Monday, October 5, 2009
السلام عليكم ..
شلونكم؟؟
عوده جديده مع حبيب قلبي رفعت طربخ طربخ طربخ << صوت قلبي ..
وايد احبه ومن جذي اقرا اي شي لازم اقرا عقبها ماوراء الطبيعه بس يقولون بالعدد الاخير بيموت اهي اهي ..
هالمره اخر قراءاتي له كانت من العدد 11 لي 19 ..
تقريبا خلصتهم ب6 ايام جنه وايد :(
المهم ابلش ..
هالبوست بيكون عباره عن ملخص للقصه وبعض النعلومات اللي استفدت منها..
العدد رقم 11:
بعنوان اسطورة الكاهن الاخير ..

وفيها ينظم بطل جديد للسلسله يدعى (هن -تشو-كان) << اسمه جنه عطسه:)
وهذا القصه عباره عن جزئين هذا الاول منها وخلالها نتعرف على الكاهن الاخير منذ نشاته وحتى التقائه بالدكتور رفعت ..
ولقب ايضا بالزهرة الزرقاء و بالاخرس ..
اما اهم ماستفدته من القصه هي معلومات عامه عن البوذيه ..
وهناك سلبيتان في هذه القصه 1- ظهور الدكتور رفعت متاخر بالقصه (فقدته باولها ).
2- سلبيه وميزه بنفس الوقت هي طرح الكاتب لمذهب النافاراي في البداية اعتقدت انه حقيقي ثم مالبث انه بدا لي بعد قراتي لاحد الهوامش انه من خيال الكاتب (ماشاءالله).
العدد 12
بعنوان اسطورة البيت ..

في هذا العدد ياخذنا الدكتور رفعت لطفولته وفيها نتعرف على اصدقائه وسبب لقائهم هو عودة صديقة طفولتهم شيراز دون ان يتغير شكلها او حجمها اي انها بقيت طفله لمده تقارب ال30 عام !!
ومن المعلومات التي استفدتها :
ان هناك حالة تدعى التقزم الهروني او قد يسبب خلل بالغدد ببقاء الشخص بشكله كطفل ..

العدد 13..
اسطورة اللهب الازرق ..
مجرد قراتك لما هو مكتوب على سلسلة شاكال وبقائك وحيد فهذا يعني اصابتك بلعنته وهي الاحتراق و تحولك للرماد مع عدم الاضرار بملابسك او اي شي اخر !!
عوده مجدد لي امريكا والقاء جديد وغامره مثيره برفقة هاري الذي تعرفنا عليه باسطورة الموتى الاحياء..

العدد ال14..
اسطورة رجل الثلوج ..

اسطورتنا هذه بقيادة (هن -تشو -كان ) وفيها نتعرف على المي جي او الياتي الذي نعرفه باسم رجل الثلج ..
اما ماستفدته منه فهي معلومات عامه مشابهه لما ورد بهذا الرابط..
وفي هذا العدد ترك خطيبته هويدا ..

العدد رقم 15
اسطورة النبات ..

في هذا العدد يحدثنا الدكتور رفعت عن شبابه وتحديد حياته الجامعيه في كلية الطب وعلى احد اصدقائه الذي يدعى عماد صبحي الذي التقاه فيما بعد تقريبا بعد فراق دام 13 سنه بعد ان تمكن كل منهم باجتياز الدكتوراه كما نعرف الدكتور رفعت طبيب في امراض الدم بينما الدكتور عماد دكتور في علم النبات وكما يتميز الاخير بجاذبيه قويه ..
معلومات عامه استفدتها:
-هناك ماده تسمى الهيموجلوبين وهي بغ الدم الاحمر المسئول عن حمل الاكسجين ومنحة للانسجه ص 48.
- يوجد نباتات مفترسه عددها يقارب 500 نوع في العالم وهي تعيش في تربه فقيرة النتروجين ولذلك تعوض حاجتها له عن طريق اصطياد الحشرات وهضمها ص40..
من امثلتها نبات ديونيا ..
اما اهم حدث بالقصه هو وفاة امه اهي اهي ..
العدد رقم 16..
بعنوان اسطورة النافاراي ..
الجزء ال2 من اسطورة الكاهن الاخير ومن خلالها نستكمل مجرى الاحداث << :)
العدد رقم 17..
اسطورة حسناء المقبره ..

براسكا فتاة يلتقيها د. رفعت عند عودته من قريته في احد المقابر في القرية المجاوره فما قصتها !!
العدد 18..

اسطورة الغرباء ..

الصوره جنها استيكرز بس واضحه مو؟
نسافر بهذه الاسطوره لربوع سويسرا ونتعرف عليها بشكل عام ..
وعلى مدنها كمدينة بازل ..
ومعلومات اكثر ذكرت بالقصه على سبيل المثال انها تشتهر بسوق موسترميس ..
وقد كانت مركز للثورة على حكم الاسقفة وبها طبعت تعليمات مارتن لوثر صاحب المذهب البروتستانتي في اوربا ..
وهي من اهم الموانئ سويسرا ..
اما سبب زيارتنا لسويسرا هو مؤتمر علمي دعى اليه الدكتور رفعت وهناك تلقى دعوه لقضاء بعض الوقت في احدى القرى السويسرية وهناك تحدث عاصفة ثلجية تغلق مداخل المنطقه كما تصيب بعض افراد القريه باعراض غريبه كالانعزال و تساقط الشعر بشكل دائري ونقص في الوزن .
كما تمت الاشارة الى النيزك الذي ضرب او انفجر في سبيريا في عام 1908 ..
اخر معلومه استغربت منها : سويسرا تدعى هلفتيا - وفنلندا = سوومى >> بحثت بقوقل ولم اجد اي معلومه بهذا الخصوص ..
واخيرا الاسطورة بو ..
عدد ال19

نتعرف في هذا العدد على الكاتب في مجال الرعب والشاعر ادجار الان بو ..
ولعل هذا ابرز مااستفدته ..
هذا العدد شبيه بسلسلة فانتازيا ..
وتعبت ..
اكيد في بدليات بس عقب اجيك ..
دوركم الحين بشرب ماي ريجي نشف ..
بس يستاهل رفعت ..

16 comments:

Fishah said...

وناسه رديتي حق القراءة بقوه ماشاءالله :)

مافي بدليات بس اماكن النقط غلط :))

شربتي ماي؟ هني هني :)

يعطيج العافيه خيتوو :>

-mate said...

أسامي الأساطير أفلام, ولا الأسطورة بوو! جنك تخرعين أحد
:q

طماشة said...

هني وعافية الماي
عجبوني من القائمة بس اثنين، الباجي مادري ما حسيت إني أقدر أقراهم..

حبيت:

1- حسناء المقبرة
2- اسطورة اللهب الازرق

وأكثر شي الثانية أحب لما أكون قاعد وأقراها واتخيل إنه صج راح يصير فيني هالشي قمة الرعب يعطيج العافية ع البوست بس ممكن أسأل من وين؟ الظمني؟ وكأني شفت هالنوعية بالعجيري..

يعطيج العافية

طماشة

ماي بوك اند مي said...

أوووه رورو رديتي على القراءه ;)

أنا بحاول أدق على الظمني شكل كتبه أوكي عاد عسى ما صكوها

إنزين بس سؤال.. شلون ترتبين كتبج؟

رورو الشخبوطه said...

هلا فيشه..

خخ من عقب هذيل للحين ماخلصت شي اوف متنحه ع كتاب لغة الجسد ..

بس والله مفيد..

لا واي كلمالي القى بدليه ماتترقع وحرف جر مختفيه خخ بقعد اعدلهم ان شاءالله..

اي شربت الحمدالله مرسي :)

الله يعافيج يارب مشكوره خيتو..

وحياج الله..

رورو الشخبوطه said...

هلا اخوي مات..

خخ اي والله تنفع للتخريع..

بس القصص حلوه ..

وحياك الله اخوي..

رورو الشخبوطه said...

هلا اخوي طماشه ..

الله يعافيك ويهنيك يارب..

هالقائمه التعش احس مرتبطين بعض عكس اول 10 اعداد وهم الاوليين اقوى..

وخاصة ال3 ملوت الكاهن الاخير مو وايد حبيتهم ..

اي احلى شي انك تعيش بجو القصه راح تسمتع فيها..

والله يعافيك يارب..

اي اكيد ممكن اخوي صح بالظمني انا خذيت 4 اعداد قريت 2 وال3 لما بقرا حسيته مرتبط بعدد مو عندي رحت خذيت السلسله كلها من 35د.ك تقريبا صارت تقريبا ب13 ولا تشوف شكلي وانا شاريتهم خخ متشققه و9000 مره اطالعهم واردهم للحين كلمالي اروح ااطالعه واقرا عنواينهم..

وبالعجيري موجوده رفيجتي خذت منها 5 اعداد الاولى لاختها وعقب قلت لبنيه راحت بس مالقتهم كلهم..

اذا تبي تقراهم نصيحه اقراهم بالترتيب ..

بس اشتر مجموعه صغيره لي عجبتك كمل الباجي ..

الله يعافيك يارب..

ومشكور ..

وحياك الله اخوي..

رورو الشخبوطه said...

هلا موم..

خخ ورديت طخيت الحين ..

هالفتره سمعت انه مسوين عرض الكتاب ب200 وملوت اليهال جنه ب40..

بس اللي اعرفه انه وقفوا التوصيل بس تاكدي احسن..

اذا مالقيتهم جربي العجيري..

اهي اهي سوال محرج..

امم حاطتهم بدرج الكتب الكبار ..

و 3 رفوف بلاستيك لسوالف الظمني بس حاطتهم من بالطول لا بالعرض لانه مايكفي..

وناويه اشتري مكتبه بس للحين مو محصله اللي بالي شفت ايكيا (اكيا) ماعجبتني صغيره ولونه مايناسب داري و رحت هوم سنتر اصغر من اللي بايكيا ..

انتي شلون مرتبتهم خل اقلدج :)

وحياج الله خيتو..

طماشة said...

هلا رورو، اي تصدقين شكلي باخذهم بالترتيب لان دام انهم مرتبطين في بعض عيل لازم من اول وشكلي بسوي نفس ماقلتي اخذلي مجموعة.. لول وحلوة سالفتج كل مرة تقرين عناوينهم وتردينهم :D بس مردج تقرينهم لان انا كنت أسوي جذي وبالنهاية أقراهم مهما طال الوقت..
وهالجم يوم نازل علي وحي القراءة قاعد أقرا
( شواطئ الأبدية ) وهي من سلسلة الخيال العلمي، رورو حيل عجبتني اول جم صفحة والصراحة متشوق أعرف النهاية.. والله يسهل واخلصها..

طماشة

رورو الشخبوطه said...

هلا اخوي طماشه..

ولكم باك ..

اي احسن لك واضمن اخاف تاخذ وايد ومايعجبونك ..

اي لانه ماشاءالله 77 وحده انا قريت الحين بس 21 ..

اي ودي اخلصهم بس عندي وايد غيرهم من اقول بقرا شي ارد لهم ماقدر احبهم واقراي العنواين فضول بعرف شنو اكو مغامرات 2 ..

زين ماشاءالله انا تنحت بلغة الجسد بخلصه مو راضي :(

اسمها حلو اهي تبع دايموند بوك صح و اهي لو سمحت تاليف منو عساس اشتريها ..

ان شاءالله ع خير..

ومشكور اخوي..

رورو الشخبوطه said...

هلا رورو..

اهي فعلاً تبع دايموند بوك وموجودة بالعجيري وشفتها بجرير وهي من تأليف " رؤوف وصفي " توقعت بتقولينلي انها عندج وقاريتها.. حتى مكتوب على الرواية من فوق

" من أفضل روايات أدب الخيال العلمي "

قريت أول 3 صفحات وينيت عليه لازم تقرينه.. والقصة باختصار لحد ما وصلتله:

شخص اسمه ماجد يتبدل بجسمه مع شخص من مجرة ثانية تبعد عن مجرتنا درب التبانة مليونين سنة ضوئية ف لما يتم تبادل الاجساد يشوف عالمهم شلون صاير.. وحيل متشوف اعرف شلون صاير عالمهم.. مابي احرقه عليج بس انصحج فيه..

رورو الشخبوطه said...

اهلين اخوي..

مشكور ..

لا والله بس جنه شفتها بس انا اغلب دايموند بوك اللي عندي نزلتهم هني ملوت د.احمد توفيق و سند راشد ونفس ماقلت لك قبل ابعاد المجهول جزئين..

صادفني نفس هالشي مرتين مره بماوراء الطبيعه عدد 8 اللي فيها سالم وسلمى ينتقلون بالمجرات بجهاز مثل الرموت وقصتهم غريبه انا حسبالي اخوان طلع نسخ بس كل وحده من مجره بس الفرق بالجنس واحد ذكر وال2 خو نثيه :)

وهم الكاهن الاخير ينتقل بطريقه علمها اياه الكاهن الكبير لي 5 قرون تقريبا ومن الين لي مصر ..


شوقتني اقراها ان شاءالله بخذها من معرض الكتاب ..
مشكور اخوي ..

نمول said...

بعض الناس يقروون وايد يااااااااااو
تصزقين صار الي يقرأ وايد يسمونه معقد !!
انا اشد على ايدج واقول استمرى القرآذه مفيده
وتوسع الاستيعاب وتزيد الحصيله اللغويه والمعلوماتيه
بس انا ما اقرأ جذي بس شكراً

رورو الشخبوطه said...

السلام..

هلا نمول ..

خخ لا بصيرلي اكثر من اسبوع مو مخلصه شي:(

اهما كل شي زين صار عقد الاخلاق بحد ذاتها صارت عقد ودقه قديكه عند بعض الناس الله يهداهم يارب..

بهالحاله افتخر لكوني معقده :)

اي ماشاءالله مفيده وممتعه ..

وهم تكون خلفيه ثقافيه لابس فيها..

انا عشتوا غيرت الرعب جان اغرز بالكتاب توهقت معنه مفيد بس مو قادره اخلصه لعبت بحسبته ومو راضي يخلص..

العفو ولو ..

حياك الله..

خاتون said...

واااااااااااااااااااااااااو
وناسة أنا ويني عن مثل هالسوالف
يبيله زيارة للمكتبة
بس أخاف من روحة المكتبة
خبرج مهوسة كتب لووووووول
عساج على القوة و ما قصرتي
على هالتعب و البوست المفيد و الروعة
مرسي مثقفتنا *_^ موفقة دووومـ^_^

رورو الشخبوطه said...

هلا خاتون..

اي وناسه..

انا انطر معرض الكتاب :)

خخ مثل حالتي ..

الله يقويج يارب ومشكوره..

مرسو خيتو..

دوغيا ..

بعد عمري اجمعين يارب وجزاج الله خير..

وحياج الله..

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

follow me

My Blog List

Ads