Monday, November 30, 2009
السلام ..
وخلص العيد ولا حسينا فيه وخلصت الاجازه وفي ناس بتداوم خخخ ..
المهم بثاني العيد كنا بنروح المارينا بس لانه بالطريج المطر كان قوي رحنا الافنيوز وهناك كنا بنروح السينما امبيه دشيناه قلت فاضي وناسه الظاهر لانه مطر وصلنا لي السينما وعرفنا سبب انه المجمع فاضي لانه الكل رايح له الطابور لي باب الاصنصير عشان نوقف فيه لازم ندش الاصنصير خخ حلاتنا والله ..
جان نكسلها ونروح المطعم دشينا جوكلت بار..
المانيو متغير اذا ماخاب ظني وجنه رافعين الاسعار بعد :\
الوردة الجميله ..



كلوب ساندويش ..


باستا ..




وحلينا بهوت جوكلت كيك << جنه اسمها جذي..



***************************************
فاصل اعلاني..
فيووووووووووول :)




هذي هديه اخوي لولد اختي بمناسبه يوم ميلاده استانس عليها بعد عمري بنفس الوقت خبزني وملامحي راحت فيها منه اهي في مكان شبك اهو بالخيمه وانا اطل عليه ايلي ويلزق ويه بويه وعقب يهفني بيده وطبعا لما يلزق ويه يكفخني براسه اح وغير جذي لي خليته ولهيت بالنت ماوع الا الخيمه بكبره فوقي خخ..


**********************************************************

اليوم الثالث رحنا المارينا هالعيد زحمه اكثر من العيد اللي فات ..
واي صادف اللي جدامنا غرب وكل وحده بتدفع بروح تذكرتها اوكي عادي بس وحده تيمع الفلوس وتدفع مره وحده مو كل وحده عند المحاسب تطلع فلوسها يمكن 2 عندهم خرده والباجي اللي 5 واللي10 واللي 20 ومال التذاكر يشرح لهم انه بياخذ من وحده والباجي يعطونها واهما ساعه يالله ستوعبوا ولما خلصوا ما وخروا قعدوا يوزعون التذاكر ع بعض فراغه ..
المهم الفيلم كان نيو ومن الجزء الثاني من سلسلة تويلايت

امم اللي ضحكني انه وايد تفاعلوا البنات بالفيلم ولما بنطلع لفيت ولا الاغلب اللي بالفيلم بنات يعني لو الحضور 100 ع الاقل 90 منهم بنات..
الفيلم عادي توقعته احلى والصاله بارده تيمدت اصابع ريولي..
البطله بكل جزء يزيدون حبايبها ..
بالاول مصاص دماء والحين زاد المذؤب بالجزء ال3 الظاهر تحب زومبي :p
وعقب مارينا فيرجن لقيت الجزء الاول من الكتاب بالعربي اسمه الشفق امبيه متييييييييين والجزء مافي احداث وايد كفيلم وحتى لو مايسوى !!
اي دعايه الفيلم ..
ومرسي..
وانتوا شلون قضيتوا العيد .؟؟

26 comments:

شاي الضحى said...

@@

وين الجولات؟

١ ديسمبر، ٢٠٠٩ ١٢:١٦ ص

رورو الشخبوطه said...

خخ جاي..

كا نزلتهم :)

جولات مخفيه تطلع عقب ال12..

١ ديسمبر، ٢٠٠٩ ١٢:٢٠ ص

شاي الضحى said...

اي الحين طلع لووووول

توني شفت ببلوق طماشه طابور السينما مت من الضحك

يميييي انا عاوزه بطاطسايه يا رورو هههههه احب بطاطهم لذيييذ

الكلوب ساندويش مره جربتها بس مو وايد حبيتها والباستا حلوه بس عندي بينك باستا احلى

والكيكه هذي ذكرتني برفيجتي تموت عليها مره خلتني اطلبها حدها ثقيله وفيها دارك جوكليت انا ما احبه كليت شويه منها وقطيتها

شوقتيني مشتهيه ايتاليان هوت جوكليت لذيييذ

وبالعااااافيه :)


@@@@@@@

فيوووووووووووووووووووووولي حبيبي

بيي باخذه منه :q لو ادش فيه اتقلقص بخرطومه لووووول

وتويلايت ما شفت الجزء الاول الا الدعايه بس مو حابته ولا هذا بعد مو مشوقيني

-----------

الله يسلمج انا اول يوم العيد رحت بيت يدي وثاني يوم ما طلعت قاعده بالبيت وثالث يوم رحت مع امي واختي حولي وامي شرت لها عبايه يمكن ساعه ورديت وقعدت بالبيت جابلت افلام والنت

واليوم دهنت شعري لووووول صارلي 4 ايام ما دهنته :q وبعدها رخت بيت خالة امي ورديت خميت ومسحت وجابلت النت والحين بشوف فلم

شرايج فيني وانا اقولج شنو سويت بالتفصيل الممل :q

بس لاعت جبدي انطر العيد يخلص عشان اطلع واستانس ما احب الزحمه

بس لاعت جبدي انطر العيد يخلص عشان اطلع واستانس ما احب الزحمه

١ ديسمبر، ٢٠٠٩ ١٢:٣٧ ص

المباركية said...

{~المباركية~} يقول...
احلى شي بجوكلت بار البراوني و الباستا صج لذيذه

انا مافكر ادش سينما بالعيد

١ ديسمبر، ٢٠٠٩ ١٢:٥٢ ص

My Books and Me said...

أقولج الفيلم والرواية تكرمين زبالة

بس سووها خبة

حلاتهم ما يهبون في شي, تتذكرين شنو سوو على هاري بوتر والحين محد يدري عنه؟؟

تصدقين كل ما أشتري كتب من فيرجن يعطوني كتابين هاري بوتر الجزء السابع هدية!! سعره تقريبا 12 دينار =/

متخيله السالفة؟؟

طايح بجبدهم! هذا نفس الشي ترا

١ ديسمبر، ٢٠٠٩ ١٢:٥٤ ص

Made n Q8 said...

Made n Q8 يقول...
هلا رورو
شلوونج

الدوام السكه مافي كهربا والشحن بخلص اهي اهي اهي
الله يصبرني

حوش جوله مشالله

من زمان مو رايحه جوكليت بار خبري فيه على أيام الجامعه

١ ديسمبر، ٢٠٠٩ ٩:٠٦ ص

رورو الشخبوطه said...

ولكم باك..

:)

اي رحت شفته بالصج اكثر امبيه..

جان قلتيلي جان طرشت لج :)

ماحبيتها الكلوب و الباستا البينك الصولص احمر وانا ماحبه ..

انا اول مره اطلبها وكلينها انا واختي وماخلصناها كليت شويه بس الككاو لما يسيح اجرام خخخ..

شهوة العافيه..

الله يعافيج يارب مشكوره..

لا حرام يحبه خخ عاد اهو مايلعب بالخرطوم ساعه نقنعه يدش فيه مو راضي ليم دعسنا الخرطوم بالخيمه مشى شوي فيه وعقب رد:\


انا الاول شفته ديفيدي وكان زين بس ال2 مصاخه بس ودي اعرف شبيصير لانه النهايه كانت اقوى شي بالفيلم ..

ملبوس العافيه تنت :)

عفيه ع السنعه :)

بس ماقلتي نوع الدهن :)

اي خلص بدون لا نحس فيه عكس قبل :(

وحياج الله خيتو..

١ ديسمبر، ٢٠٠٩ ٣:٥٥

رورو الشخبوطه said...

هلا اخوي المباركيه..

ماجربت البراوني مع اني احبها ..

امم والسينما العيد اللي فات كانت اوكي لانه العروض مبجر الحين اخروها فصارت مصاخه..

و حياك الله..

١ ديسمبر، ٢٠٠٩ ٣:٥٨ م

رورو الشخبوطه said...

..

اي انا توقعت القصه قويه لانه كل من يقراها واهي شمتنها جنه موسوعه الجزء الواحد..

وي الظاهر طاح بجبدهم وحولو ع هذا بداله ..


اي السنه اليايه بينزل الفيلم اليديد @@

بس تدرين اهما شاطرين خلو النهايه حلو عشان يجذبون البنات..

وحياج الله..

١ ديسمبر، ٢٠٠٩ ٤:٠٣

رورو الشخبوطه said...

هلا والله مدمد..

الحمدالله الله يسلمج..


مافي كهربا @@ هزلت ..

مشكوره..

انا كل سنه اروح له مره خخخ ..

وحياج الله اخيتي..

١ ديسمبر، ٢٠٠٩ ٤:٠٥ م

Hanan said...

عليكم بالعافية :)
ذبحونا هالمطاعم كل شوي زايدين الاسعار لا و بعد في فلوس خدمة مادري على شنو !! مثل جيليز
ما احب هالافلام .. خواتي حنوا علي بالعيد يبوني اروح معاهم بس ما رحت .

١ ديسمبر، ٢٠٠٩ ١٠:٠١

الوتين said...

لوول عاد تصدقين عندي اياها توايلايت ( الشفق المترجمه) .. الجزئين ولا قريتهم .. شكبرهم ول

ياستي قضيت العيد نوم ومخيم وديفيديز .. ماكان لي خلق اطلع كلش ولي طلعنا كافيه بالعافيه اتلوني من البيت

وبدينا دوام يا رورو

١ ديسمبر، ٢٠٠٩ ١٠:٤٦

رورو الشخبوطه said...

هلا حنان..

الله يعافيج يارب..

اي مصاخه من يسمعون بزيادة المعاشات زادوا الاسعار بس الخدمه باغلب المطاعم عليها فلوس..

زين سويتي انا ماكو بديل عنها :\

وحياج الله خيتو..

٢ ديسمبر، ٢٠٠٩ ٨:٥٤

رورو الشخبوطه said...

..
هلا الوتين..

اي انا مدام في منها افلام وسوالف مراهقين ومترجمه بعد مااحب اقراها ..

اشوف فيلمها احسن لي..

اي انا مالي خلق اطلع اخطط واهون بس تصدقين الطلعه تغيير نفسيتج للاحسن..

اي انا باجر اخر يوم اجازه :(

وحياج الله اخيتي..

٢ ديسمبر، ٢٠٠٩ ٨:٥٨

Dr. Kafy said...

كل عام و انت بخير و يعيد عليكى الأيام بسعادة و هنا

٣ ديسمبر، ٢٠٠٩ ١:١٨ ص

رورو الشخبوطه said...

..
هلا اخوي دكتور..

وانت بخير يارب..

اجمعين يارب..

مشكور وجزاك الله خير..

٣ ديسمبر، ٢٠٠٩ ١:٤١ ص

Engineer A said...

عليج بالعافية ..

أنا توايلات هذا اللي ماني قادرة ابلعه!!

على شنو الخبه والبنات ميتين عليه؟!

ما احب الأفلام اللي فيها "ضحك عله الذقون" واستهزاء لعقلية المشاهد .. واستغرب ان الامريكان يموتون على هالنوعية من الموفيز!!

أحلى شي تشوكليت بار :)

٤ ديسمبر، ٢٠٠٩ ٢:٤١ ص

Fishah said...

تدرين اني ولا مره رحت جوكلت بار ! :<

الفلم شفت دعايته .. انا مو حابه البطله احسها ماكو انفعالاات بويهها استغفرالله ماتعرف تعبر

٤ ديسمبر، ٢٠٠٩ ٨:٠١ ص

Mohammed said...

...
والله جوووووووووله مية مية ووناسه جنه

عاد جوكليت بار مااكلت عنده وشكلي بجربه هاليومين


وعليكم بالعافيه وعيد سعيد مؤخرا ..

٤ ديسمبر، ٢٠٠٩ ٣:٤١

رورو الشخبوطه said...

هلا انجينر ..

الله يعافيج يارب ومشكوره..


لانه حب و يايبن جم واحد مخلينهم اقويه فالبنات حبوهم الفراغ العاطفي مشكله خخخ..

انا احب الافلام الغريبه هذا فكرته غريبه بس الاحداث ماصخه :\

اي حلو بس تحلين فيه :)

وحياج الله اخيتي..

٥ ديسمبر، ٢٠٠٩ ١٢:٠٣ ص

رورو الشخبوطه said...

.
هلا فيشه..

اذا ناويه تروحين روحي حلي فيه اما الاكل احسه عادي :\

اي مي تو احسها فقر استغفرالله حتى اهي مواليد الازمه خخخ وويه وايد جامد صاجه..

وحياج الله اخيتي..

٥ ديسمبر، ٢٠٠٩ ١٢:٠٥ ص

رورو الشخبوطه said...

هلا اخوي محمد..

اول يوم اللي بجوكلت بار اي وناسه اما الفيلم لا زحمة وايد لدرجة مافي طاوله ناكل عليها ..

اي بس انصحك بالحلو احلى من الاكل العادي ..

الله يعافيك يارب..

مشكور و ايام سعيده يارب..

٥ ديسمبر، ٢٠٠٩ ١٢:٠٨ ص

Faith said...

خوش جولات ماشالله

اهم شي استانستوااا

عليج ب 60 الف عافيه يارب **

٥ ديسمبر، ٢٠٠٩ ١١:٤٨

رورو الشخبوطه said...

هلا فيث ..

مرسي اي الحمدالله استانسنا..

الله يعافيج يارب ومشكوره..

وحياج الله..

٦ ديسمبر، ٢٠٠٩ ١٠:٠٩

خاتون said...

السلام عليكم...
يوعتينا الله يهداج ... أهم شي التكفخ و الخيمة اللي فوق راسج خليه يستانس و يعيش طفولته على حسابج ما عليه
و بالنسبة للفلم الجزء اللي بايطالي و في دكوتا لازم يكون هو الأفضل *_^

٧ ديسمبر، ٢٠٠٩ ١٢:٠٤ ص

رورو الشخبوطه said...

هلا خاتون..

وعليكم السلام والرحمه ..

خخ البوست اليديد ماحطيت اكل :)

خخ اي يستاهل سمسومي المهم مايقرب من لاب توبي ..

اي بس حده عنف :\

وحياج الله..

٧ ديسمبر، ٢٠٠٩ ١٠:٠٩ م

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

follow me

My Blog List

Ads