Friday, October 23, 2009
السلام ..
هالمره ببلش بالكتاب اهو اساس الموزوع..


هو بالاصل عباره عن مدونه الكترونيه تم تحويل محتواها للكتاب , وهو للكاتبه غادة عبد العال وهي صيدلانيه مصرية في اواخر العشرينات من عمرها (عند كتابة الكتاب) .
تطرقت في بدايته عن موضوع عام وشائك واهو الزواج ثم انتقلت لذكر اسباب رغبتها بالزواج ثم مالبثت ان تذكر مواقف غريبه واحداث مرت بها مع الخطاب وكلها تدور في اطار الكوميدي واقعي .
ابرز عيوب الكتاب هو انه بالمصري البحت وبالاضافه لكثرة الاخطاء الاملائية وخاصة بحرف ظ وض .(مو عيب هالشي بالمدونه بس الكتاب الجدير ان يكون هناك من يقوم بالتدقيق ع الاخطاء الاملائية وتصحيها ).
كما انه من المتوقع تحويل الكتاب الى مسلسل تلفزيون من بطولة هند صبري ..(ماشاءالله وناسه هالتحول من مدونه لي كتاب وان شاءالله بيكون مسلسل).
اتركم مع النبذه الخلفيه للكتاب :

كتاب ساخر جدا وواقعي جدا للشباب حول فتاة تريد أن تتزوج ومغامراتها المضحكة مع الخطاب المختلفين. ويصدر هذا الكتاب ضمن سلسلة مدون@الشروق وهي سلسلة جديدة تصدرها دار الشروق للمدونات العربية المتميزة.

"زمان كنتوا تشوفوا في الأفلام العربي أي بنت تدخل فرح وهي لابسه شيك كده شوية.. يتلموا عليها الشبان ويبقوا عايزين ياكلوها.. وما تخرجش م الفرح إلا بعريس..

دلوقتي نفس التجمعات بس بالعكس..

تلاقي كل أم قاعدة هي وبناتها مراقبين الشباب وياويله إللي يعدي جنبهم.

- طارق.. إزيك يا ولد.. مش تيجي تسلم على بنات خالتك شوف بقوا حلوين إزاي؟

- أنا مش طارق يا طنط وأنا متهيألي كده حضرتك مش خالتي.

- صحيح؟ معلش يا حبيبي العتب ع النظر طب ما تعرفنا على نفسك كده.. يمكن ربنا يحبك ويبقالك نصيب معانا.

طبعا الواد يا إما يطلع يجري.. يا إما حد من صحابه بياخد باله م الكمين إللي وقع فيه ويجي ينقذه على أساس في حد عايزة وكده.."



وهذا عنوان المدونه :
ملاحظات :
1- المدونه تحتوي على مواضيع اكثر من الكتاب اي تم استمرار التدوين فيها لنفس الفكره وهي الخطاب .
2- الكتاب استعرته من صديقتي (احضرته من مصر) ولا اعلم عن اماكن توافره بالكويت .
3- اهم ملحوظه اي اللي عايزه تتجوز مش انا :).


________________________________________________________

الجزء ال2 من الموضوع اهو عبارة عن نصايح الامهات الخطاب لانه حاشني طشار منهم وباطين جبدي ..

اول كلمه اقولها هم ..



رفقا بالقوارير

نبلش بالنصايح :

اول شي كل ام تشوف عيالها احسن ناس وخاصة اذا صبي تشوفه اسكت يمكن لانه حشاشة يوفها ..

-بقولها شغلها ولدج وانتي ع عيني وراسي بس عاد خافي الله لي يتي تخطبين له اذا ولدج تحبينه اكثر من لازم ومو قادره ع فراقه لي تزوج خليه عندج لا تزوجينه ,انا ماقصد انه الزواج بيمنعه او بيشغله عنج اساس مو من حقه يخليج انتي امه والاهم بحياته بس في مجموعه منكم خطر لا تاكل الجنه وتحاسبه ع ادنات الدون وتشيش ولدها عليها ..

-اذا ولدج الله لا يقول مو زين لا توهقين بنات الناس فيه ع ابو اذا تزوج بيتعدل @@

-لما نقول شروطنا بالتلفون اذا ولمتكم حياكم اذا لا لا تعنونا ع الفاضي ولا تعنون لنا ..

- ماعجبتج عادي مو نصيبي مع ولدج اتصلي عطينا خبر ترا ماراح اقط نفسي ولا بيين لانه ماخذيت ولدج بالعكس خيره ان شاءالله.

- اختاري وقت مناسب نقولج عندنا حالة وفاة تقولين مستعيلين يماما البنات ترس الديره الله يوفق ولدج مع غيري.

-التكافأ \التوافق \التناسب الخ من معاني لازم تتوافر بين اي زواجين اجتماعين و دراسيا ومادين وبكل الجوانب .

- اذا ولدج يبي زميلته سواء بالجامعه او الدوام مو معنها انها خايسه ومكلمته ترا للي الحين في بنات زينين والاهم انتي واثق بتربيتج مو ولا :P

هذا اللي بالي الحين..

16 comments:

مد ان كويت said...

كل الي قلتي عين العقل
بس الي صج يضحكني لي بغوا يسالون عن دراستج وقلتيلهم اعلام شوفي ردات فعلهم !! ليش أبوي شفينا اسم الله علينا عقل و ثقل وثقافه وتكانه وسنع ياالله من فضلك
ترى والله طيبين وزينين وننحب بسرررررررعه <<< شكو خخ

رورو عطييهم طاف والله يعوضج بالاحسن

رورو الشخبوطه said...

هلا مدمد..

مرسو مرسو..

اي امبيه انا اخر مره ضحكت شهالتخلف شهالنظره الخايسه لليي تدرس اعلام ولا يسالونج بتصيرين مذيعه عسى ماشر الاخت مضيعه خخ ..

اي والله شزينا شحلاتنا محترمات عيالهم الخسرانين خخ ..

اي طاف ..

وواجمعين يارب خيتو..

حياج الله..

ابو غرايم said...

مدونة عايزه أتجوز ! كنت من متابعينها قبل و لها إنتشار كبير خصوصاً في مصر

و بالنسبه لكلامج عن الأم اللي بتخطب لولدها

فـ والله اللي قلتيه إهو عين العقل وبعض الأمهات الله يهداهم يوهقون بنات العالم معاهم على أبو أن الولد راح يتسنع بعد الزواج !

شنو ,, البنات حقل تجارب عندج و عند ولدج !

منطق غريب و تفكير أغرب و الضحيه إهم البنات المساكين اللي على نياتهم ! << أخاف صج بس (:

هههههه

لا ,, جد جد

بعض الشباب اللي أشوفهم ,, بصراحه حتى الحمار ما يعيش معاهم ( مكرم القارئ )

نوعيات عجيبه و شوفة حال عالفاضي و خصوصا وقت الخطبه ! فـــلـــم ! هههه

ليش دايما أهل المعرس إذا بغوا يخطبون يقولون نبي الرد بسرعه ترا مستعجلين !؟ وإذا سووا العرس تلقينه بعد 9 شهور أو سنه عالاقل !؟ هذا و إهم مستعجلين !

و هم أنتوا بعد عليكم بعض السوالف ! (: بس ماني قايل لأنه البوست مبين أنه مع المرأه ضد الرجل ! هههه

رورو الشخبوطه said...

هلا اخوي بو غرايم..

اي ماشاءالله مشهورة..

خخ ..

اكيد مو كل البنات ع نياتهم ومعروف منو اللي قايم حظها بس احنا نتحجى عن البنات العاديين الطبيعين مو (مادري شكتب اخاف اكتب كلمه وتطلع عيب تنقال جدام الصبيان)..

واحنا اشوه مانشوف عريس القفله الا شوفه الشرعيه ولما نوافق ع ابو نشوف اذا في قبول نكمل اذا لا نفركش السالفه في ناس من اول شي ايي مع امه ..


خخ مافي حجز صالات بس شويه اللي يطولون احنا نوعنا نطول بالملجة بس في ناس ع طول يملج وياخذها مريحين نفسهم :p

لا عادي قول اخذ راحتك انا تحجيت باللي شفته فشي طبيعي بتحجى عن الشباب وامهاتهم << النساء خخ اذا عندك اضافه عن قوله يمكن شغلات فينا واحنا غافلين عنها ..

ومشكور ع الرد..

جاي الضحى said...

هلا رورو

اول ما قريت عن الكتاب حسيت انه يونس بس لما قلتي انه مكتوب بالمصري حطيت عليه X لاني مو وايد افهم لغتهم ولا احبها

وعلى سالفة الخطاب تدرين شنو اكثر شي يبط جبدي ... لما ام تخطب حق ولدها واهيا الي تدورله وتنقيله ولما يتزوجون بعدين تقوله طلقها وازوجك الي احسن منها !!!!! يعني لو اهوا منقيها يمكن انتي منقيتها وهم تقولين طلقها !!!

انا ما احب الخطبه التقليديه والسبه ---> ان في امهات الله يسامحهم لما يروحون يخطبون علبالهم البنات ميتين على الزواج ويشوفونهم جنهم بضاعه يتطمشون عليهم ويمشون

يمكن علبالهم كل وحده تدرس اعلام بتطلع بالتلفزيون ههههههه تخلف

والي مستعيلين او يطنشوف ما يشوفون شر

ويارب يرزقج بالي احسن منهم :)

مي اند ماي بوك said...

صح كلامج وأنا أوافقه كله

وخصوصا سالفة أنها تقص على خلق الله بولدها, بنات الناس مو لعبة عندج..

إنزين الكتاب شكله أوكي ويضحك بس أنا ما أحب أنه يكون باللهجة المصرية ما أقدر أفهم...

ذكرني بكتاب غرفة مادري جم الرعب.. عرفتيه؟؟ بطلت صفحة وأنا بالمكتبة ولا في جملة بالمصري

عيب بعض المؤلفين المصريين ما يلتزمون باللغة العربية بكل الكتاب.. يعني ما نبي شي مصري

رورو الشخبوطه said...

هلا جاي..

اهو الكتاب نفس محتوى المدونه بكل شي تقريبا الا انه المدونه فيها موضيع يديده..

اي جنه الزواج لعبه عندج بنات ترضين يصير فيهم جذي@@

اي استغفرالله احس اني تحفة بالمتحف خخ..

اي استغفرالله اساسا انا صحافه ليش اطلع بتلفزيون مضيعه!!

اي مايشوفون شر ..

اجمعين يارب ..

حياج الله..

رورو الشخبوطه said...

هلا موم..

مرسي ع التاييد..

اي استغفرالله ماتخاف من الحوبه او الله يبيلي بنات برياييل خياس !! لي الله هداها وتاب وتسنع زوجيه..

اي يضحك اهو لانه نقل كوبي بست عن بلوقها واهي كانت تكتب بالمصري اللي حتى الغلطات الاملائية مو معدلينها

قصدج غرفة 207 اذا اهو اي قريته بس ماذكر اذا تكلم مري فيها او لا بس الاغلب فصحى بحت..

مو بس المصرين حتى الكويتين لازم يقطون حجي بالعاميه..

وحياج الله خيتوو..

Anonymous said...

امبيه البوووست زوووغه لوول نفس صاحبته اكيداسما الله عليها :p
النصايح عجيبه يبتيها عالجرح خصوصا هالنقطتين
-بقولها شغلها ولدج وانتي ع عيني وراسي بس عاد خافي الله لي يتي تخطبين له اذا ولدج تحبينه اكثر من لازم ومو قادره ع فراقه لي تزوج خليه عندج لا تزوجينه ,انا ماقصد انه الزواج بيمنعه او بيشغله عنج اساس مو من حقه يخليج انتي امه والاهم بحياته بس في مجموعه منكم خطر لا تاكل الجنه وتحاسبه ع ادنات الدون وتشيش ولدها عليها ..

-اذا ولدج الله لا يقول مو زين لا توهقين بنات الناس فيه ع ابو اذا تزوج بيتعدل @@

يقثوني اللي يقولون يتزوج و يتعدل بالعكس انا اشوفهم يتزوجون و يتردون الله لا يبلانا يارب عموما تعرفين موقفي من الزواج ماله داعي اقول هني لوول
Betty

نمول said...

هههههههه شكله خوش كتاب ساخر
الحين ادخل على مدونتها واقرأ شوي

خوش نصائح والله تخليه عندها ابرك هههه
شكراً

بينغ ون said...

لوووول و الله الكتاب شكله زقرررت يبيلة اخذ فرة على المدوونة ,
بس صج بردتي جبدي على الامهاات لوول و الله جنه يمنون على البنت ليش بيخطبونها شدعوه عليييكم !

شكرررا :)

رورو الشخبوطه said...

هلا بتوي ..

خخ احرجتيني :p

اهو احتمال يتمادى لانه مالقى الايدى ويعدله ..

خخ تو الناس مبدايا تخرجي ونسمع رايج بالزواج :)

حياج الله خيتو..

رورو الشخبوطه said...

هلا اخوي نمول..

اي استفيد للمستقبل اذا بعدك مو متزوج :)

اي اكيد ابرك ولا تبلش بنات خلق الله فيه اذا هي مو متحملته واهي ام شلون اللي مالها شغل فيه وابتشلت فيهم !!

العفو ولو..

حياك الله اخوي..

رورو الشخبوطه said...

هلا بينغ..

اي بس لا تتعقدين لانه لسه الدنيا بخير خخخ..

اي استغفرالله خو احنا ماعندنا لا شغلة ولا مشغله غير حاطين ايدنا ع خدنا وناطرينها تي اهيا ولدها سبع البرمبه..

العفو ولو..

حياج الله خيتو..

خاتون said...

وناسة المصاروة يضحكون دمهم خفيف بس يبيلهم أحد يفهم سرعتهم بالكلام و فليكاتهم و أفيشاتهم بدعة
دايما مبدعة و تيبين مواضيع محد يفكر فيها

U R another Name 4 creativity

waiting 4 m0re

رورو الشخبوطه said...

هلا خاتون..

اي انا استانس ع كتاباتهم ..

بعد عمري مرسي ماعليج زود<< جنه تنقال جذي:)

وي وي لا مقدرش ع الكلام ده..

مشكوره ع الاطراء ..

وان شاءالله تعجبج كتاباتي ع طول..

حياج الله خيتو..

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

follow me

My Blog List

Ads