الذي يفشل كل عام من التخرج من الكلية البحرية وعن حبه لجارته سلوي(ابنه عميد الكلية)ولكن عند تخرجه من الكليه البحرية بعد ثالثة عشر سنة يأخذ سفينة أبيه الخاصة ويخرج بها في البحر مع امه واخوته وسلوي (التي هربت من حفل خطوبتها) و ينفذ منهم الوقود وبعدها يأتي القراصنة ويخطفوا السفينة ومن عليها ويطالبون بفدية مالية كبيرة. وتدور الاحداث الكوميدية.
جنه كاتبين الفيلم كله خخخ ..
رايي فيه يضحك بس توقعته احلى اخر فيلم للهنيدي رمضان مبروك ابو العلمين حموده كان احلى لانه في رساله وركز على قضيه مهمه اهي التعليم ..
وهذا تحسون احداثه معروفه خصوصا عقب ماقريتوا قصه اللي بسايت السينما :p
**********************************************
وطبعا فترينا شوي في جم محل مسوي تنزيلات بس مانغو كان حايشه زلزال خخخخ..
وقبل لانطلع اختي كانت تبي باسكن فشفت هالكشك ..

وخذيت منه كب كيك ..
عجبتني علبته من داخل في شي يقضب الكيكه عساس تثبت ..
لانه قبل هالمره كنت ماخذه كب كيك من دين اند ديلوكا وكان القوطي كبير لمافتحته باكلها توقعت الكيكه مختربه بس اللي لقيته انه متكوكسه ومسويه وقوف ع الراس وثابته على هالوضعيه..



وهذا النوع اللي خذيته :
red velvet cupcakes

وكالعاده لما نجرب الشغله اكثرمن مره نقارن بينهم :
هذي الكيكه ماعجبتني وايد عيبها ماصخه اما الكريمه حلاها زايد و ناشفه :\
كيكه دين اند ديلوكا حلوه و الكريمه ماصخه بس فيها نقط طعمهم حالي وايد بسهذاحبيتها اكثر من اولى ..
اطالب المطاحن يسون لنا هالنوع :)

وخذيت هذابعد اللي لونها وردي ::

وهذا سايتهم :

15 comments:

أحمد شريف said...

أتمنى أن يدوم الدفء الأسري الذي يحتضن أسرتكم

ولي ملاحظة : برجاء اجعلي التدوينات المنشورة في الصفحة الواحدة لا تزيد عن ثلاثة لأن تدويناتك بها صور كثيرة وهذا يُطيل مدة تحميل الصفحة ويرهقنا خاصة حينما تكون هناك قصور في خدمةالإنترنت

رورو الشخبوطه said...

هلا اخوي احمد..

اجمعين يارب..

مشكور..

وبحاول ان شاءالله ترا جذي يعني مختصره خخ..

وحياك الله..

الوتيــــــــــن said...

رورو .. ياخيتي يوعتيني قمت أبولع ريجي *_*
هني وعافية على قلبج .. وعجبتني سالفة كرمبس شكلي بزرق لهم

وبافلوز تدرين عاد؟ من تخرجت من الجامعه تخيلي يعني من 2008 رحتله مرة واحده بس ** شوقتيني

حبي

الوتيــــــــــن said...

اي تعالي فلم امير ابحار مادري شفت دعايته استملقته وعلى قولتج مادري شفيه هنيدي قام يخورها ماقام يضحك نفس قبل :| اه يرحم عسكر في المعسكر ويا انا ياخالتي :("""

DoDoq8 said...

بالعافيه رورو

كرمز لذيذ جربت مره عندهم بعد الكيك الكبار

والفلم انا بعد عجبني كان يضحك وتصدقين مااذكر اني شفت الفلم رمضان مبروك او يمكن شفته وناسيه لاني احب افلام الهنيدي

وثانكس

R@ngoog@h said...

هلووو رورو

انا خبري امس علقت على موضوعج اليوم جيكت مالقيت لي تعليق ؟؟ لووول الظاهر ماكان كونفيرم وماخذيت بالي ..

عالعمووم عليكم بالعافيه .. وطبعا كرمبز ؟؟

هذا ادماااان الله وكيلج عليهم براوني ؟؟ مو طبيعي

الله يسلمكم هذا محلهم بالشعب البحري وين فلكس ؟؟ صوبه .. واللي شريتيهم اخر شي اللي فيهم عود هذولي دمااار شامل لوووول ..!!

اخر مرره بولادة وحده من رفيجاتي احترت شنو اوديلها سويت ؟؟ اخر شي رسيت على كرمبز .. ولهم طريقه نايس بالتغليف حطولي اياهم في فازة ولفاوها على طريقة بوكيه ورد وااايد نايس عجبني ..

ماقلتيلي شرايج بالموفي ؟؟

Made n Q8 said...

هلو رورو

بافلوز اخييه عالناتشوز مالهم

وكرمبز اول مره اسمع فييه يبيلي اجربه

علييكم بالعافية

رورو الشخبوطه said...

هلا الوتين ..

الله يعافيج ويهنيج يارب مشكوره ..

و اي لي جربتيه ابي رايج :)

صج عيل انا اول مره اجربه توني عرفته :)

والهنيدي طفى مو مثل العام فيلم كان حلو وكوميدي وهادف الحين لا عارفين الاحداث :\

وحياج الله اخيتي..

رورو الشخبوطه said...

هلا دودو.ز

الله يعافيج يارب.ومشكوره..

انا جربت الكب كيك اقل من عاديه ماعجبتني اما اللي جنه حلاوه لا زين وخصوصا الحشوه ..

ولا مو عاجبني الفيلم احسه مكرر وماكو رساله و رمضان اهو اخر فيلم له قبل هذا سواه العام وكان دوره انه مدرس وحب سيرين المغنيه ..

ولكم ولو حياج الله..

رورو الشخبوطه said...

هلا والله رونوقه..


انا ساعات تصير فيني هالحركه وايد اعلق وعقب مالقى تعليقي !! مادري ليش؟؟

الله يعافيج يارب ومشكوره..

وناسه عاد غرامي البراوني..

خخ وموجود بالافنيوز كشك بصوب المطاعم ..

وناسه حلوه الفكره ماشاءالله بالعافيه عليها يارب..


و الفيلم مافي رساله و مكرر واقل من عادي بس في سوالف تضحك ..

وحياج الله

رورو الشخبوطه said...

هلا والله مدمد ..

ماجربته بحطه باللسته ان شاءالله ..

حتى انا اول مره اعرفه واجربه :)

الله يعافيج يارب ومشكوره..

وحياج الله اخيتي..

شاي الضحى said...

قبل كنت شاكه انج سمجه من الحراشف الي عندج الحين تأكدت لانج تحبين الملوحه متعوده على ماي البحر ههههههههههههه

يمييي بالعافيه ولا مره جربت عندهم شي غير البرجر :)

والحلو ذكرني بساندي مال فرايديز

ما قريت قصة الفلم لاني بروحله هالاسبوع :q

ورمضان كريم ... إلخ كان حلو

@@

عندهم كشك؟ توني ادري

انا اعرف ان عندهم سايت وتطلبين منه ... بحطه بلستت الكيك حق عيد ميلاد اختي الي بعد 3 اشهر ههههه

مشكوووره :*

aboflan said...

عوافي يارورو

والله انا ماجربته هالبافالو بس الأهل يمدحونه مره طالبين منه

وان شاء الله نجربه

رورو الشخبوطه said...

هلا جايونه..

خخخ وي شكيت بنفسي :)

الله يعافيج يارب مشكوره انا هذي اول مره اجربه وعجبني ..

ومن زمان عن حلو فرايديز خبري فيه قبل لا يغيرون المنيو....

خخ ان شاءالله ويارب يعجبج ..

اي صح ..

اي يمكن يديد اهناك زحمه ماتنتبهين عليهم من كثرهم ماشاءالله..

خخ اول ذوقيه اخاف تتوهقين عقب ..

والعفو ولو.

حياج الله..

رورو الشخبوطه said...

هلا اخوي بو فلان..

اي ان شاءالله لانه زين يسوى تجربه..

وحياك الله اخوي..

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

follow me

My Blog List

Ads